ପାଟନା,୧୧/୧୧; ଦ୍ବିତୀୟ ତଥା ଶେଷ ପର୍ଯ୍ୟାୟ ଭୋଟ୍ ଦେଉଛି ବିହାର । ସକାଳ ୭ଟାରୁ ୨୦ ଜିଲ୍ଲାରେ ୧୨୨ ଆସନରେ ଚାଲିଛି ମତଦାନ । ୧୩୦୨ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରୁଛନ୍ତି ୩ କୋଟିର ଅଧିକ ଜନତା । ବିହାରରେ ମୋଟ ୨୪୩ ବିଧାନସଭା ଆସନ ରହିଛି । ଗତ ୬ରେ ପ୍ରଥମ ପର୍ଯ୍ୟାୟ ନିର୍ବାଚନ ହୋଇଥିଲା । ବିହାର ବ୍ୟତୀତ ୬ ରାଜ୍ୟ ଏବଂ ଗୋଟିଏ କେନ୍ଦ୍ରଶାସିତ ଅଞ୍ଚଳର ୮ ବିଧାନସଭା ଆସନରେ ଉପନିର୍ବାଚନ ଚାଲିଛି । ନଭେମ୍ବର ୧୪ରେ ଭୋଟ ଗଣତି ହେବା ପରେ ଫଳାଫଳ ପ୍ରକାଶ ପାଇବ ।
ବିହାରରେ ମୋଟ ୨୪୩ ବିଧାନସଭା ଆସନ ରହିଛି । ଦ୍ବିତୀୟ ଫେଜ୍ରେ ଆଜି ୧୨୨ ଆସନରେ ଭୋଟ ଚାଲିଛି । ସକାଳ ୭ଟାରୁ ଭୋଟିଂ ଆରମ୍ଭ ହୋଇଛି । ସନ୍ଧ୍ୟା ୬ଟା ଯାଏ ମତଦାନ ଚାଲିବ । ଭୋଟିଂ ସରିବା କ୍ଷଣି ଏକ୍ଜିଟ୍ ପୋଲ୍ ବା ବୁଥ୍ବାହୁଡ଼ା ରିପୋର୍ଟ ଆସିବ । ନଭେମ୍ବର ୧୪ରେ ଭୋଟ ଗଣତି ହେବା ପରେ ହିଁ ପ୍ରକୃତ ଫଳାଫଳ ସାମ୍ନାକୁ ଆସିପାରିବ । ରାଜ୍ୟ ବିଧାନସଭାରେ ବହୁମତ ସଂଖ୍ୟା ୧୨୨ ରହିଛି । ଦ୍ୱିତୀୟ ବା ଶେଷ ପର୍ଯ୍ୟାୟରେ ୩.୭ କୋଟି ମତଦାତା ମୋଟ ୧,୩୦୨ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରୁଛନ୍ତି । ଦୀର୍ଘ ୨୫ ବର୍ଷର ବ୍ୟବଧାନ ପରେ ରାଜ୍ୟର ଇମାମଗଞ୍ଜ ସବ୍ଡିଭିଜନର ହେରହଜ, ପଥରା ଓ କେୱଲଡିହ ଗ୍ରାମର ଲୋକମାନେ ପ୍ରଥମ ଥର ପାଇଁ ଭୋଟ ଦେଉଛନ୍ତି । ସେମାନେ ୨୦୦୧ରେ ଶେଷ ଥର ଲାଗି ଭୋଟ ଦେଇଥିଲେ । ୧୨୨ ଆସନରେରୁ ୨୦୨୦ରେ ବିଜେପି ସର୍ବାଧିକ ୪୨ଟିରେ ଜିତିଥିଲା । ଆର୍ଜେଡି ୩୩, ଜେଡିୟୁ ୨୦, କଂଗ୍ରେସ ୧୧ ଏବଂ ବାମ ଦଳ ୫ଟିରେ ବିଜୟୀ ହୋଇଥିଲା । ସେହିଭଳି ୨୦୧୫ ନିର୍ବାଚନରେ ଜେଡିୟୁ ଏବଂ ଆର୍ଜେଡି ପରସ୍ପର ସହ ମେଣ୍ଟ କରି ଲଢ଼ିଥିଲା ବେଳେ ବିଜେପିର ଆସନ ସଂଖ୍ୟା ୩୬କୁ ହ୍ରାସ ପାଇଥିଲା । ଜେଡିୟୁ- ଆର୍ଜେଡି-କଂଗ୍ରେସ ମେଣ୍ଟ ମିଶି ଆଲୋଚ୍ୟ ୧୨୨ ଆସନରୁ ୮୦ଟି ଅକ୍ତିଆର କରିଥିଲେ । ଏହି ପର୍ଯ୍ୟାୟରେ ଏନ୍ଡିଏ ତରଫରୁ ବିଜେପି ସର୍ବାଧିକ ୫୩ ଆସନରେ ଲଢ଼ୁଥିବା ବେଳେ ଜେଡିୟୁ ୪୪ ଆସନରେ ଲଢ଼ୁଛି ।
ହିନ୍ଦୁସ୍ତାନ ଆୱାମ ମୋର୍ଚ୍ଚାର ମୁଖ୍ୟ ଜିତନରାମ ମାଁଝୀ ନିଜ କୋଟାର ସମସ୍ତ ୬ଟି ଆସନରେ ପ୍ରାର୍ଥୀ ଦେଇଛନ୍ତି । ଉପେନ୍ଦ୍ର କୁଶୱାହଙ୍କ ଆର୍ଏଲ୍ଏମ୍ ୪ ଆସନ ଏବଂ ଏଲ୍ଜେପି (ଆର୍) ୧୫ ଆସନରେ ପ୍ରାର୍ଥୀ ଦେଇଛି । ଅନ୍ୟପକ୍ଷରେ ମହାମେଣ୍ଟ ତରଫରୁ ଆର୍ଜେଡି ସର୍ବାଧିକ ୭୧ ଆସନରେ ପ୍ରାର୍ଥୀ ଦେଇଛି । କଂଗ୍ରେସ ୩୭ ଆସନରେ ଲଢ଼ୁଛି । ମୁକେଶ ସହନିଙ୍କ ଦଳ ଭିଆଇପିର ୭, ସିପିଆଇ(ଏମ୍ଏଲ୍)ର ୭, ସିପିଆଇ ୪ ଓ ସିପିଏମ୍ ଗୋଟିଏ ଆସନରେ ନିର୍ବାଚନ ଲଢ଼ୁଛନ୍ତି । ଏହାବ୍ୟତୀତ ଅସଦୁଦ୍ଦିନ ଓୱେସିଙ୍କ ଦଳ ଏଆଇଏମ୍ଆଇଏମ୍ ଦ୍ୱିତୀୟ ପର୍ଯ୍ୟାୟରେ ୨୧ ଆସନରେ ପ୍ରାର୍ଥୀ ଦେଇଛି । ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟି ୧୨୦ ଆସନରେ ଲଢ଼ୁଛି ।
