ନୂଆଦିଲ୍ଲୀ,୨୪/୧୨: ଏବେ ଟେଲିକମ ଉପଭୋକ୍ତାଙ୍କ ଲାଗି ସ୍ପାମ୍ କଲ୍ ଏବଂ ମେସେଜ୍ ଚିନ୍ତାଜନକ ହୋଇଛି । ଏହାକୁ ରୋକିବାରେ ଟେଲିକମ୍ କମ୍ପାନିଗୁଡିକୁ ନିର୍ଦ୍ଦେଶ ଦିଆଯାଇଥିଲା । ତେବେ ଏହା ଉପରେ ରୋକ ଲଗାଇବାକୁ ସକ୍ଷମ ହୋଇନାହାନ୍ତି ଦେଶର ବିଭିନ୍ନ ଟେଲିକମ କମ୍ପାନି । ଏହାକୁ ନେଇ ଏବେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି ଭାରତୀୟ ଟେଲିକମ ନିୟାମକ କର୍ତ୍ତୃପକ୍ଷ (ଟ୍ରାଇ) । କମ୍ପାନିଗୁଡିକ ଉପରେ ଲାଗିଛି ୧୪୧ କୋଟିର ଜରିମାନା ।
ଇକୋନୋମିକ ଟାଇମ୍ସ ପକ୍ଷରୁ ଜାରି ଏକ ରିପୋର୍ଟରେ ଏ ନେଇ ଦାବି କରାଯାଇଛି । ୪ ବଡ଼ କମ୍ପାନି ବାଦ ଅନେକ ଛୋଟ ଟେଲିକମ ଅପରେଟରଙ୍କ ଉପରେ ମଧ୍ୟ ଲାଗିଛି ଜରିମାନା । ଟ୍ରାଇ ଟେଲିକମ୍ କମର୍ସିଆଲ କମ୍ୟୁନିକେସନ କଷ୍ଟମର ପ୍ରିଫରେନ୍ସ ରେଗୁଲେସନ (ଟିସିସିସିପିଆର୍) ଅଧିନରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିଛି ।
ସଦ୍ୟତମ ରାଉଣ୍ଡରେ ଏହି କମ୍ପାନିଗୁଡିକ ଉପରେ ୧୨ କୋଟି ଟଙ୍କା ଜରିମାନା ଲାଗିଛି । ପୂର୍ବରୁ ଜରିମାନାଗୁଡିକୁ ମିଶାଇଲେ ଏହା ଅଦ୍ୟାବଧି ମୋଟ ୧୪୧ କୋଟି ଟଙ୍କା ହେବ । ତେବେ କମ୍ପାନିଗୁଡିକ ଏହି ବକେୟା ରାଶି ପଇଠ କରିନାହାନ୍ତି । କମ୍ପାନିଗୁଡିକ ବ୍ୟାଙ୍କ ଗ୍ୟାରେଣ୍ଟିକୁ ନେଇ ପ୍ରଦାନ କରିଥିବା ଅର୍ଥ ମଧ୍ୟରୁ ଏହାକୁ ଅସୁଲ କରିବାକୁ ଟ୍ରାଇ ଟେଲିକମ ବିଭାଗକୁ ଅନୁରୋଧ କରିଛି । ଏ ଦିଗରେ ଟେଲିକମ ବିଭାଗର ନିଷ୍ପତ୍ତି ଆସିବା ବାକି ରହିଛି ।
ଟିସିସିସିପିଆର୍ ୨୦୧୦ରେ ଆସିଥିଲା । ଟେଲିକମ ଉପଭୋକ୍ତାଙ୍କୁ ସ୍ପାମ ମେସେଜ ଏବଂ କଲ୍ରୁ ରୋକିବା ଏହାର ଉଦ୍ଦେଶ୍ୟ ଥିଲା । ତେବେ ଟେଲିକମ ଅପରେଟର ମାନେ କହିଛନ୍ତି, ବିଜ୍ନେସ ଏବଂ ଟେଲି ମାର୍କେଟିଂ କମ୍ପାନିଗୁଡିକ ଯୋଗୁ ସ୍ପାମ ସମସ୍ୟା ଉପୁଜୁଛି । ଟ୍ରାଇର ଏହି ଫାଇନ ଯୁକ୍ତିଯୁକ୍ତ ନୁହେଁ ବୋଲି କହିଛନ୍ତି ଟେଲିକମ୍ କମ୍ପାନି ।
ହ୍ୱାଟସଆପ୍ ଭଳି ଓଟିଟି ସହ ବ୍ୟାଙ୍କ ଓ ଅନ୍ୟ ବିଜନେସ ଉପରେ ମଧ୍ୟ ସ୍ପାମ ନିୟମ ଲାଗୁ ହେଉ ବୋଲି ଟେଲିକମ କମ୍ପାନିଗୁଡିକ କହିଛନ୍ତି। ଏହି ପ୍ଲାଟଫର୍ମଗୁଡିକ ସ୍ପାମ୍ ଟ୍ରାଫିକରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଉଛନ୍ତି । ଏଗୁଡିକୁ ନିୟନ୍ତ୍ରିତ କରିବା ଜରୁରୀ
