ନୂୂଆଦିଲ୍ଲୀ,୧୭/୦୫: ୨୦୨୪ ଲୋକସଭା ନିର୍ବାଚନର ଷଷ୍ଠ ପର୍ଯ୍ୟାୟରେ ମୋଟ ୮୬୯ ପ୍ରାର୍ଥୀ ଲଢ଼ୁଛନ୍ତି । ୧୮୦ ଜଣ (୨୧%) ଙ୍କ ନାମରେ ଅପରାଧିକ ମାମଲା ରହିଥିବା ବେଳେ ୩୩୮ ପ୍ରାର୍ଥୀ (୩୯%) କୋଟିପତି । ଏହି ପର୍ଯ୍ୟାୟରେ ଲଢ଼ୁଥିବା ମୋଟ ପ୍ରାର୍ଥୀଙ୍କ ମଧ୍ୟରୁ ୯୨ ଜଣ ବା ୧୧% ହେଉଛନ୍ତି ମହିଳା । ଏ ପର୍ଯ୍ୟନ୍ତ ୪ଟି ପର୍ଯ୍ୟାୟ ଲୋକସଭା ନିର୍ବାଚନ ଶେଷ ହେଲାଣି । ଆସନ୍ତା ୨୦ ତାରିଖରେ ପଞ୍ଚମ ଓ ୨୫ ତାରିଖରେ ଷଷ୍ଠ ପର୍ଯ୍ୟାୟ ପାଇଁ ମତଦାନ ହେବ । ଷଷ୍ଠ ପର୍ଯ୍ୟାୟ ନିମନ୍ତେ ନାମାଙ୍କନ ସଂକ୍ରାନ୍ତ ସମସ୍ତ ପ୍ରକ୍ରିୟା ଶେଷ ହୋଇଯାଇଛି ।
ଆସୋସିଏନ ଫର୍ ଡେମୋକ୍ରାଟିକ୍ ରିଫର୍ମସ (ଏଡିଆର୍) ୮୬୯ ପ୍ରାର୍ଥୀଙ୍କ ମଧ୍ୟରୁ ୮୬୬ ଜଣଙ୍କର ସତ୍ୟପାଠ ବିଶ୍ଳେଷଣ କରିଛି । ଏଥିରୁ ଜଣାପଡ଼ିଛି ଯେ ୮୬୬ ପ୍ରାର୍ଥୀଙ୍କ ମଧ୍ୟରୁ ୧୮୦ ଜଣ ବା ୨୧% ପ୍ରାର୍ଥୀଙ୍କ ନାମରେ ଅପରାଧିକ ମାମଲା ରହିଛି । ୧୪୧ (୧୬%) ପ୍ରାର୍ଥୀ ସେମାନଙ୍କ ନାମରେ ଗମ୍ଭୀର ଅପରାଧିକ ମାମଲା ରହିଥିବା ଘୋଷଣା କରିଛନ୍ତି । ୬ ଜଣ ପ୍ରାର୍ଥୀଙ୍କ ବିରୋଧରେ ହତ୍ୟା ମାମଲା ରହିଥିବା ବେଳେ ୨୧ ଜଣଙ୍କ ନାମରେ ହତ୍ୟା ଉଦ୍ୟମ ମାମଲା ରହିଛି । ମହିଳା ବିରୋଧୀ ଅପରାଧକୁ ନେଇ ୨୪ ଜଣଙ୍କ ନାମରେ ମାମଲା ରହିଛି । ଏହାବ୍ୟତୀତ ଘୃଣା ଭାଷଣ ସହ ଜଡ଼ିତ ମାମଲାରେ ୧୬ ଜଣଙ୍କ ନାମ ରହିଛି । ୧୨ ଜଣ ପ୍ରାର୍ଥୀ ନିଜ ନିଜ ମାମଲାରେ ଦୋଷୀ ସାବ୍ୟସ୍ତ ହୋଇଥିବା ସତ୍ୟପାଠରେ ଦର୍ଶାଇଛନ୍ତି ।
ଏଡିଆର୍ ରିପୋର୍ଟରୁ ଜଣାପଡ଼ିଛି ଯେ ଷଷ୍ଠ ପର୍ଯ୍ୟାୟରେ ଲଢ଼ୁଥିବା କୋଟିପତି ପ୍ରାର୍ଥୀଙ୍କର ହାରାହାରି ସମ୍ପତ୍ତି ମୂଲ୍ୟ ୬.୨୧ କୋଟି ଟଙ୍କା । ହରିଆଣାର କୁରୁକ୍ଷେତ୍ର ଲୋକସଭା ଆସନରୁ ବିଜେପି ଟିକଟରେ ଲଢ଼ୁଥିବା ଶିଳ୍ପପତି ନବୀନ ଜିନ୍ଦଲ ସବୁଠୁ ଧନୀ । ତାଙ୍କର ମୋଟ ସମ୍ପତ୍ତି ମୂଲ୍ୟ ୧,୨୪୧ କୋଟି ଟଙ୍କା ରହିଥିବା ସେ ଘୋଷଣା କରିଛନ୍ତି । ତାଙ୍କ ପଛକୁ ଦ୍ୱିତୀୟ ସ୍ଥାନରେ ଥିବା ବିଜେଡି ପ୍ରାର୍ଥୀ ସନ୍ତୃପ୍ତ ମିଶ୍ରଙ୍କର ୪୮୨ କୋଟି ଟଙ୍କାର ସମ୍ପତ୍ତି ରହିଛି । କୁରୁକ୍ଷେତ୍ରରୁ ଲଢ଼ୁଥିବା ଆପ୍ ପ୍ରାର୍ଥୀ ସୁଶୀଲ ଗୁପ୍ତାଙ୍କର ୧୬୯ କୋଟି ଟଙ୍କାର ସମ୍ପତ୍ତି ରହିଛି । ସେ ତୃତୀୟ ଧନୀ ବିବେଚିତ ହୋଇଛନ୍ତି । ଏହି ପର୍ଯ୍ୟାୟରେ ୩ ଜଣ ପ୍ରାର୍ଥୀଙ୍କ ସମ୍ପତ୍ତି ମୂଲ୍ୟ ୨ ଟଙ୍କାରୁ ୨ ହଜାର ଟଙ୍କା ମଧ୍ୟରେ ଥିବା ଦର୍ଶାଇଛନ୍ତି । ଏମାନଙ୍କ ସମ୍ପତ୍ତି ମୂଲ୍ୟ ଯଥାକ୍ରମେ ୨ ଟଙ୍କା, ୧,୬୮୬ ଟଙ୍କା ଓ ୨ ହଜାର ଟଙ୍କା ରହିଛି । ରୋହତକରୁ ସ୍ୱାଧୀନ ପ୍ରାର୍ଥୀ ଭାବେ ଲଢ଼ୁଥିବା ରଣଧୀର ସିଂହଙ୍କ ପାଖରେ ୨ ଟଙ୍କାର ସମ୍ପତ୍ତି ଥିବା ବେଳେ ପ୍ରତାପଗଡ଼ରୁ ଲଢ଼ୁଥିବା ଏସ୍ୟୁସିଆଇ (ସି) ପ୍ରାର୍ଥୀ ରାମକୁମାର ଯାଦବଙ୍କ ପାଖରେ ୧,୬୮୬ ଟଙ୍କାର ସମ୍ପତ୍ତି ଥିବା ତାଙ୍କ ସତ୍ୟପାଠରୁ ଜଣାପଡ଼ିଛି ।
ଷଷ୍ଠ ପର୍ଯ୍ୟାୟରେ ଲଢ଼ୁଥିବା ବିଜେପିର ମୋଟ ୫୧ ପ୍ରାର୍ଥୀଙ୍କ ମଧ୍ୟରୁ ୨୮ ଜଣଙ୍କ ନାମରେ ଅପରାଧିକ ମାମଲା ଥିବା ବେଳେ କଂଗ୍ରେସର ୨୫ ଜଣଙ୍କ ମଧ୍ୟରୁ ୮, ସପାର ୧୨ରୁ ୯, ଟିଏମ୍ସିର ୯ରୁ ୪, ଆପ୍ର ୫ରୁ ୪ ଏବଂ ଆରଜେଡିର ୪ରୁ ୪ ଜଣଙ୍କ ନାମରେ ଅପରାଧିକ ମାମଲା ରହିଛି । ୧୨୦ ପ୍ରାର୍ଥୀଙ୍କ ସମ୍ପତ୍ତି ମୂଲ୍ୟ ୫ କୋଟି ଓ ତା’ଠାରୁ ଅଧିକ ରହିଥିବା ବେଳେ ୧୧୪ ଜଣଙ୍କ ପାଖରେ ୨ରୁ ୫ କୋଟି ଟଙ୍କାର ସମ୍ପତ୍ତି ରହିଛି । ୧୯୧ ଜଣଙ୍କ ପାଖରେ ୫୦ ଲକ୍ଷରୁ ୨ କୋଟି ଏବଂ ୨୨୦ ଜଣଙ୍କ ପାଖରେ ୧୦ ଲକ୍ଷରୁ ୫୦ ଲକ୍ଷ ଓ ୨୨୧ ଜଣଙ୍କ ପାଖରେ ୧୦ ଲକ୍ଷ ଟଙ୍କାରୁ କମ୍ ସମ୍ପତ୍ତି ରହିଛି । ୩୩୨ ପ୍ରାର୍ଥୀ (୩୮%) ପଞ୍ଚମ ଓ ଦ୍ୱାଦଶ ପର୍ଯ୍ୟନ୍ତ ପଢ଼ିଛନ୍ତି । ୪୮୭ (୫୬%) ପ୍ରାର୍ଥୀ ନିଜ ଶିକ୍ଷାଗତ ଯୋଗ୍ୟତା ସ୍ନାତକ ଓ ତା’ଠାରୁ ଅଧିକ ଦର୍ଶାଇଛନ୍ତି । ୨୨ ପ୍ରାର୍ଥୀ ଡିପ୍ଲୋମାଧାରୀ । ୧୩ ପ୍ରାର୍ଥୀ ନିରକ୍ଷର । ୨୭୧ ଜଣଙ୍କ ବୟସ ୨୫ରୁ ୪୦ ବର୍ଷ ହୋଇଥିବା ବେଳେ ୪୩୬ ଜଣଙ୍କ ବୟସ ୪୧ରୁ ୬୦ ବର୍ଷ ରହିଛି । ୫୯ ପ୍ରାର୍ଥୀଙ୍କ ବୟସ ୬୧ରୁ ୮୦ ବର୍ଷ ।