ପାଟନା,୨୭: ମୁଖ୍ୟମନ୍ତ୍ରୀ ନୀତୀଶ କୁମାର ଏନ୍ଡିଏରେ ଫେରିବାର ପ୍ରସ୍ତୁତି ଭିତରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ ଫ୍ରଣ୍ଟ ଫୁଟ୍ରେ ଆସିଯାଇଛନ୍ତି। ତେଜସ୍ବୀ ଯାଦବଙ୍କ ବାସଭବନରେ ଶନିବାର ହୋଇଥିବା ଆରଜେଡି ବିଧାୟକ ଦଳର ବୈଠକରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ଲାଲୁ ପ୍ରସାଦ ଯାଦବଙ୍କୁ ଆଗାମୀ ନିଷ୍ପତ୍ତି ନିଆଯିବାକୁ କୁହାଯାଇଛି। ଏପର୍ଯ୍ୟନ୍ତ ତେଜସ୍ବୀ ଯାଦବ ଦଳର ସବୁ ନିଷ୍ପତ୍ତି ନେଉଥିଲେ। କୁହାଯାଉଛି ଯେ, ବର୍ତ୍ତମାନର ରାଜନୈତିକ ଘଟଣାକ୍ରମ ଭିତରେ ଆରଜେଡି ମଧ୍ୟ ଜୋରସାର ସମୀକରଣ କରିବାରେ ଲାଗିପଡିଛି।
ଆରଜେଡିର ରାଷ୍ଟ୍ରୀୟ ମୁଖପାତ୍ର ମନୋଜ ଝା’ ଶନିବାର ସୂଚନା ଦେଇଛନ୍ତି ଯେ, ଦଳର ବିଧାୟକ ଦଳ ବୈଠକରେ ଆଗାମୀ ନିଷ୍ପତ୍ତି ପାଇଁ ଲାଲୁଙ୍କୁ ଦାୟିତ୍ବ ଦିଆଯାଇଛି। ଆରଜେଡି ବିଧାୟକ କେଦାର ପ୍ରସାଦ କହିଛନ୍ତି, ପାର୍ଟି ବିଧାୟକ ଏକଜୁଟ ହୋଇଛନ୍ତି ଓ ଶେଷ ସମୟ ପର୍ଯ୍ୟନ୍ତ ସରକାରକୁ ବଞ୍ଚାଇବାର ଆଶା ରହିଛି। ଯଦି ରାଜ୍ୟପାଳ ଡକାନ୍ତି ତେବେ ବିଧାୟକ ତାଙ୍କ ପାଖକୁ ଯିବେ। ଆରଜେଡି ବିଧାୟକ ବିଜୟ ମଣ୍ଡଳ କହିଛନ୍ତି, ଲାଲୁ ଆମର ନେତା, ସେ ଯାହା ନିଷ୍ପତ୍ତି ନେବେ ଆମେ ତାହା ମାନିବୁ।
ଉଲ୍ଲେଖନୀୟ ଯେ, ଆରଜେଡି ନିଜର ପକ୍ଷ ସ୍ପଷଟ କରିସାରିଛି। ଲାଲୁଙ୍କ ପାର୍ଟି ଏବେ ଓ୍ବେଟ୍ ଆଣ୍ଡ ଓ୍ବାଚ୍ ଭୂମିକାରେ ରହିବ। ସେଭଳି ନିଜ ସ୍ତରରେ ମେଣ୍ଟ ଭାଙ୍ଗିବେ ନାହିଁ। ପାର୍ଟି ଜନତାଙ୍କୁ ଏହି ମେସେଜ୍ ଦେବାକୁ ଚାହୁଁଛି ଯେ, ନୀତୀଶ କୁମାର ହିଁ ମହାମେଣ୍ଟ ଭାଙ୍ଗିକି ଯାଉଛନ୍ତି। ଆରଜେଡିର ଏଥିରେ କୌଣସି ଭୂମିକା ନାହିଁ।