ପ୍ରମୂଖ ଖବର
  • କାଲିମେଳା: ଲଗାଣ ବର୍ଷାରେ ବେହାଲ ଜନଜୀବନ, ପାହାଡ ଧସିବାରୁ ରାସ୍ତା ବନ୍ଦ
  • ||
  • ସପ୍ତଦଶ ବିଧାନସଭାର ବଜେଟ୍ ଅଧିବେଶ ଆରମ୍ଭ, ପ୍ରଥମ ଦିନରେ ଅଭିଭାଷଣ ରଖିଲେ ରାଜ୍ୟପାଳ ରଘୁବର ଦାସ
  • ||
  • ଯାଜପୁର : ଭାରସାମ୍ୟ ହରାଇ ଓଲଟିଲା ​କାଉଡିଆଙ୍କୁ ନେଇ ଯାଉଥିବା ବସ୍, ୫ରୁ ଉର୍ଦ୍ଧ୍ଵ ଆହତ
  • ||

ରଥଖଳା ହାଲ୍‌ଚାଲ୍‌..ଚଉଦନାହାକା ବୁଲି ଟୁଙ୍ଗୁରା ହେଲା ଦ୍ୱିତୀୟ ଭୂଇଁ, ପାର୍ଶ୍ୱ ଦେବଦେବୀଙ୍କୁ ରଙ୍ଗ ଦେଲେ ଚିତ୍ରକର ସେବକ

ପୁରୀ,୨୪/୦୬: ରବିବାର ତିନି ରଥରେ ଚଉଦନାହାକା ବୁଲିବା ସହ ପ୍ରଥମ ଭୂଇଁ ଓ ଦ୍ୱିତୀୟ ଭୂଇଁ ଟୁଙ୍ଗୁରା ଯାଇଛି । ଚାରିନାହାକାର ଚତୁପାଶ୍ୱର୍ରେ ବୁଲିଛି ଚଉଦନାହାକା । ପ୍ରଥମେ ତିନି ରଥର ଦଣ୍ଡା ଉପରେ ଖଦିଓରା କାଠ (ନଡ଼ିଆ କାଠର  ଗଡ଼) ଖଞ୍ଜାଗଲା । ଖଦିଓରାରେ ହୋଇଥିବା ବିନ୍ଧରେ ଚଉଦନାହାକା ରଖାଗଲା । ପରେ ଛଅ କାଠ ଉପରେ ପ୍ରଥମ ଓ ଦ୍ୱିତୀୟ ଭୂଇଁ  ଉଠିଥିଲା । ରଥର ଚକରେ ଲୁହା ପ୍ଲେଟ୍‌ ଲାଗିଛି । ପହିରେ ନଟବୋଲ୍ଟ ଦେଇ ପ୍ଲେଟ୍‌ ଫିଟିଂ କରିଛନ୍ତି କମାର ସେବକ । ପହି ଯୋଡ଼େଇକୁ ମଜଭୁତ୍‌ କରିବାକୁ ଆଗିଆଣି ଚକରେ ଲାଗିଛି ପ୍ଲେଟ୍‌ । ରଥ  ଚାଳନା ସମୟରେ ବ୍ରେକ୍‌ ଯୋଗୁ ଆଗିଆଣି  ଚକରେ ଚାପ ପଡ଼େ । ଏଣୁ ଆଗରୁ ପ୍ଲେଟ୍‌ ଲଗାଯାଉଥିବା କହିଛନ୍ତି ନିର୍ମାଣକାରୀ । 

ପୂର୍ବରୁ ପ୍ରଥମ ଭୂଇଁର ଛଅ କାଠ  ରଥ ଉପରକୁ ଉଠିଥିଲା । ପରେ କଇଁଆ  ବାଡ଼େଇ ତାହାକୁ ସଳଖି ଦେଲେ ।  ଛଅ କାଠରେ ଥିବା ଅଙ୍କା ବଙ୍କା ଅଂଶ  ସୁଧୁରାଗଲା । ଚାରିନାହାକା ଓ ଛଅ କାଠକୁ  ଦୃଷ୍ଟିଦେଇ ବୁଲିଥିଲା ଚଉଦନାହାକା ।  ଚଉଦନାହାକାର ସାଲ ସବୁକୁ ଖଦିଓରାର ବିନ୍ଧରେ ଭୁଞ୍ଜାଗଲା । ଖଦି ଓରା ହେଉଛି  ନଡ଼ିଆ କାଠର ଗଡ଼ । ଗୋଟିଏ ଖଦି  ଓରାରେ ଦୁଇଟି ବିନ୍ଧ ହୋଇଥିଲା । ୧୪  ନାହାକାରୁ ୧୦ଟି ଖଦିଓରା  ଉପରେ ରହିଲା । ବାକି  ଚାରିଗୋଟିର ନାମ ହେଉଛି  ଚଢ଼େଇ । ଚଉଦନାହାକା ବୁଲିବା ପରେ  ପ୍ରଥମ ଭୂଇଁ ଟୁଙ୍ଗୁରା ଗଲା । ପ୍ରଥମ  ଭୂଇଁରେ ଚାରିଗୋଟି ଖମ୍ବୀ ପୋତାଯାଇ  ଦ୍ୱିତୀୟ ଭୂଇଁର ଛଅ କାଠ ଉଠିଲା ।  ଅପରାହ୍ଣରେ ଦ୍ୱିତୀୟ ଭୂଇଁ ମଧ୍ୟ ଉଠିଲା । 

ଭୋଇ ସେବକମାନେ ରଥ ଉପରକୁ  ଓଜନିଆ କାଠକୁ ବୋହି ନେବାର ଶୈଳୀ ଦେଖଣାହାରୀଙ୍କୁ ଅବାକ୍‌ କରୁଥିଲା । ଚିତ୍ରକରମାନେ ରଥ କାର୍ଯ୍ୟ ଆରମ୍ଭ କରିଛନ୍ତି । ରଥ ଚକରୁ ଆରମ୍ଭ ହୋଇଛି ରଥ  ରଙ୍ଗ କାର୍ଯ୍ୟ । ପାଶ୍ୱର୍ ଦେବଦେବୀଙ୍କୁ ନୂତନ ଭାବେ ଚିତ୍ର କରୁଛନ୍ତି ପାରମ୍ପରିକ ଚିତ୍ରକର  ସେବକ । ରୂପକାରଙ୍କ ନାଟଗୋଡ଼ରେ  ଖୋଦେଇ କାର୍ଯ୍ୟ ପ୍ରାୟ ଶେଷ । ବିଶ୍ୱକର୍ମାଙ୍କ  କାମକୁ ତାଳ ଦେଇ ଓଝା ସେବକମାନେ  ଲୁହା ସାମଗ୍ରୀ ତିଆରୁଛନ୍ତି ।  ନନ୍ଦିଘୋଷ ରଥର ମୁଖ୍ୟ ବିଶ୍ୱକର୍ମା  ବିଜୟ କୁମାର ମହାପାତ୍ର, ତାଳଧ୍ୱଜ  ରଥର ମୁଖ୍ୟ ବିଶ୍ୱକର୍ମା ନରସିଂହ  ମହାପାତ୍ର ଓ ଦେବୀ ରଥର ମୁଖ୍ୟ  ବିଶ୍ୱକର୍ମା କୃଷ୍ଣଚନ୍ଦ୍ର ମହାରଣାଙ୍କ  ନିର୍ଦ୍ଦେଶ ଅନୁଯାଇ ପରସ୍ପର ଭିତରେ  ସମନ୍ୱୟ ରଖି ରଥ ନିର୍ମାଣ ଆଗଉଛି ।

  • PrameyaOdia
  • prameya
  • Ratha Yatra 2024
  • News7 Is Now On WhatsApp Join And Get Latest News Updates Delivered To You Via WhatsApp

    Rath Yatra

    Copyright © 2024 - Summa Real Media Private Limited. All Rights Reserved.