ବଲାଙ୍ଗିର ୧୧।୮: ଫାଇନାନ୍ସ କର୍ମଚାରୀଙ୍କ ଚାରସବିଶ କାରସାଦି । ନିଜେ ନିଜର ଲୁଟ୍‌ର ନାଟକ କରି କମ୍ପାନୀକୁ ଠକିବାକୁ ଚେଷ୍ଟା କରିଥିଲେ । ଆଉ ଶେଷରେ ପୁଲିସ ହାତରେ ଧରାପଡ଼ିଲେ । ଏହି ଘଟଣାରେ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି ବଲାଙ୍ଗିର ସଦର ପୋଲିସ । ଗିରଫ ଅଭିଯୁକ୍ତ ଦୁହେଁ ଲୋଇସିଂହା ଥାନା ଅନ୍ତର୍ଗତ କନ୍ଦାଜୁରି ଗ୍ରାମର ଡୋଳାମଣି ପ୍ରଧାନ ଓ ସୋନପୁର ଜିଲ୍ଲା ତରଭା ଥାନା ଅନ୍ତର୍ଗତ ତକର୍ଲା ଗ୍ରାମର ସର୍ଜନ ଦନ୍ତା ବୋଲି ଜଣାପଡ଼ିଛି । ସେମାନଙ୍କଠାରୁ ନଗଦ ଟଙ୍କା ୬୦ ହଜାର ୬୮୦ ଟଙ୍କା ଉଦ୍ଧାର ହୋଇଥିବାବେଳେ ଦୁଇଟି ମୋବାଇଲ, ଦୁଇଟି ବାଇକ ଜବତ ହୋଇଥିବା ଜଣାପଡ଼ିଛି ।

ତେବେ ଗତ ୭ ତାରିଖରେ ଫୁଲିଝରନ ନିକଟରେ ଉକ୍ତ ଫାଇନାନ୍ସ କର୍ମଚାରୀଙ୍କଠାରୁ ଲୁଟ୍ ହୋଇଥିବା ନେଇ ସଦର ଥାନାରେ ଅଭିଯୋଗ ହୋଇଥିଲା । ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରିଥିଲା । ତେବେ ତଦନ୍ତ ସମୟରେ ଲୁଟ୍‌ର ଶିକାର ହୋଇଥିବା କର୍ମଚାରୀ ହିଁ ଲୁଟେରା ବୋଲି ଜଣାପଡ଼ିଥିଲା । ସେ ନିଜେ ନିଜକୁ ଲୁଟ୍‌ କରିବା ନାଟକ ରଚାଇ ଫାଇନାନ୍ସ କଲେକ୍ସନ ଟଙ୍କା ହଡ଼ପ କରିଥିଲା ବୋଲି ଏସଡିପିଓ ସୂଚନା ଦେଇଛନ୍ତି । ଏନେଇ ଉଭୟ କର୍ମଚାରୀଙ୍କୁ ଗିରଫ କରିଛି ସଦର ପୁଲିସ । ରବିବାର ଉଭୟ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି କହିଛନ୍ତି ଏସଡିପିଓ ।