ନୂଆଦିଲ୍ଲୀ: ଏନସିପି(ଏସପି) ସଭାପତି ଶରଦ ପାୱାରଙ୍କ ସୁରକ୍ଷା ବୃଦ୍ଧି କରିଛନ୍ତି କେନ୍ଦ୍ର ସରକାର । କେନ୍ଦ୍ର ସରକାର ତାଙ୍କୁ ଜେଡ୍‌ ପ୍ଲସ୍ ସୁରକ୍ଷା ଦେଇଛନ୍ତି । ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ୮୩ ବର୍ଷୀୟ ପାଓ୍ବାରଙ୍କୁ ଜେଡ୍‌ ପ୍ଲସ ସୁରକ୍ଷା ଯୋଗାଇ ଦେବାକୁ ସିଆରପିଏଫ୍‌କୁ କେନ୍ଦ୍ର ଗୃହ ମନ୍ତ୍ରାଳୟ ନିର୍ଦ୍ଦେଶ ଦେଇଛି । ସିକ୍ୟୁରିଟି ଲାଗି ସଇଆରପିଏଫର ୫୫ ସଶସ୍ତ୍ର ଯବାନଙ୍କ ଏକ ଟିମ୍‌ ତିଆରି ହୋଇଛି । ଶରଦ ପାଓ୍ବାରଙ୍କ ଜୀବନ ପ୍ରତି ବିପଦ ଥିବା ନେଇ ଆକଳନ କରାଯିବା ପରେ ତାଙ୍କ ପାଇଁ ଜେଡ ପ୍ଲସ୍‌ ସୁରକ୍ଷା ଲାଗି ସୁପାରିଶ ହୋଇଛି ।

 ମହାରାଷ୍ଟ୍ରରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ନିର୍ବାଚନ ତାରିଖ ଏପର୍ଯ୍ୟନ୍ତ ଘୋଷଣା ହୋଇନଥିଲେ ସୁଦ୍ଧା ଅକ୍ଟୋବର କିମ୍ବା ନଭେମ୍ବରରେ ଏଠାରେ ନିର୍ବାଚନ ଅନୁଷ୍ଠିତ ହୋଇପାରେ । ଅକ୍ଟୋବର ୪ରେ ହରିୟାଣା, ଜାମ୍ମୁ କାଶ୍ମୀରର ଫଳାଫଳ ଘୋଷଣା କରାଯିବ । ଏହା ପରେ ମହାରାଷ୍ଟ୍ରରେ ବିଧାନସଭା ନିର୍ବାଚନ ହୋଇପାରେ ।

 କେନ୍ଦ୍ର ତଥା ରାଜ୍ୟ ସରକାର ଦେଶର VVIP ବ୍ୟକ୍ତିଙ୍କୁ ସୁରକ୍ଷା ଯୋଗାଉଛନ୍ତି । ବିପଦର ସ୍ତରକୁ ବିଚାର କରି ଏହା ସ୍ଥିର କରାଯାଉଛି । ଦେଶର ବଡ ନେତା, ବିଚାରପତି, କ୍ରୀଡ଼ାବିତ୍ ଏବଂ ଅଭିନେତାଙ୍କ ପରି VVIP ମାନଙ୍କୁ ସୁରକ୍ଷା ଯୋଗାଇ ଦିଆଯାଉଛି । ତେବେ ସୁରକ୍ଷା ମାମଲାରେ ୟେଲୋ ବୁକ୍‌ ଅନୁସାରେ, ଜେଡ୍‌ ପ୍ଲସ୍‌ କ୍ୟାଟେଗୋରି ସୁରକ୍ଷାରେ ୧୦ ଆର୍ମଡ୍‌ ଷ୍ଟାଟିକ୍‌ ଗାର୍ଡ,୬ ପିଏସଓ, ୨୪ ଯବାନ, ୨ ଏକ୍ସର୍ଟରେ ରାଉଣ୍ଡ ଦି କ୍ଲକ୍‌, ୫ ଓ୍ବାଚର୍ସ ଏବଂ ଜଣେ ଇନ୍ସପେକ୍ଟର ରହିବେ । ଏହା ସହ ୨୪ ଘଣ୍ଟା ୬ ପ୍ରଶିକ୍ଷିତ ଡ୍ରାଇଭର ମୁତୟନ ହେବେ ।