ଭୁବନେଶ୍ଵର, ୧୩/୦୪ : ଦକ୍ଷିଣ ଭାରତ ବାସିନ୍ଦା ରାଜଲକ୍ଷ୍ମୀ ନିଆରା ଢଙ୍ଗରେ ନିର୍ବାଚନ ପ୍ରଚାର କରୁଛନ୍ତି । ଏଥିପାଇଁ ସେ ବୁଲେଟ୍ରେ ଯାତ୍ରା କରୁଛନ୍ତି । ଦେଶବାସୀଙ୍କୁ ଭୋଟ୍ ଦେବା ପାଇଁ ପ୍ରୋତ୍ସାହିତ କରିବା ଲାଗି ବୁଲେଟ୍ରେ ୨୧ ହଜାର କିମି ଯାତ୍ରା ଅଭିଯାନରେ ସେ ବାହାରିଛନ୍ତି । ଅଦ୍ୟାବଧି ସେ ୧୮ ହଜାର କିମିରୁ ଅଧିକ ଯାତ୍ରା କରିସାରିଛନ୍ତି । ଦିଲ୍ଲୀରେ ପହଞ୍ଚି ଯାତ୍ରା ଶେଷ କରିବେ ।
ରାଜଲକ୍ଷ୍ମୀ ପ୍ରଧାନମନ୍ତ୍ରୀ ମୋଦିଙ୍କର ଜଣେ ବହୁତ ବଡ଼ ପ୍ରଶଂସକ । ମୋଦିଙ୍କୁ ୩ୟ ଥର ପ୍ରଧାନମନ୍ତ୍ରୀ କରିବାକୁ ସେ ‘ଭୋଟ୍ ଫର୍ ନେସନ୍, ଭୋଟ୍ ଫର୍ ମୋଦି’ ସ୍ଲୋଗାନ୍ ସହିତ ଏହି ଯାତ୍ରାରେ ବାହାରିଛନ୍ତି । ସେ କହିଛନ୍ତି, ୨୦୧୯ ମସିହାରେ ବାଇକ୍ ଯାତ୍ରା କରି ସେ ମୋଦିଙ୍କୁ ଭେଟିଥିଲେ । ଏହି ସମୟରେ ମୋଦି ୨ଟି ପ୍ରଶ୍ନ ପଚାରିଥିଲେ । ଜନତା କ’ଣ ଭାବୁଛନ୍ତି ଓ ଜନତାଙ୍କର କ’ଣ ଆବଶ୍ୟକ? ଏହା ପରେ ସେ ବୁଲେଟ୍ ଯାତ୍ରା ଆରମ୍ଭ କଲେ । ରାଜଲକ୍ଷ୍ମୀ କହନ୍ତି ‘ଧାରା ୩୭୦ ଉଚ୍ଛେଦ ପରେ ମୁଁ ତାମିଲନାଡୁରୁ ଯାତ୍ରା ଆରମ୍ଭ କରି ଆନ୍ଧ୍ରପ୍ରଦେଶ, କର୍ଣ୍ଣାଟକ, ତେଲଙ୍ଗାନା, ଓଡ଼ିଶା, ଝାଡ଼ଖଣ୍ଡ ଓ ବିହାର ଯାତ୍ରା କରିଛି । ଏବେ ଉତ୍ତରପ୍ରଦେଶର କାନପୁରରେ ପହଞ୍ଚିଛି । ଏଠାରୁ ମୋ ଯାତ୍ରାର ଶେଷ ପର୍ଯ୍ୟାୟ କାନପୁରରେ ଶେଷ ହେବ ।’ ସେ ଦିନକୁ ପ୍ରାୟ ୩୦୦ କିମି ଯାତ୍ରା କରୁଛନ୍ତି । ରାଜଲକ୍ଷ୍ମୀ କହିଛନ୍ତି, ଅଣ୍ଟାରେ ବେଲ୍ଟ ବାନ୍ଧି ସାଢ଼େ ୯ ଟନ୍ ଓଜନର ଟ୍ରକ୍ ଟାଣିଥିବା ଭାରତର ସେ ପ୍ରଥମ ମହିଳା । ସେଥିପାଇଁ ଗିନିଜ୍ ବିଶ୍ୱ ରେକର୍ଡସ୍ରେ ତାଙ୍କ ନାଁ ସ୍ଥାନ ପାଇଥିଲା । ନାରୀ ସଶକ୍ତୀକରଣ ପାଇଁ ମଧ୍ୟ ସେ କାମ କରିଛନ୍ତି ।