ଭୁବନେଶ୍ୱର,୧୯/୦୪: ବଡ଼ଗଡ଼ ଅଞ୍ଚଳରେ ଜଣେ ଗଣମାଧ୍ୟମ ପ୍ରତିନିଧିଙ୍କୁ ପଥରରେ ଛେଚି ରକ୍ତାକ୍ତ କରିଛନ୍ତି ଅସାମାଜିକ । ଆକ୍ରମଣର ଶିକାର ହେଇଛନ୍ତି ସରୋଜ ଜେନା । 

ସେ ରାତି ପ୍ରାୟ  ସାଢେ ୧୨ଟା ବେଳେ ରସୁଲଗଡ଼ ଶିଳ୍ପାଞ୍ଚଳସ୍ଥିତ  କାର୍ଯ୍ୟାଳୟରୁ କାମ ସାରି ଘରକୁ ଫେରୁଥିଲେ ।  ବଡ଼ଗଡ଼ ଏସ୍‌ବିଆଇ ଏଟିଏମ ନିକଟରେ ସେ  ଚାଲିକରି ରୁମ୍‌କୁ ଯାଉଥିବା ବେଳେ ୩ ଜଣ  ଦୁର୍ବୃତ୍ତ ସ୍କୁଟି (ଓଡି୦୨ଟି ୨୫୦୯)ରେ ଆସି  ତାଙ୍କୁ ଧକ୍କା ଦେଲେ । ସରୋଜ ଏହାକୁ ବିରୋଧ  କରିଥିଲେ । ୩ଜଣ ଦୁର୍ବୃତ୍ତ ସ୍କୁଟି ଅଟକାଇ ତାଙ୍କ  ଉପରେ ସଂଘବଦ୍ଧ ଆକ୍ରମଣ କରିବାକୁ ଲାଗିଲେ ।  ସରୋଜ ଭୟରେ ଦୌଡ଼ି ପଳାଇବାକୁ ଚେଷ୍ଟା  କରୁଥିବା ବେଳେ ୩ଜଣ ତାଙ୍କୁ ପିଛା କରି  ଅଟକାଇଲେ । ଅଶ୍ରାବ୍ୟ ଭାଷାରେ ଗାଳି କରିବା  ସହ ତାଙ୍କ ମୁଣ୍ଡକୁ ଏକ ପଥରରେ ଛେଚି ଜୀବନରୁ  ମାରିଦେବାକୁ ଚେଷ୍ଟା କରିଥିଲେ । ସରୋଜ ଅଚେତ  ହୋଇଯିବା ଦେଖି ସେମାନେ ଘଟଣାସ୍ଥଳରୁ ଖସି  ପଳାଇଥିଲେ । ସେହି ରାସ୍ତାରେ ପାଟ୍ରୋଲିଂ କରୁଥିବା  ଏକ ପିସିଆର ଭ୍ୟାନ୍‌ ଘଟଣାସ୍ଥଳରେ ଅଟକି  ତାଙ୍କୁ ଉଦ୍ଧାର କରିଥିଲା । କ୍ୟାପିଟାଲ ହସ୍ପିଟାଲରେ  ସରୋଜଙ୍କ ଚିକିତ୍ସା ଚାଲିଛି । ବଡ଼ଗଡ଼ ଥାନା ପୁଲିସ  ଘଟଣାସ୍ଥଳରେ ପହଞ୍ଚି ତନାଘନା ଚଳାଇଛି ।