ଭୁବନେଶ୍ୱର, ୦୬/୧୧ : ୧୦ରୁ ଆରମ୍ଭ ହେବ ଅନ୍ତର୍ଜାତୀୟ ଶ୍ରୀ ଅନ୍ନ ଓ ବିସ୍ମୃତ ଖାଦ୍ୟ ସମ୍ମିଳନୀ । ଏଥିରେ ଶ୍ରୀ ଅନ୍ନ ବା ମିଲେଟ୍ ଚାଷ ସହ ହଜିଯାଉଥିବା ପାରମ୍ପରିକ ଖାଦ୍ୟ ଉପରେ ମାନସମନ୍ଥନ ହେବ । ଉପମୁଖ୍ୟମନ୍ତ୍ରୀ ତଥା କୃଷି ମନ୍ତ୍ରୀ କନକବର୍ଦ୍ଧନ ସିଂହଦେଓ ମଙ୍ଗଳବାର ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି । ନୁଡୁଲ୍ସ୍ ଓ ବଜାରରେ ମିଳୁଥିବା ଚଟ୍ପଟି ଖାଦ୍ୟ ଛାଡ଼ି ପାରମ୍ପରିକ ଓ ଋତୁଜାତୀୟ ଖାଦ୍ୟ ଖାଇବାକୁ ସେ ପରାମର୍ଶ ଦେଇଛନ୍ତି ।
୧୦ ଓ ୧୧ ଦୁଇ ଦିନ ଏହି ସମ୍ମିଳନୀ ଚାଲିବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କାର୍ଯ୍ୟକ୍ରମକୁ ଉଦ୍ଘାଟନ କରିବେ । ନୀତି ଆୟୋଗର ସଦସ୍ୟ ପ୍ରଫେସର ରମେଶ ଚାନ୍ଦ ଓ ଏମ୍ଏସ୍ ସ୍ୱାମୀନାଥନ ରିସର୍ଚ୍ଚ ଫାଉଣ୍ଡେସନର ଅଧ୍ୟକ୍ଷା ସୌମ୍ୟା ସ୍ୱାମୀନାଥନଙ୍କ ଭଳି ବ୍ୟକ୍ତିତ୍ୱ ଏହି ସମ୍ମିଳନୀରେ ସାମିଲ ହେବେ । ଚାଷୀଙ୍କ ଠାରୁ ନେଇ ଏସ୍ଏଚ୍ଜି ସଦସ୍ୟା, ଉଦ୍ୟୋଗୀ, ଗବେଷକ, ହୋଟେଲ ସଂଘ, ଜାତୀୟ ଓ ଅନ୍ତର୍ଜାତୀୟ ଖ୍ୟାତନାମା ସଂସ୍ଥା, ଜଣାଶୁଣା ସେଫ୍ ଓ ବ୍ଲଗର ଏକାଠି ହେବେ । ସମ୍ମିଳନୀରେ "ଓଡ଼ିଶାର ଶ୍ରୀ ଅନ୍ନ ଓ କୃଷି ଐତିହ୍ୟ' ଶୀର୍ଷକ ବିଷୟବସ୍ତୁ ଉପରେ ଆଲୋଚନା ହେବ । ପୁଣି ବିଭିନ୍ନ ଅଧିବେଶନରେ ଭିନ୍ନ ଭିନ୍ନ ବିଷୟବସ୍ତୁକୁ ନେଇ ଆଲୋଚନା ଚାଲିବ । ଆଲୋଚନାର ନିଷ୍କର୍ସକୁ ନେଇ ବିସ୍ତୃତ ରୋଡ୍ମ୍ୟାପ୍ ପ୍ରସ୍ତୁତ ହେବ । ଶ୍ରୀ ଅନ୍ନ ଏବଂ ବିସ୍ମୃତ ଖାଦ୍ୟକୁ ଯେଭଳି ପୁଣି ପ୍ରାଥମିକତା ମିଳିବ ତାହା ରହିବ ।
କୃଷି ଭବନରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଉପମୁଖ୍ୟମନ୍ତ୍ରୀ ଶ୍ରୀ ସିଂହଦେଓ କହିଛନ୍ତି, ପ୍ରଧାନମନ୍ତ୍ରୀ ଉଜ୍ଜ୍ୱଳା ଗ୍ୟାସକୁ ନେଇ ହୋଇଥିବା ମନ୍ କୀ ବାତ୍ରେ ଆମ ରାଜ୍ୟର ଜଣେ ଆଦିବାସୀ ମହିଳାଙ୍କ ସହ କଥା ହୋଇଥିଲେ । ଗ୍ୟାସ୍ରେ କ’ଣ ରୋଷେଇ କରିବେ ବୋଲି ପଚାରିଥିଲେ । ମହିଳା କହିଥିଲେ, ମୁଁ ନୂଆ ଗ୍ୟାସରେ ନୁଡୁଲ୍ସ୍ ତିଆରି କରିବି । ଆମେ ଆମ ପାରମ୍ପରିକ ଖାଦ୍ୟକୁ ଅଧିକ ପ୍ରଚାରପ୍ରସାର କରିବାକୁ ସେ ଏହି ଅବସରରେ ପରାମର୍ଶ ଦେଇଥିଲେ । ବିଦେଶରୁ କୌଣସି ଅତିଥି ଆସିଲେ ଆମେ ତାଙ୍କ ଦେଶର ଖାଦ୍ୟ ବଦଳରେ ଆମ ପାରମ୍ପରିକ ଖାଦ୍ୟ ପରଷିଲେ ଏହାକୁ ଅଧିକ ପ୍ରୋତ୍ସାହନ ମିଳିବ ବୋଲି ସେ କହିଥିଲେ ।
ସେ ପୁଣି କହିଥିଲେ, ଆମ ପାରମ୍ପରିକ ଖାଦ୍ୟ ଅଧିକ ସୁସ୍ଥକର ଓ ସ୍ୱାଦିଷ୍ଟ । ମାଟି ହାଣ୍ଡିରେ ରାନ୍ଧିଲେ ଖାଦ୍ୟର ପୌଷ୍ଟିକ ମାତ୍ରା ବଢ଼େ । ଜଗନ୍ନାଥଙ୍କ ପାଇଁ ହେଉଥିବା ପ୍ରସାଦ ସବୁ ମାଟି ହାଣ୍ଡିରେ ପ୍ରସ୍ତୁତ କରାଯାଏ । ପାରମ୍ପରିକ ଖାଦ୍ୟ ଓ ରୋଷେଇ ଶୈଳୀକୁ ନ ଭୁଲିବାକୁ ଆମକୁ ଲୋକଙ୍କୁ ବୁଝାଇବାକୁ ପଡ଼ିବ । ରୋଷେଇ ବେଳେ ଏହାର ପୌଷ୍ଟିକ ମାତ୍ରା ଯେଭଳି ନ କମିବ ସେଥିପାଇଁ ଲୋକଙ୍କୁ ସଚେତନ କରିବାକୁ ପଡ଼ିବ । ଆଦିବାସୀମାନେ ଏବେ ବି ପାରମ୍ପରିକ ଖାଦ୍ୟକୁ ବଞ୍ଚାଇ ରଖିଛନ୍ତି । ଆମେ କଂକ୍ରିଟ୍ ସହରରେ ରହି ଏହାକୁ ଭୁଲିଯାଉଛେ ବୋଲି ସେ କହିଛନ୍ତି ।
କୃଷି ଓ କୃଷକ କଲ୍ୟାଣ ବିଭାଗ ସଚିବ ଅରବିନ୍ଦ ପାଢ଼ୀ କହିଛନ୍ତି, ଏହି ସମ୍ମିଳନୀରେ ଶ୍ରୀ ଅନ୍ନ ଓ ବିଲୁପ୍ତପ୍ରାୟ ଫସଲ ଚାଷ, ଏହାର ପ୍ରକ୍ରିୟାକରଣ ଓ ପ୍ରୋତ୍ସାହନ ଆଧାରିତ ବିଭିନ୍ନ ବିଷୟବସ୍ତୁକୁ ନେଇ ୧୧ଟି ଅଧିବେଶନ ହେବ । ଶ୍ରୀ ଅନ୍ନ ଓ ବିଲୁପ୍ତପ୍ରାୟ ଫସଲର ପ୍ରକ୍ରିୟାକରଣ ଓ ଜୈବିକ ଚାଷ ପଦ୍ଧତି, ବିସ୍ମୃତ ଖାଦ୍ୟ, କଳା ଓ ରନ୍ଧନ ପ୍ରଣାଳୀ ଓ ଏହାର ଐତିହ୍ୟ ଉପରେ ଚର୍ଚ୍ଚା ହେବ । ଚାଷୀଙ୍କ ଶ୍ରୀଅନ୍ନକୁ ବଜାର ସହ ଯୋଡ଼ିବାକୁ ଆମେ ପ୍ରୟାସ କରୁଛୁ । ମାଣ୍ଡିଆକୁ ଏମ୍ଏସ୍ପି ଦେଇ କିଣୁଛୁ । ଓଡ଼ିଶା କୃଷି ଐତିହ୍ୟର ହବ୍ ବୋଲି ସେ କହିଛନ୍ତି । କୃଷି ନିର୍ଦ୍ଦେଶକ ପ୍ରେମଚନ୍ଦ୍ର ଚୌଧୁରୀ ଓ ଉଦ୍ୟାନ କୃଷି ନିର୍ଦ୍ଦେଶକ ନିଖିଲ ପବନ କଲ୍ୟାଣ ଉପସ୍ଥିତ ଥିଲେ ।
