ମାଲକାନଗିରି, ୨୫/୮: ସୀମାନ୍ତରେ ମାଓବାଦୀଙ୍କ ବର୍ବର କାଣ୍ଡ। ପୁଲିସ ଇନଫର୍ମର ସନ୍ଦେହରେ ଜଣେ ଗ୍ରାମ ମୁଖିଆକୁ ପ୍ରଜାକୋର୍ଟରେ ଦଣ୍ଡିତ କରି ହତ୍ୟା କରିଛନ୍ତି ମାଓବାଦୀ। ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ ବିଜାପୁର ଜିଲ୍ଲା ବସ୍ତର ଡିଭିଜନରେ ସୁରକ୍ଷା ବାହିନୀ ଦ୍ୱାରା ପରିଚାଳିତ ହେଉଛି ସଫଳ ନକ୍ସଲ ବିଲୋପ ଅଭିଯାନ । ଏଥିରେ ବିବ୍ରତ ହୋଇ ନକ୍ସଲ ମାନେ ଗାଙ୍ଗାଲୁର ପୁଲିସ ଥାନା ଅଧୀନରେ ଥିବା ପୁସନାର ଗାଁ ମୁଖିଆ ଲାଛା ପୁନେମ(୬୦) ଙ୍କୁ ପୋଲିସ ଇନଫର୍ମର ସନ୍ଦେହରେ ଶନିବାର ରାତ୍ରିରେ ଘରୁ ଉଠାଇ ନେଇଥିଲେ । ପରେ ପ୍ରଜା କୋର୍ଟରେ ଦଣ୍ଡିତ କରି ରାତିରେ ଧାରୁଆ ଅସ୍ତ୍ରରେ ହତ୍ୟା କରି ନିକଟସ୍ଥ ଜଙ୍ଗଲରେ ଫିଙ୍ଗି ଦେଇଥିବା ଜଣାପଡ଼ିଛି । 

ହତ୍ୟା ପରେ ଶବ ନିକଟରେ ମାଓବାଦୀ ମାନେ ମଧ୍ୟ ଏକ ହାତ ଲେଖା ପୋଷ୍ଟର ଫିଙ୍ଗି ଯାଇଥିଲେ । ଯେଉଁଥିରେ ଅଭିଯୋଗ ରହିଛି ଯେ ସେ ପୁଲିସର ସୂଚନାଦାତା କାର୍ଯ୍ୟ ନ କରିବାକୁ ତାଙ୍କୁ  ବାରମ୍ବାର ପ୍ରଜାକୋର୍ଟରେ ବୁଝାଇ ଦିଆଯାଇଥିବା ସତ୍ତ୍ଵେ ସେ କ୍ରମାଗତ ଭାବରେ ପୁଲିସ ସହିତ ଯୋଗାଯୋଗ ରହିବା ସହ ମାଓବାଦୀ ଗତିବିଧି ସମ୍ପର୍କରେ ପୁଲିସକୁ ସୂଚନା ଦେଉଥିଲେ ।

ମାଓବାଦୀଙ୍କ ଗଙ୍ଗାଲୁର ଏରିଆ କମିଟିର କ୍ୟାର୍ଡର ଏହି ହତ୍ୟାକାଣ୍ଡ ପାଇଁ ନିଜକୁ ଦାୟୀ କରିଛି। ଏହି ଘଟଣା ପରେ ପୁଷନାର ଗ୍ରାମ ଏବଂ ଏହାର ଆଖପାଖ ଅଞ୍ଚଳରେ ଭୟ, ଆତଙ୍କର ବାତାବରଣ ଦେଖିବାକୁ ମିଳିଛି । ଗଙ୍ଗାଲୁର ପୁଲିସ ଏହାର ତଦନ୍ତ କରୁଛି । ମୃତଦେହକୁ ଜବତ କରାଯାଇ ଶବ ବ୍ୟବଛେଦ ପରେ ପରିବାର ଙ୍କୁ ହସ୍ତାନ୍ତର କରାଯାଇଛି । ହତ୍ୟାକାଣ୍ଡର ତଦନ୍ତ ଜାରି ରହିଛି ଓ ସେ ଅଞ୍ଚଳରେ କୁମ୍ବି ଅପରେସନକୁ ଜୋରଦାର କରାଯାଇଛି ।