କଟକ/କଟକସଦର,୧୬/୦୯: ପରିବାରରେ ନାନାଦି ସମସ୍ୟାରୁ ଅଶାନ୍ତି ଓ ଏହାକୁ ନେଇ ଦୁଇ ପୁଅଙ୍କ ମନରେ ଜୀବନ ପ୍ରତି ଆସିଥିବା ନୈରାଶ୍ୟ ଭାବ ମହାନଦୀ ବିହାରରେ ଘଟିଥିବା ହତ୍ୟାକାଣ୍ଡ ପଛର ଏକ ପ୍ରମୁଖ କାରଣ । ଶନିବାରଠାରୁ କରିଥିବା ତଦନ୍ତ ପରେ ଚାଉଳିଆଗଞ୍ଜ ଥାନା ପୁଲିସ ଏଭଳି କିଛି ତଥ୍ୟ ସାମ୍ନାକୁ ଆଣିଛି । ତେବେ ବୃଦ୍ଧା ମାଆଙ୍କୁ ଛୁରି ଭୁସି ହତ୍ୟା କରିବା ପରଠୁ ଫେରାର୍ ଥିବା ସାନ ପୁଅ ଅନୁରାଗ ମହାନ୍ତିକୁ ଚାଉଳିଆଗଞ୍ଜ ଥାନା ପୁଲିସ ଧରିବାରେ ସଫଳ ହୋଇଛି । ରବିବାର ଦିନ ତମାମ୍ ପୁଲିସ ଅନୁରାଗକୁ ଜେରା କରିବା ପରେ ଗିରଫ ଦର୍ଶାଇଥିବା ସୂଚନା ମିଳିଛି । ସମ୍ଭବତଃ ସୋମବାର ଅନୁରାଗକୁ କୋର୍ଟ ଚାଲାଣ କରାଯାଇପାରେ ।
ଶନିବାର ହତ୍ୟାକାଣ୍ଡ ଭିଆଇବା ପରେ ପ୍ରଥମେ ସାନ ଓ ପରେ ବଡ଼ ପୁଅ ଘରୁ ବାହାରକୁ ପଳାଇଥିଲେ । ବଡ଼ ପୁଅ ଅଂଶୁମାନ ପ୍ରଥମେ ରାଜନେତା ସଂଜୟ ଜେନା ଓ ଜଣେ ସୁଇପରକୁ ଚକ୍ମା ଦେଇ ଘରୁ ବାହାରକୁ ପଳାଇଥିଲେ । ମାତ୍ର ସେ କିଛି ଦୂରକୁ ଯାଇ ଏକ ମଣ୍ଡପ ପାଖରେ ଥିବା ବେଳେ ସଂଜୟ ଓ ପୁଲିସ ସୂଚନା ପାଇ ସେଠାରେ ପହଞ୍ଚି ତାକୁ କାବୁ କରି ନେଇଥିଲେ । ମାତ୍ର ମୃତା ଅନିମା ମହାନ୍ତି ପଡ଼ିଥିବା ଘରେ ଯାଇ ପୁଲିସ ଖୋଜାଖୋଜି କଲା ବେଳକୁ ସାନ ପୁଅ ଅନୁରାଗ ନଥିଲା । ସିସିଟିଭି ଫୁଟେଜ୍ ଯାଞ୍ଚ୍ କରିବାରୁ ସାନପୁଅ ଘରୁ ବାହାରି ଯାଉଥିବା ଜଣାପଡ଼ିଥିଲା । ଏହାପରେ ପୁଲିସ ଟିମ୍ ତାକୁ ଖୋଜାଖୋଜି କରିଥିଲେ ବି ସେ ଧରା ପଡ଼ିନଥିଲା । ଶନିବାରଠାରୁ ଦୁଇଟି ଟିମ୍ ତାକୁ ଖୋଜିବା ପାଇଁ ବାହାରକୁ ଯାଇଥିଲା ।
ରବିବାର ସନ୍ଧ୍ୟାରେ ପୁଲିସ ସୂଚନା ଦେଇଥିଲା ଯେ, ଅନୁରାଗକୁ କଟକରୁ କାବୁ କରାଯାଇଛି । ମାତ୍ର ଅନୁରାଗ ରବିବାର ଅପରାହ୍ନରେ ଥାନାରେ ଆସି ଆତ୍ମସମର୍ପଣ କରିଥିବା ଶୁଣିବାକୁ ମିଳୁଛି । ଖୋଦ୍ ଥାନା ଅଧିକାରୀ ଅଭିଯୁକ୍ତ ଅନୁରାଗକୁ ଜେରା କରୁଛନ୍ତି । ‘ବାପା ବଡ଼ ଚାକିରି କରିଥିଲେ, ମାତ୍ର ଦୁଇ ପୁଅ ଜୀବନରେ ସଫଳତା ପାଇପାରିଲେ ନାହିଁ । ଅଧାରୁ ଚାକିରି ଛାଡ଼ି ଘରେ ରହିଲେ । ହଠାତ୍ ଭଉଣୀଙ୍କର ମୃତ୍ୟୁ ହେଲା । କରୋନା ବେଳେ ବାପା ବି ଚାଲିଗଲେ । ଝିଅ ଓ ସ୍ୱାମୀଙ୍କ ମୃତ୍ୟୁ ପରେ ମା’ ଅନିମାଙ୍କ ମୁଣ୍ଡରେ ସବୁବେଳେ ଚିନ୍ତା ଲାଗି ରହିଥିଲା ।
ଦୁଇ ପୁଅ ଚାକିରି ନକରି ଘରେ ବସିବାରୁ ମା’ ସହିତ ପାଟିତୁଣ୍ଡ କରୁଥିଲେ । ଏପରିକି ଘରର ସବୁ ଜିନିଷପତ୍ର ଧିରେ ଧିରେ ଦୁଇ ପୁଅ ବିକି ଖାଇଲେ । ଏହାକୁ ନେଇ ମାଆ ସହିତ ଉଭୟଙ୍କର ବାରମ୍ବାର ଗଣ୍ଡଗୋଳ ହୁଏ । ଦୁଇ ପୁଅ କିଛି କରୁନାହାନ୍ତି ବୋଲି ମା’ ମଧ୍ୟ ଏକାଧିକ ଥର ଆକ୍ଷେପ କରିଛନ୍ତି । ଏପରିକି ବୟସ ଅତିକ୍ରାନ୍ତ ହେବାକୁ ବସିଲେ ବି ଦୁଇ ପୁଅ ବାହା ହେଲେନି । ଏହାକୁ ନେଇ ଘରେ ସବୁବେଳେ ଅଶାନ୍ତି ଲାଗି ରହେ । ସମ୍ପର୍କୀୟ ଓ ପଡ଼ୋଶୀ ମଧ୍ୟ ଟାହିଟାପରା କରୁଥିଲେ । ଏହି ଅଶାନ୍ତିରୁ ଉଭୟଙ୍କ ମନରେ ନୈରାଶ୍ୟ ଭାବ ଓ କ୍ରୋଧ ଆସିଲା ଓ ଶେଷରେ ପାରିବାରିକ ତିକ୍ତତା ବଢ଼ିବାରୁ ଗତକାଲି ଭୋର୍ରୁ ଦୁଇ ପୁଅ ହଠାତ୍ ରାଗିଯାଇ ମାଆଙ୍କୁ ଛୁରି ଭୁସି ମାରିଦେଲେ । ଜେରା ପରେ ଆଜି ପ୍ରାଥମିକ ଭାବେ ପୁଲିସ ହତ୍ୟାକାଣ୍ଡର ଏଭଳି କିଛି ତଥ୍ୟ ପାଇଛି । ତଦନ୍ତ ଶେଷ ପରେ ସଂପୂର୍ଣ୍ଣ ବିଷୟ ଜଣାପଡ଼ିବ ବୋଲି ପୁଲିସ କହିଛି।
ଅନ୍ୟପଟେ ହତ୍ୟାକାଣ୍ଡ ସ୍ଥଳରୁ ସାଇଣ୍ଟିଫିକ୍ ଟିମ୍ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି ଯାହା ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବାରେ ଅଧିକ ସହାୟକ ହେବ ବୋଲି ପୁଲିସ କହିଛି । ତେବେ ଏହି ମାମଲାରେ ଇନ୍ଫର୍ମାଣ୍ଟ୍ ବା ସୂଚନାକାରୀ ଥିବା ସଂଜୟ ଜେନା ବ୍ୟବଚ୍ଛେଦ ପରେ ମୃତଦେହକୁ ସତ୍କାର କରିବାରେ ସହଯୋଗ କରିଛନ୍ତି । ଅନିମାଙ୍କର ଜଣେ ସମ୍ପର୍କୀୟଙ୍କ ଉପସ୍ଥିତିରେ ଭାଗ୍ୟଧର ଆଚାର୍ଯ୍ୟ ଓ ତାଙ୍କର ଜଣେ ସହଯୋଗୀ ସତୀଚୌରାଠାରେ ଶବ ସଂସ୍କାର କରିଥିଲେ ।
ଜଗନ୍ନାଥ ମନ୍ଦିର ଟ୍ରଷ୍ଟକୁ ଦାନ ହୋଇଛି ପ୍ଲଟ୍!
ମୃତା ଅନିମା ମହାନ୍ତିଙ୍କ ମହାନଦୀବିହାରରେ ଥିବା ୭୧୪ ନମ୍ବର ପ୍ଲଟ୍ଟି ପୁରୀ ଶ୍ରୀ ଜଗନ୍ନାଥ ମନ୍ଦିରକୁ ଦାନ ହୋଇଥିବା ସ୍ଥାନୀୟ ଅଞ୍ଚଳରେ ଶୁଣିବାକୁ ମିଳୁଛି । କିନ୍ତୁ ଏହି ସମ୍ପତ୍ତି କିଏ ଓ କେବେ ଦାନ କରିଛି ତାହା ଠିକ ଭାବେ କେହି କହି ପାରୁନାହାନ୍ତି । ଏପରିକି ଦାନର କିଛି ଦସ୍ତାବିଜ୍ ମଧ୍ୟ ଉକ୍ତ ଘରେ ନାହିଁ । ଏନେଇ ପୁଲିସ ଯାଞ୍ଚ୍ କରୁଥିବା ସୂଚନା ମଳିଛି ।
ଘର ଖାଲି, ପୁଲିସ ତାଲା ପକାଇଛି
ବାପା ମରିବା ପରେ ଦୁଇ ପୁଅ ଘରେ ଥିବା ସଞ୍ଚିତ ଅର୍ଥକୁ ଖର୍ଚ୍ଚ କରି ଚାଲିଲେ । ଆଉ ସଞ୍ଚିତ ଅର୍ଥ ଧିରେ ଧିରେ ଶେଷ ହେବାକୁ ଲାଗିଲା । ପଇସା ସରିବା ପରେ ଗହଣା ଗୁଡ଼ିକୁ ଦୁଇ ପୁଅ ବିକ୍ରି କରିଦେଲେ । ପରେ ପରେ ଘରେ ଥିବା ଆସବାବପତ୍ର ବି ବିକ୍ରି କରି ଖାଇଲେ । ଏବେ ସେହି ଘରେ କୌଣସି ବଡ଼ ଓ ଭଲ ଆସବାବପତ୍ର ନାହିଁ । ଗତକାଲିର ଘଟଣା ପରେ ଉକ୍ତ ଘରେ ଆଉ କେହି ରହିବାକୁ ନାହିଁ । ଅନିମାଙ୍କ ସତ୍କାର ସରିଛି । ବଡ଼ ପୁଅ ଗତକାଲି ଗିରଫ ହୋଇଥିଲା । ଫେରାର୍ ସାନପୁଅ ଆଜି ଥାନାରେ । ଏଭଳି ସ୍ଥିତିରେ ସେହି ଘରେ ରହିବାକୁ ଆଉ କେହି ନାହାନ୍ତି । ଘରକୁ ନେଇ କେହି ସମ୍ପର୍କୀୟ ବି ପୁଲିସକୁ ଯୋଗାଯୋଗ କରି ନାହାନ୍ତି । ଏଭଳି ସ୍ଥିତିରେ ଘରକୁ ପୁଲିସ ତାଲା ପକାଇ ରଖିଛି ।
ମାନସିକ ସ୍ଥିତିକୁ ନେଇ ସ୍ପଷ୍ଟତା ନାହିଁ: ପୁଲିସ
ପଡ଼ୋଶୀମାନେ ଗତକାଲିଠାରୁ କହୁଥିଲେ ଯେ, ଦୁଇ ପୁଅ ମାନସିକ ରୋଗରେ ପୀଡ଼ିତ । ହେଲେ ଜେରା ବେଳେ ଦୁଇ ପୁଅ ରୋକ୍ଠୋକ୍ ଉତ୍ତର ଦେଉଥିବା ପୁଲିସ କହୁଛି । ଏପରିକି ଦୁହେଁ କେଉଁ ଡାକ୍ତର ପାଖରେ ଚିକିତ୍ସା ହେଉଥିଲେ ସେନେଇ ମଧ୍ୟ କୌଣସି ତଥ୍ୟ ପ୍ରମାଣ ପୁଲିସକୁ ମିଳିନି । ତେଣୁ ଦୁଇ ପୁଅଙ୍କୁ ମାନସିକ ସ୍ଥିତି ଠିକ୍ ନଥିବା କଥା କହିବା ଠିକ୍ ହେବନି ବୋଲି ପୁଲିସ କହିଛି । ଦୁଇ ପୁଅ କେବଳ ପାରିବାରିକ ଅଶାନ୍ତି ଦେଇ ଗତି କରୁଥିଲେ ବୋଲି ପୁଲିସ ସୂଚନା ଦେଇଛି ।
