ବାରିପଦା, ୧୫/୧୧ : ଶିମିଳିପାଳକୁ ମହାରାଷ୍ଟ୍ରରୁ ଆସିଛି ଦ୍ୱିତୀୟ ବାଘୁଣୀ ‘ଗଙ୍ଗା’ । ପ୍ରଥମ ବାଘୁଣୀ ‘ଯମୁନା’କୁ ଅଣାଯିବାର କିଛିଦିନ ବ୍ୟବଧାନରେ ମହାରାଷ୍ଟ୍ରରୁ ତଡ଼ବା ଅନ୍ଧାରୀ ବ୍ୟାଘ୍ର ପ୍ରକଳ୍ପରୁ ବାଘୁଣୀ ଅଣାଯାଇଛି । ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ କ୍ଷେତ୍ର ନିର୍ଦ୍ଦେଶକ ତଥା ଆଞ୍ଚଳିକ ମୁଖ୍ୟ ବନ୍ୟପ୍ରାଣୀ ସଂରକ୍ଷକ ଡ. ପ୍ରକାଶ ଚାନ୍ଦ ଗୋଗିନେନିଙ୍କ ନେତୃତ୍ୱରେ ବନ ବିଭାଗର ସ୍ୱତନ୍ତ୍ର ଟିମ୍ ବାଘୁଣୀକୁ ନେଇ ଆସିଛନ୍ତି ।
ମହାରାଷ୍ଟ୍ରରୁ ଦ୍ୱିତୀୟ ବାଘୁଣୀକୁ ଆଣି ଶିମିଳିପାଳରେ ଛାଡ଼ିବା ପାଇଁ ପୂର୍ବରୁ ନିଷ୍ପତ୍ତି ହୋଇଥିଲା । ମହାରାଷ୍ଟ୍ର ତଡୋବା ଅଭୟାରଣ୍ୟରୁ ବାଘୁଣୀକୁ ଚୟନ କରାଯାଇଥିଲା । ସ୍ୱାସ୍ଥ୍ୟଯାଞ୍ଚ ଏବଂ ଅନ୍ୟ ସମସ୍ତ ପ୍ରକ୍ରିୟା ଶେଷ ପରେ ସ୍ୱତନ୍ତ୍ର ଗାଡ଼ିରେ ସଡ଼କପଥରେ ‘ଗଙ୍ଗା’କୁ ଅଣାଯାଇଛି । ବାଘୁଣୀକୁ ପ୍ରଥମେ ଏନ୍କ୍ଲୋଜରରେ ରଖାଯିବ । ଜଙ୍ଗଲୀ ପରିବେଶ ସହ ଖାପଖାଇବା ପରେ ବା ଶିକାର କରିବାର କିଛିଦିନ ମଧ୍ୟରେ ତାକୁ କୋର୍ ଅଞ୍ଚଳରେ ଛଡ଼ାଯିବ ବୋଲି ସୂଚନା ଦେଇଛନ୍ତି ପିସିସିଏଫ୍ ସୁଶାନ୍ତ ନନ୍ଦ । ସୂଚନାଯୋଗ୍ୟ, ଗତ ଅକ୍ଟୋବର ୨୭ରେ ଶିମିଳିପାଳରେ ବାଘୁଣୀ ‘ଯମୁନା’ ପହଞ୍ଚିଥିଲା । ସ୍ୱତନ୍ତ୍ର ଏନ୍କ୍ଲୋଜରରେ ରଖାଯିବା ପରେ ନିକଟରେ ତାକୁ କୋର୍ ଅଞ୍ଚଳରେ ଛଡା ଯାଇଛି । ‘ଗଙ୍ଗା’ କ୍ଷେତ୍ରରେ ଅନୁରୂପ ପ୍ରକ୍ରିୟା ପାଳନ କରାଯିବ । ଦୁଇ ବାଘୁଣୀଙ୍କ ଗତିବିଧି ଉପରେ ନଜର ରଖାଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି ।
