ଭୁବନେଶ୍ୱର,୦୬/୧୨: ସ୍କୁଲ ଓ ଗଣଶିକ୍ଷା ବିଭାଗର ଚିଠି ନଂ ୨୧୦୬୫ । ଯାହାକି ଗଞ୍ଜାମ ଜିଲ୍ଲା ବୁଗୁଡ଼ା ବିଇଓ ଅଫିସରେ ଥିବା ସିନିଅର ଆସିଷ୍ଟାଣ୍ଟଙ୍କୁ ଲେଖାଯାଇଛି । ଗଣଶିକ୍ଷା ବିଭାଗ ଲେଖିଥିବା ଏହି ଚିଠି ନଂକୁ ନକଲ କରିଛି ଘାଟିକିଆରେ ଥିବା ବିବାଦୀୟ ବୈକୁଣ୍ଠଧାମ ସେବାଶ୍ରମ । ଖାଲି ନକଲ କରିନାହାନ୍ତି, ସେହି ଚିଠିକୁ ହାଇକୋର୍ଟରେ ଦାଖଲ ବି କରିଛନ୍ତି । ବାସ୍ତବରେ ସେମିତି କୌଣସି ଚିଠି ଗଣଶିକ୍ଷା ବିଭାଗ ଲେଖିନି । ହାଇକୋର୍ଟ ସହ ସାଙ୍ଘାତିକ କାରସାଦି କରି ନକଲି ଚିଠି ଦାଖଲ କରିଛି ବୈକୁଣ୍ଠଧାମ ସେବାଶ୍ରମ । ଏହା ବଦଳରେ ହାଇକୋର୍ଟରୁ ଉଚ୍ଛେଦ ବିରୋଧରେ ରହିତାଦେଶ ବି ଆଣିଛି ।
ବୈକୁଣ୍ଠଧାମ ସେବାଶ୍ରମ ହାଇକୋର୍ଟରେ ଦାଖଲ କରିଥିବା ଚିଠିକୁ ସ୍କୁଲ ଓ ଗଣଶିକ୍ଷା ବିଭାଗ ଆଦୌ ସାଧାରଣ ପ୍ରଶାସନ ବିଭାଗକୁ ଲେଖିନି। ହେଲେ ନକଲି ଚିଠି ନଂ ପକାଇ ହାଇକୋର୍ଟରେ ଏହାକୁ ଦାଖଲ କରାଯାଇଛି । ଚିଠିକୁ ଅବିକଳ ନକଲ କରି ଏଥିରେ ବିଭାଗର ଲୋଗୋ ଓ ଅଧିକାରୀଙ୍କ ଦସ୍ତଖତ ରଖାଯାଇଛି । ଅଦାଲତଙ୍କୁ ଏଭଳି ବିଭ୍ରାନ୍ତିକର ଚିଠି ଦେଖାଇ ବେଆଇନ ଭାବେ ତିଆରି ଆଶ୍ରମ ବିରୋଧରେ ହୋଇଥିବା ଉଚ୍ଛେଦ ନିଷ୍ପତ୍ତି ଉପରେ ରହିତାଦେଶ ଆଣିଛି । ଖୋଦ୍ ସ୍କୁଲ ଓ ଗଣଶିକ୍ଷା ବିଭାଗର ଜଣେ ବରିଷ୍ଠ ଅଧିକାରୀ ନିଜ ନାମ ଗୋପନ ରଖିବା ସର୍ତ୍ତରେ ବୈକୁଣ୍ଠଧାମ ସେବାଶ୍ରମର ଏହି ଚଞ୍ଚକତାର ପର୍ଦ୍ଦାଫାସ କରିଛନ୍ତି । ହାଇକୋର୍ଟରେ ଦାଖଲ ହୋଇଥିବା ଚିଠିର ସତ୍ୟାସତ୍ୟ ଯାଞ୍ଚ ବେଳେ ଏହି ସତ ପଦାକୁ ଆସିଛି ।
ଘାଟିକିଆ ମୌଜାରେ ବେଆଇନ ଭାବେ ତିଆରି ହୋଇଥିବା ଏହି ଆଶ୍ରମ ଭାଙ୍ଗିବାକୁ ବିଡିଏ କର୍ତ୍ତୃପକ୍ଷ ଗତ ନଭେମ୍ବର ୨୦ ତାରିଖରେ ନିଷ୍ପତ୍ତି ନେଇଥିଲେ । ବିଡିଏ, ଜିଏ, ବିଏମ୍ସି ଓ କମିଶନରେଟ ପୁଲିସର କେନ୍ଦ୍ରୀୟ ଏନ୍ଫୋର୍ସମେଣ୍ଟ କମିଟି ଏହାକୁ ଭାଙ୍ଗିବ ବୋଲି ନିଷ୍ପତ୍ତି ହୋଇଥିଲା । ଏଥିପାଇଁ ଏନ୍ଫୋର୍ସମେଣ୍ଟ ଟିମ୍ ଆଶ୍ରମକୁ ଯାଇ ଜିନିଷପତ୍ର ଖାଲି କରିବାକୁ ମାଇକ୍ ଯୋଗେ ଘୋଷଣା କରିଥିଲା । ବିଡିଏର ଉଚ୍ଛେଦ ନିଷ୍ପତ୍ତିକୁ ଚାଲେଞ୍ଜ କରି ଗତ ୨୦ ତାରିଖରେ ତରବରିଆ ଭାବେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା ବୈକୁଣ୍ଠଧାମ ସେବାଶ୍ରମ ଟ୍ରଷ୍ଟ । ହାଇକୋର୍ଟ ମାମଲାକୁ ଗ୍ରହଣ କରି ରାଜ୍ୟ ସରକାରଙ୍କୁ ନୋଟିସ୍ ଜାରି କରିଥିଲେ । ଏଥିସହ ବୈକୁଣ୍ଠନାଥ ଆଶ୍ରମ ତଥା ଘାଟିକିଆ ମୌଜାର ଖାତା ନଂ ୨୩୩୩ ପ୍ଲଟ୍ ନଂ ୧୨୧୫ ଉପରେ କୌଣସି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବନି ବୋଲି ହାଇକୋର୍ଟ ଅନ୍ତରୀଣ ଆଦେଶ ଦେଇଥିଲେ । ଡିସେମ୍ବର ୧୨ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ ବୋଲି ସମୟ ଧାର୍ଯ୍ୟ ହୋଇଥିଲା ।
ହାଇକୋର୍ଟରେ ଶୁଣାଣି ସମୟରେ ଆଶ୍ରମ ପକ୍ଷରୁ ସ୍କୁଲ ଓ ଗଣଶିକ୍ଷା ବିଭାଗର ଚିଠି ନଂ ୨୧୦୬୫ ଦାଖଲ କରାଯାଇଥିଲା । ସେହି ନିର୍ଦ୍ଦିଷ୍ଟ ଚିଠି ବିଭାଗର ଯୁଗ୍ମସଚିବ ସାଧାରଣ ପ୍ରଶାସନ ବିଭାଗ ଅଧୀନରେ ଥିବା ଇଷ୍ଟେଟ୍ ନିର୍ଦ୍ଦେଶକଙ୍କୁ ଲେଖିଥିଲେ ବୋଲି ଦର୍ଶାଯାଇଛି । ଏଥିରେ ବୈକୁଣ୍ଠଧାମ ସେବାଶ୍ରମ ଟ୍ରଷ୍ଟକୁ ଘାଟିକିଆ ମୌଜାର ଖାତା ନଂ ୨୩୩୩ର ପ୍ଲଟ୍ ନଂ ୧୨୧୫(ପାର୍ଟ) ଜମି ଆବଣ୍ଟନ କରିବାକୁ ସୁପାରିଶ କରାଯାଇଛି । ଡିଭୋସନାଲ ଯୋଗ ସ୍କୁଲ ଏହି ଜମିରେ ସ୍କୁଲ ତିଆରି କରି ପିଲାଙ୍କୁ ପାଠ ପଢ଼ାଇବାକୁ ଚାହୁଁଛି । ଏଥିପାଇଁ ଚିଠିରେ ବୈକୁଣ୍ଠଧାମ ସେବାଶ୍ରମ ଟ୍ରଷ୍ଟ ନାଁରେ ଜମି ଆବଣ୍ଟନ କରିବାକୁ ଇଷ୍ଟେଟ୍ ନିର୍ଦ୍ଦେଶକଙ୍କୁ ସୁପାରିଶ କରାଯାଇଛି ।
ଏହି ଚିଠି ବଳରେ ଆଶ୍ରମ ହାଇକୋର୍ଟରେ ଯୁକ୍ତି କରିଥିଲା ଯେ, ଏହି ସ୍କୁଲ ପିଲାଙ୍କ ପାଠ ପଢ଼ାରେ ବ୍ୟବହାର ହେଉଛି । ଖୋଦ୍ ସ୍କୁଲ ଓ ଗଣଶିକ୍ଷା ବିଭାଗ ଏ ନେଇ ଅବଗତ ଅଛି ଓ ଜାଗା ଦେବାକୁ ସୁପାରିଶ କରିଛି । ହାଇକୋର୍ଟ ମଧ୍ୟ ଏହି ଯୁକ୍ତିକୁ ବିଚାରକୁ ନେବା ସହିତ ଗଣଶିକ୍ଷା ବିଭାଗର ଚିଠି ଆଧାରରେ ଆଶ୍ରମ ଉଚ୍ଛେଦ ଉପରେ ରୋକ୍ ଲଗାଇଛନ୍ତି । କିନ୍ତୁ ଏହି ଚିଠିର ପଛର ସତ ପୂରା ଓଲଟା । ଏଭଳି କୌଣସି ଚିଠି ବିଭାଗ ପକ୍ଷରୁ କରାଯାଇନି । ଯେଉଁ ଚିଠି ନଂ ହାଇକୋର୍ଟରେ ଦାଖଲ ହୋଇଛି ସେହି ଚିଠି ନଂରେ ଗଞ୍ଜାମ ଜିଲ୍ଲା ବୁଗୁଡ଼ା ବିଇଓଙ୍କ ଅଧୀନରେ ଥିବା ସିନିଅର ଆସିଷ୍ଟାଣ୍ଟ ଭାସ୍କର ଚନ୍ଦ୍ର ସାହୁଙ୍କୁ ଚିଠି କରାଯାଇଛି । ଏକ ଘରୋଇ ହସ୍ପିଟାଲରେ ଚିକିତ୍ସା ବାବଦରେ ହୋଇଥିବା ଖର୍ଚ୍ଚ ରାଶିର ଆରସିଏମ କ୍ଲେମ୍ ସମ୍ବନ୍ଧୀୟ ବିଷୟରେ ଶ୍ରୀ ସାହୁଙ୍କୁ ଏହି ନିର୍ଦ୍ଦିଷ୍ଟ ଚିଠି ନଂରେ ସ୍କୁଲ ଓ ଗଣଶିକ୍ଷା ବିଭାଗର ଉପସଚିବ ମହେନ୍ଦ୍ର କୁମାର ପଣ୍ଡା ଗତ ଅଗଷ୍ଟ ମାସ ୨୨ ତାରିଖରେ ଚିଠି କରିଥିଲେ । କିନ୍ତୁ ଏହି ଚିଠି ନଂକୁ ନକଲ କରି ବୈକୁଣ୍ଠଧାମ ସେବାଶ୍ରମ ହାଇକୋର୍ଟରେ ନକଲି ଚିଠି ଦାଖଲ କରିଥିବା ଅଭିଯୋଗ ହୋଇଛି । ଗଣଶିକ୍ଷା ବିଭାଗ ଏହି କାରସାଦିକୁ ଧରିଛି । ଆସନ୍ତା ୧୨ ତାରିଖରେ ପରବର୍ତ୍ତୀ ଶୁଣାଣିରେ ବିଭାଗ ହାଇକୋର୍ଟଙ୍କୁ ଏ ସମ୍ପର୍କରେ ଅବଗତ କରିବ ବୋଲି ସୂଚନା ମିଳିଛି ।
