ନୂଆଦିଲ୍ଲୀ, ୨୮/୦୩: ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଆଶ୍ୱସ୍ତି ମିଳି ନାହିଁ । ରାଉଜ୍ ଆଭେନ୍ୟୁ କୋର୍ଟ କେଜ୍ରିୱାଲଙ୍କୁ ଆଉ ୪ ଦିନ ଲାଗି ପ୍ରବର୍ତ୍ତନ ନିର୍ଦ୍ଦେଶାଳୟ (ED) ରିମାଣ୍ଡରେ ନେବାକୁ ଅନୁମତି ଦେଇଛନ୍ତି । ଏପ୍ରିଲ୍ ୧ ତାରିଖ ପର୍ଯ୍ୟନ୍ତ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ୍, ଇଡି ରିମାଣ୍ଡରେ ରହିବେ ।

ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ମନି ଲଣ୍ଡରିଂର ତଦନ୍ତ କରୁଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଇଡିର ଦାବି ଅନୁସାରେ, ଆପ୍ ଲାଞ୍ଚ ଟଙ୍କାକୁ ଗୋଆ ବିଧାନସଭା ନିର୍ବାଚନରେ ବ୍ୟବହାର କରିଥିବା ପ୍ରମାଣ ରହିଛି । ମାର୍ଚ୍ଚ ୨୧ ତାରିଖରେ ଇଡି, ଆପର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଥିଲା ।

ଏହା ପରେ କେଜ୍ରିୱାଲଙ୍କୁ, ଇଡି ରିମାଣ୍ଡରେ ନେଇଥିବା ବେଳେ ଗୁରୁବାର ରାଉଜ୍ ଆଭେନ୍ୟୁ କୋର୍ଟରେ ହାଜର କରିଥିଲା । ଇଡି ଓ କେଜ୍ରିୱାଲଙ୍କ ପକ୍ଷରୁ ବିଭିନ୍ନ ଦସ୍ତାବିଜ୍ କୋର୍ଟରେ ଦାଖଲ କରାଯାଇଥିଲା । ଇଡି ୭ ଦିନ ଲାଗି ରିମାଣ୍ଡରେ ନେବାକୁ ଆବେଦନ କରିଥିବା ବେଳେ କୋର୍ଟ ୪ ଦିନ ଅନୁମତି ଦେଇଛନ୍ତି । ଏପ୍ରିଲ୍ ୧ ମଧ୍ୟାହ୍ନ ୨ଟାରେ କେଜ୍ରିୱାଲଙ୍କୁ କୋର୍ଟରେ ହାଜର କରାଯିବ ।

ଇଡି କୋର୍ଟରେ କହିଛି, କେଜ୍ରିୱାଲଙ୍କ ପତ୍ନୀଙ୍କ ଫୋନରୁ ତଥ୍ୟ ବାହାର କରାଯାଇ ବଶ୍ଲେଷଣ ଚାଲିଛି । କେଜ୍ରିୱାଲଙ୍କ ସହ ଜଡ଼ିତ ଅନ୍ୟ ୪ଟି ଡିଭାଇସର ଡାଟାକୁ ଜବତ କରାଯାଇଛି । ମାର୍ଚ୍ଚ ୨୧ରେ କେଜ୍ରିୱାଲଙ୍କ ଘରେ ଚଢ଼ାଉ ବେଳେ ମିଳିଥିବା ଡିଭାଇସରୁ ଡାଟା ବାହାର କରାଯାଇ ନାହିଁ ।

ସେପଟେ କୋର୍ଟରେ କେଜ୍ରିୱାଲ୍ କହିଛନ୍ତି, ଯାହା କିଛି ବି ହେଉଛି ରାଜନୈତିକ ଷଡ଼ଯନ୍ତ୍ରର ଅଂଶ ବିଶେଷ । ଏହାର ଜବାବ ଜନତା ଦେବେ । କେଜ୍ରିୱାଲଙ୍କ ପତ୍ନୀ ସୁନୀତାଙ୍କ ଦାବି ଅନୁସାରେ, କେଜ୍ରିୱାଲଙ୍କ ସ୍ୱାସ୍ଥ୍ୟ ଠିକ୍ ନାହିଁ । ଏବେ ତାହ୍କ ରକ୍ତ ସର୍କରା ସ୍ତର କମ୍ ରହିଛି ।