ମାଲକାନଗିରି/କୋରକୁଣ୍ଡା, ୩୦/୧୦ (ଆପ୍ର ) : ମାଲକାନଗିରି ଜିଲ୍ଲା ଓର୍କେଲ ଥାନା ଅନ୍ତର୍ଗତ ବାଲିମେଳା ଏନଏସି ଓ୍ବାର୍ଡ ନଂ ୧ର ନୂଆସାହିରେ ବିଦ୍ୟୁତ ସଂସ୍ପର୍ଶରେ ଆସି ଜଣେ ଶ୍ରମିକର ମୃତ୍ୟୁ ଘଟିଛି। ମୃତ ଶ୍ରମିକ ଜଣକ ହେଲା ପ୍ରଦୀପ ବିଶ୍ବାସ ।
ବାଲିମେଳା ଠାରେ ପୂର୍ତ୍ତ ବିଭାଗ ପକ୍ଷରୁ ସେକ୍ସନ କାର୍ଯ୍ୟାଳୟ ଗୃହ ନିର୍ମାଣ କାର୍ଯ୍ୟ ରେ ଚିତାପାରି-୩ ପଞ୍ଚାୟତ ଏମଭି-୧୦୪ ଗ୍ରାମର ପବନ ବିଶ୍ବାସଙ୍କ ବଡ଼ ପୁଅ ପ୍ରଦୀପ ବିଶ୍ବାସ (୨୩) ଶ୍ରମିକ ଭାବେ କାମ କରୁଥିଲେ। ଦୁଇ ମହଲା ପାଇଁ ନିର୍ମାଣ କାର୍ଯ୍ୟ ଚାଲୁଥିବା ସମୟରେ ପ୍ରଦୀପ ଏକ ଲୁହା ପିଲର ଛାଞ୍ଚ ଧରି ଛାତ ଉପରକୁ ଯାଉଥିଲେ। ଲୁହା ପିଲର ଛାଞ୍ଚ ୧୧ କେବି ବିଦ୍ୟୁତ ତାର ରେ ଲାଗି ଯାଇ ଥିଲା। ବିଦ୍ୟୁତ ଆଘାତ ଲାଗିବା ପରେ ଯୁବକ ଜଣଙ୍କ ପଡିଯାଇ ଅଚେତ ହୋଇ ଯାଇଥିଲେ। ସ୍ଥାନୀୟ ଲୋକ ସଙ୍ଗେ ସଙ୍ଗେ ବାଲିମେଳା ଡାକ୍ତରଖାନା ନେଇ ଭର୍ତ୍ତି କରିଥିଲେ। ସେଠାରେ ଡାକ୍ତର ଆହାତ ଯୁବକଙ୍କ ଅବସ୍ଥା ଗୁରୁତର ଥିବାରୁ ୧୦୮ ଆମ୍ବୁଲାନ୍ସ ଡାକି ତୁରନ୍ତ ମାଲକାନଗିରି ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରିଥିଲେ। ଚିକିତ୍ସା ଚାଲିଥିବା ବେଳେ ତାଙ୍କର ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ। ଏନେଇ ଓର୍କେଲ ଥାନା ପକ୍ଷରୁ ଏକ ଅପମୃତ୍ୟୁ ମାମଲା ରୁଜୁ କରା ଯାଇ ମୃତଦେହ ବ୍ୟବଚ୍ଛେଦ ନିମନ୍ତେ ପଠା ଯାଇ ଘଟଣାର ତଦନ୍ତ ଆରମ୍ଭ କରିଛି। ଏ ସମ୍ପର୍କରେ ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ସୁଶାନୁ କୁମାର ଜେନାଙ୍କୁ ପଚାରିବାରୁ ତାଙ୍କ ଅଜାଣତରେ ଠିକାଦାର କାର୍ଯ୍ୟ କରିଛି। ଠିକାଦାର ତାର ମନମାନିରେ ଗୃହ ନିର୍ମାଣ କାର୍ଯ୍ୟ ଜାରି ରଖୁଛି ବୋଲି କହିଥିଲେ।
