ନୂଆଦିଲ୍ଲୀ,୦୧/୦୪: ଦ୍ରୁତ ଭାବେ ବଢ଼ିଛି ସାଇବର ଠକେଇ । ଏହା ଦ୍ୱାରା ଅନେକ ଲୋକ ସମସ୍ୟା ସାମ୍ନା କରୁଛନ୍ତି । ଏହା ଉପରେ ରୋକ ଲଗାଇବା ଲାଗି ଦେଶ ମଧ୍ୟରେ ଡିଜିଟାଲ ଇଣ୍ଡିଆ ଟ୍ରଷ୍ଟ ଏଜେନ୍ସି (ଡିଜିଟା) ଗଠନ ନେଇ ରିଜର୍ଭ ବ୍ୟାଙ୍କ ପରାମର୍ଶ ଦେଇଛି । ଛତୁ ଫୁଟିଲା ଭଳି ବଜାରକୁ ଆସୁଥିବା ଡିଜିଟାଲ ଋଣ ଆପ୍ଗୁଡିକ ବିରୋଧରେ ଏହା ଦ୍ୱାରା କାର୍ଯ୍ୟାନୁଷ୍ଠାନ ନିଆଯାଇପାରିବ ବୋଲି କହିଛି କେନ୍ଦ୍ରୀୟ ବ୍ୟାଙ୍କ ।
ପ୍ରସ୍ତାବିତ ଏଜେନ୍ସି ଡିଜିଟାଲ ଲେଣ୍ଡିଂ ଆପ୍ ଗୁଡିକର ଯାଞ୍ଚ କରିବା ସହ ଯାଞ୍ଚ ହୋଇଥିବା ଆପ୍ ଗୁଡିକ ସମ୍ପର୍କରେ ଏକ ପବ୍ଲିକ ରେଜିଷ୍ଟ୍ରାର ମଧ୍ୟ ପରିଚାଳନା କରିବ । ଡିଜିଟାର ଯାଞ୍ଚ ହୋଇଥିବା ପ୍ରମାଣପତ୍ର ନ ଥିଲେ ଆପ୍ଗୁଡିକୁ ନିଷିଦ୍ଧ ଘୋଷଣା କରାଯିବ । ଆଇନଗତ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯାଇପାରିବ ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି । ଆର୍ôଥକ ଠକେଇ ବିରୋଧରେ ଲଢ଼େଇ କରିବାରେ ଏହା ଏକ ପ୍ରମୁଖ ପଦକ୍ଷେପ ହେବ । ଯାଞ୍ଚ ପ୍ରକ୍ରିୟା ଦ୍ୱାରା ଡିଜିଟାଲ ଋଣ କ୍ଷେତ୍ରରେ ସ୍ୱଚ୍ଛତା ଓ ଉତ୍ତରଦାୟିତ୍ୱ ଆଣିବାରେ ମଧ୍ୟ ଏହା ସହାୟକ ହେବ । ଏଭଳି ବେଆଇନ କାର୍ଯ୍ୟରେ ଲିପ୍ତ ଥିବା ୪୪୨ ଆପ୍ ସମ୍ପର୍କରେ ରିଜର୍ଭ ବ୍ୟାଙ୍କ କେନ୍ଦ୍ର ଇଲେକଟ୍ରୋନିକ୍ସ ଓ ଆଇଟି ମନ୍ତ୍ରଣାଳୟକୁ ଏକ ରିପୋର୍ଟରେ ଦେଇଛି ।
୨୦୨୨ ସେପ୍ଟେମ୍ବରରୁ ୨୦୨୩ ଅଗଷ୍ଟ ମଧ୍ୟରେ ବେଆଇନ କାର୍ଯ୍ୟକଳାପରେ ଲିପ୍ତ ଥିବା ୨୨୦୦ରୁ ଉଦ୍ଧ୍ୱର୍ ଡିଜିଟାଲ ଋଣ ଆପ୍ ବିରୋଧରେ ଗୁଗଲ କଡା କାର୍ଯ୍ୟାନୁଷ୍ଠାନ ନେବା ସହ ନିଜ ପ୍ଲାଟଫର୍ମରୁ ହଟାଇ ଦେଇଛି । ଋଣ ଆପ୍ ଗୁଡିକର ଅନୁପାଳନ କ୍ଷେତ୍ରରେ ମଧ୍ୟ ନିୟମ ପରିବର୍ତ୍ତନ କରିଛି ଗୁଗଲ । ଆର୍ବିଆଇ ନିୟମ ଅନୁପାଳନ କରିଥିବା ଆପ୍ ଗୁଡିକୁ ନିଜ ପ୍ଲେଷ୍ଟୋରରେ ସ୍ଥାନିତ କରିଛି ଗୁଗଲ । ରିଜର୍ଭ ବ୍ୟାଙ୍କ ଏବଂ ଆର୍ôଥକ ସେବା ବିଭାଗର ଅନୁରୋଧ ପରେ ଗୁଗଲ କଡା ପଦକ୍ଷେପ ଗ୍ରହଣ କରିଛି ।
