ପ୍ୟାରିସ,୦୬/୦୮: ‘ଗୋଲ୍ଡେନ ବୟ’ ନୀରଜ ଚୋପ୍ରାଙ୍କ ଉପରେ ରହିଛି ୧୪୦ କୋଟି ଭାରତୀୟଙ୍କ ଆଶା । ସେ ହିଁ ପଦକ ଦୋହରାଇବେ ଏବଂ ଜାଭେଲିନ ଥ୍ରୋରେ ଟାଇଟଲ ବଜାୟ ରଖିବେ । ନୀରଜ ଟୋକିଓ ଅଲିମ୍ପିକ୍ସ ଏବଂ ୨୦୨୩ରେ ବିଶ୍ୱ ଚାମ୍ପିଅନସିପ୍ରେ ଚାମ୍ପିଅନ ହୋଇଥିଲେ । ତେଣୁ ବିଶ୍ୱ ଚାମ୍ପିଅନଙ୍କ ଠାରୁ ବଡ଼ ପଦକ ଆଶା ତ ରହିବ ।
ମଙ୍ଗଳବାର ପୁରୁଷ ଜାଭେଲିନ ଥ୍ରୋରେ ରହିଛି ଯୋଗ୍ୟତା ପର୍ଯ୍ୟାୟ । ନୀରଜ ଓ ଓଡ଼ିଶାର କିଶୋର କୁମାର ଜେନା ୨ ଜଣ ଭାରତୀୟ ଏହି ଇଭେଣ୍ଟରେ ରହିଛନ୍ତି । କିଶୋର ଯୋଗ୍ୟତା ରାଉଣ୍ଡର ଗ୍ରୁପ୍ ଏ’ରେ ଅଛନ୍ତି । ମଙ୍ଗଳବାର ଦିନ ୧ଟା ୫୦ ମିନିଟରୁ ଏହି ଗ୍ରୁପ୍ର ଥ୍ରୋ ଆରମ୍ଭ ହେବ । ତେଣୁ କିଶୋର ପ୍ରଥମେ ଫିଲ୍ଡକୁ ଓହ୍ଲାଇବେ । ଗ୍ରୁପ୍ ବି’ରେ ରହିଛନ୍ତି ନୀରଜ । ଏହି ଗ୍ରୁପ୍ର ଥ୍ରୋ ଅପରାହ୍ଣ ୩ଟା ୨୦ ମିନିଟରୁ ଆରମ୍ଭ ହେବ ।
କିଶୋର ଚଳିତ ବର୍ଷ ସେମିତି ସେମିତି ଭଲ ପ୍ରଦର୍ଶନ କରିପାରି ନାହାନ୍ତି । ଗତ ଦୋହା ଡାଏମଣ୍ଡ ଲିଗ୍ରେ କିଶୋର ୭୬.୩୧ ମିଟର ଫିଙ୍ଗି ନବମ ସ୍ଥାନରେ ଏବଂ କଳିଙ୍ଗ ଷ୍ଟାଡିୟମରେ ଆୟୋଜିତ ଜାତୀୟ ଫେଡେରେସନ୍ କପ୍ରେ ୭୫.୪୯ ମିଟର ଫିଙ୍ଗି ଥିଲେ । ପଞ୍ଚକୁଲାରେ ଆୟୋଜିତ ୬୩ତମ ଜାତୀୟ ଅନ୍ତଃ ଜିଲ୍ଲା ସିନିୟର ଆଥଲେଟିକ୍ସ ଚାମ୍ପିଅନସିପ୍ ସେ ସିଜନର ପ୍ରଥମ ଥର ୮୦ ମିଟର ମାର୍କ (୮୦.୮୪) ଅତିକ୍ରମ କରିଥିଲେ ।
ନୀରଜ ପୂର୍ବରୁ ଦୋହା ଡାଏମଣ୍ଡ ଲିଗ୍ (୮୮.୩୬ ମିଟର), ଭୁବନେଶ୍ୱରରେ ଆୟୋଜିତ ଜାତୀୟ ଫେଡେରେସନ୍ କପ୍ (୮୨.୨୭ ମିଟର)ଏବଂ ଫିନଲାଣ୍ଡରେ ଆୟୋଜିତ ପାଭୋ ନୁର୍ମି କ୍ରୀଡ଼ାରେ (୮୫.୯୭ ମିଟର) ଭାଗ ନେଇଥିଲେ । ନୀରଜଙ୍କ କ୍ୟାରିୟରରେ ଶ୍ରେଷ୍ଠ ପ୍ରଦର୍ଶନ ୮୯.୯୪ ମିଟର ଏବଂ କିଶୋରଙ୍କ ୮୭.୫୪ ମିଟର ରହିଛି ।
