ଭାପୁର,୩୦/ ୧୧: ଫତେଗଡ ଥାନା ଅନ୍ତର୍ଗତ ବଡସହରା ପଞ୍ଚାୟତରେ ଶନିବାର ଖଣ୍ଡପଡ଼ା ଅବକାରୀ ବିଭାଗ ଚଢାଉ କରି ଦୁଇଟି ଗ୍ରାମରୁ  ୨୪ ଲିଟର ଦେଶି ମଦ ଜବତ କରିଛି । ଏହି ଘଟଣାରେ ସମ୍ପୃକ୍ତ ଥିବା ଦୁଇ ଜଣଙ୍କୁ ଗିରଫ କରାଯାଇଛି । ଗିରଫ ହୋଇଥିବା ଦୁଇ ଜଣ ବଡସହରା ଗ୍ରାମର ନବ ପରିଡ଼ାଙ୍କ (୪୫) ଏବଂ ବାଦଭୂଇଁ ଗ୍ରାମର ପ୍ରକାଶ ବେହେରାଙ୍କ (୨୭) ବୋଲି ଜଣା ପଡ଼ିଛି । ଢେଙ୍କାନାଳ ଜିଲ୍ଲା ଫତେଗଡ ଥାନା ଅନ୍ତର୍ଗତ ବଡସହରା ପଞ୍ଚାୟତରେ ଏଭଳି ଘଟଣା ଘଟିଛି ।

ସୂଚନା ମୁତାବକ, କିଛି ଦିନ ତଳେ କଟକ ଅବକାରୀ ବିଭାଗ ଫତେଗଡ ଥାନା ଅଞ୍ଚଳରେ ଚଢ଼ାଉ କରି ଦେଶୀମଦ କାରଖାନା ଠାବ କରିବା ସହ ବିପୁଳ ପରିମାଣର ଦେଶୀମଦ ଜବତ କରିଥିଲେ। ଏହାପରେ ଖଣ୍ଡପଡ଼ା ଅବକାରୀ ବିଭାଗ ସକ୍ରିୟ ହୋଇ ଉଠିଛି । ଶନିବାର ଖଣ୍ଡପଡ଼ା ଅବକାରୀ ବିଭାଗର ଅଧିକାରୀ ଦୀପକ କୁମାର ଜେନା କୈାଣସି ସୂତ୍ରରୁ ସୂଚନା ପାଇଁ ତାଙ୍କ ନେତୃତ୍ବରେ ବଡସହରା ଗ୍ରାମରେ ଚଢ଼ାଉ କରିଥଲେ । ଏହି ଚଢାଉରେ ଗ୍ରାମର ନବ ପରିଡ଼ାଙ୍କ ନିକଟରୁ ୧୧ ଲିଟର ଦେଶୀମଦ ଜବତ କରିଥିଲେ । ସେହି ପଞ୍ଚାୟତର ବାଦଭୂଇଁ ଗ୍ରାମରେ ଚଢ଼ାଉ କରି ପ୍ରକାଶ ବେହେରାଙ୍କ ନିକଟରୁ ୧୩ ଲିଟର ଦେଶୀମଦ ଜବତ କରିଥିଲେ । ଚୋରା ମଦ କାରବାରରେ ନବ ଓ ପ୍ରକାଶକୁ ଗିରଫ କରି କୋର୍ଟ ଚାଲାଣ କରିଥିବା ଅବକାରୀ ବିଭାଗର ଅଧିକାରୀ ଶ୍ରୀ ଜେନା ସୂଚନା ଦେଇଛନ୍ତି । ଏହି ଚଢ଼ାଉରେ ଶ୍ରୀ ଜେନାଙ୍କ ସହ ଲକ୍ଷ୍ମୀଧର ବେହେରା, ପ୍ରତ୍ୟୁଷ ରଞ୍ଜନ ଦେହୁରୀ ଏବଂ ମିତାରାଣୀ ନାଏକ ପ୍ରମୁଖ ସାମିଲ ହୋଇଥିଲେ ।