ଭୁବନେଶ୍ୱର,୧୩/୦୮: ଓଲିଉଡ୍ ପାଇଁ ପ୍ରେକ୍ଷାଳୟରେ ଶୁଭୁଛି ‘ଆ... ଆ...’ କାହିଁକି ନା’ ଫ୍ରାଇଡେ ରିଲିଜ୍ ଅବସରରେ ମୁକ୍ତିଲାଭ କରୁଛି ୨ ନୂଆ ଓଡ଼ିଆ ସିନେମା । ଗୋଟିଏ ‘ଆଭା’ ଓ ଅନ୍ୟଟି ‘ଆଶ୍ରମ’ । ଉଭୟ ସିନେମା ଶୀର୍ଷକର ଆରମ୍ଭ ଅକ୍ଷର ‘ଆ’ ଥିବାରୁ ଦର୍ଶକ ଏହାକୁ ଛୋଟ କରି କହୁଛନ୍ତି ‘ଆ... ଆ...’ । ଏଥିସହିତ ବଲିଉଡ୍ରେ ୨ଟି କ୍ରାଇମ୍ ଥ୍ରିଲର୍ ଆସିଛି । ଗୋଟିଏ କରୀନା କପୁର୍ଙ୍କ ‘ଦ ବକିଙ୍ଗ୍ହାମ୍ ମଡର୍ସ’ ଓ ଅନ୍ୟ ସିନେମାଟି ହେଲା ‘ସେକ୍ଟର୍-୩୬’ । ଦୀର୍ଘ ଦିନର ବ୍ୟବଧାନ ପରେ କରୀନା ମୁଖ୍ୟ ଚରିତ୍ରରେ ଆସୁଥିବାରୁ ତାଙ୍କୁ ନେଇ ବକ୍ସ ଅଫିସ୍ରେ ବେଶ୍ ଚର୍ଚ୍ଚା ଲାଗି ରହିଛି ।
ଶୁକ୍ରବାର ଶୁଭମୁକ୍ତି କରୁଥିବା ଦୁଇ ଓଡ଼ିଆ ସିନେମା ଭିତରେ ରହିଛି ଓମ୍ ବାବା ପ୍ରଡକସନ୍ସର ଚଳଚ୍ଚିତ୍ର "ଆଭା’ । ଆଭା ଏକ ନିପଟ ମଫସଲ ଗାଁର ଗରିବ ପରିବାରର ଦିବ୍ୟାଙ୍ଗ ଝିଅ । ଦିବ୍ୟାଙ୍ଗ ହେଲେ ମଧ୍ୟ କେମିତି ବଞ୍ଚିବାକୁ ହେବ, ଯାହାଦ୍ୱାରା ସମାଜକୁ ଏକ ପ୍ରକାର ଶିକ୍ଷା ମିଳିବ ତାହାରି ଉପରେ ଆଧାରିତ ସିନେମାର କାହାଣୀ । ଏହାର ସୁଟିଂ ପଶ୍ଚିମବଙ୍ଗ ମେଦିନିପୁରର ଏକ ଗ୍ରାମୀଣ ପରିବେଶରେ ହୋଇଛି । ଏହି ଚଳଚ୍ଚିତ୍ରରେ ସୁନ୍ଦର ଅଭିନୟ କରିଛନ୍ତି ସୋନା ମଲ୍ଲିକ । ଅନ୍ୟାନ୍ୟ ଭୂମିକାରେ ଅନୁ ଚୌଧୁରୀ, କେଦାର ମିଶ୍ର, ଶ୍ୱେତା ଆଚାର୍ଯ୍ୟ, ବିଶାଲ ସାହୁ ଓ ଅନ୍ୟମାନେ ଅଛନ୍ତି । ପ୍ରଯୋଜନା ପ୍ରବୀର ମହାପାତ୍ର କରିଥିଲାବେଳେ କାହାଣୀ, ଚିତ୍ରନାଟ୍ୟ ଓ ନିର୍ଦ୍ଦେଶନା ଦେଇଛନ୍ତି ପଲ୍ଲବ ରୟ । ସଂଳାପ ଲେଖିଛନ୍ତି ମୋହିତ ଚକ୍ରବର୍ତ୍ତୀ, କ୍ୟାମେରାରେ ଦକ୍ଷତା ଦେଖାଇଛନ୍ତି ଚିତ୍ତରଞ୍ଜନ ବିଶ୍ୱାଳ, ସଙ୍ଗୀତ ଦେଇଛନ୍ତି ଅଭିଜିତ୍ ମଜୁମ୍ଦାର୍ ଓ କାର୍ଯ୍ୟକାରୀ ପ୍ରଯୋଜକ ରହିଛନ୍ତି ସତ୍ୟ ପ୍ରକାଶ ସାହୁ ବୋଲି କ୍ରିଏଟିଭ ହେଡ୍ ପ୍ରଣୟ ଜେଠୀ ସୂଚନା ଦେଇଛନ୍ତି । ରାଜ୍ୟର ୧୮ଟି ହଲ୍ରେ ରିଲିଜ୍ ହେଉଥିଲାବେଳେ ଭୁବନେଶ୍ୱରରେ ୨ଟି ମଲ୍ଲିପ୍ଲେକ୍ସ ଓ ଗୋଟିଏ ସିଙ୍ଗଲ୍ ସ୍କ୍ରିନ୍ରେ ଦର୍ଶକ ଦେଖିବାର ସୁଯୋଗ ପାଇବେ । ଅପରାହ୍ଣରେ ଭୁବନେଶ୍ୱରରେ ଏହାର ପ୍ରିମିୟର ଅନୁଷ୍ଠିତ ହେବ ।
ସେହିପରି ଅନିଶ୍ ଏଣ୍ଟରଟେନ୍ମେଣ୍ଟ ପ୍ରସ୍ତୁତ "ଆଶ୍ରମ-ଏକ ଆଶାର ଆଶ୍ରୟ’ । କାହାଣୀଟି ଜଣେ ମହିଳା ଆଇଏଏସ୍ଙ୍କ ଉପରେ ପର୍ଯ୍ୟବେସିତ । ଚାକିରି ଜୀବନ ଦୃଢ଼ତାର ସହିତ କଟାଇବା ପରେ ନିଜର ଏକମାତ୍ର ଘରକୁ ସମାଜରେ ଅବହେଳିତଙ୍କ ପାଇଁ ସମର୍ପି ଦେଇଛନ୍ତି । ପ୍ରମୁଖ ଭୂମିକାରେ ବିଶିଷ୍ଟ ଅଭିନେତ୍ରୀ ମହାଶ୍ୱେତା ରାୟଙ୍କ ସହ ଅଭିଷେକ ଗିରି, ସୂର୍ଯ୍ୟମୟୀ, ତନୁଶ୍ରୀ, ସୌମ୍ୟ, ବିଜୟିନୀ ମିଶ୍ର, ତୁଷାର, ଶଙ୍କର ଓ ଅନ୍ୟମାନେ ଅଛନ୍ତି । ପ୍ରଯୋଜନା ତପନ ଦାଶ କରିଥିଲାବେଳେ ନିର୍ଦ୍ଦେଶନା ସୁଧାଂଶୁ ମୋହନ ସାହୁ ଦେଇଛନ୍ତି । ଏହାର ସୁଟିଂ ପୁରୀ ଓ ଅନ୍ୟାନ୍ୟ ସ୍ଥାନରେ ହୋଇଛି । ୪ଟି ଖୁବ୍ ସୁନ୍ଦର ଗୀତ ଥିବାବେଳେ ଗୀତ ଲେଖିଛନ୍ତି ବାପୁ ଗୋସ୍ୱାମୀ ଓ ସଙ୍ଗୀତ ଦେଇଛନ୍ତି ଅଭିଜିତ୍ ମଜୁମ୍ଦାର୍ । ସିନେମାର କାହାଣୀ ନିତ୍ୟାନନ୍ଦ ନନ୍ଦୀ ଲେଖିଥିଲାବେଳେ ଚିତ୍ରନାଟ୍ୟ ଓ ସଂଳାପ ଲେଖିଛନ୍ତି ଦିଲ୍ଲୀପ ଚୌଧୁରୀ ।ଡିଓପିରେ ଦୀପକ କୁମାର ଏବଂ ସମ୍ପାଦନାରେ ଚନ୍ଦ୍ର ଶେଖର ମିଶ୍ର ଦାୟିତ୍ୱ ତୁଲାଇଛନ୍ତି । ପୂର୍ବରୁ ପ୍ରଯୋଜକ "ଚକ୍ଷୁ ବନ୍ଧନ’ ଓ "ମାୟାବୀ’ ସିନେମା ଦର୍ଶକଙ୍କୁ ଭେଟି ଦେଇଥିଲେ ଏବଂ "ମାୟାବୀ’ର ନିର୍ଦ୍ଦେଶକ ଥିଲେ ସୁଧାଂଶୁ ମୋହନ ସାହୁ । ତେଣୁ ଉଭୟ ଯୋଡ଼ିଙ୍କ ଆଶା ଏ ସିନେମା ବି ଆଶାଠୁ ଭଲ ହେବ । କାରଣ ବିଭିନ୍ନ ସ୍ତରରୁ ସିନେମାଟିର ନିର୍ମାଣ ଶେଷ୍ଠ କରିବାର ପ୍ରୟାସ କରାଯାଇଛି । ସିନେମାଟି ରାଜ୍ୟର ୧୬ଟି ହଲ୍ରେ ମୁକ୍ତିଲାଭ କରୁଥିବାବେଳେ ଭୁବନେଶ୍ୱରରେ ପ୍ରିମିୟର ହେଉଛି । ବଡ଼ କଥା ହେଲା³ ‘ଆଭା’ ଓ ‘ଆଶ୍ରମ’ର ପୂର୍ବରୁ ସ୍ୱତନ୍ତ୍ର ସ୍କ୍ରିନିଂ ସରିଛି । ଉଭୟ ସିନେମା ବି ସିନେ ସମୀକ୍ଷକ ଓ କଳାକାରଙ୍କ ମହଲରେ ବେଶ୍ ପ୍ରଶଂସା ସାଉଁଟିଛି । ତେଣୁ ଆଶା ସିନେମା ଘରେ ମଧ୍ୟ ସଫଳ ହେବ । କାରଣ ଗତ ସପ୍ତାହରେ ୩ଟି ଓଡ଼ିଆ ସିନେମା ଆସିଥିଲା, ଯାହା ଏବେ ବି ଚାଲିଛି । ସେହିଭିତରେ ଏ ଦୁଇ ଟିମ୍ ମଧ୍ୟ ନିଜ ସଫଳତା ନେଇ ଆଶାବାଦୀ ରହିଛନ୍ତି ।
