ଭୋଗରାଇ, ୦୯/୦୨ : ଓଡିଶା-ପଶ୍ଚିମବଙ୍ଗ ସୀମାନ୍ତ ଦୀଘା ସମୁଦ୍ର କୂଳରୁ ବିରଳ‌ ପ୍ରଜାତିର ଏକ ବିଶାଳକାୟ ମୃତ କଇଁଛ ଉଦ୍ଧାର ହୋଇଛି। ଏହି କଇଁଛର ଆନୁମାନିକ ଓଜନ ୧ କୁଇଣ୍ଟାଲ ହେବ ବୋଲି ପଶ୍ଚିମବଙ୍ଗ ବନବିଭାଗ ସୂଚନା ଦେଇଛି।

ଗୁରୁବାର ସକାଳେ କିଛି ପର୍ଯ୍ୟଟକ ସମୁଦ୍ର କୂଳରେ ବୁଲୁଥିବା ବେଳେ ଏହି ମୃତ କଇଁଛଟିକୁ ଦେଖିବାକୁ ପାଇଥିଲେ। ସମୁଦ୍ର ଜୁଆରରେ ଭାସି ଆସି କୂଳରେ ଲାଗିଥିବା ଏହି ବିଶାଳକାୟ ମୃତ କଇଁଛଟିକୁ ଦେଖିବା ପାଇଁ ପର୍ଯ୍ୟଟକଙ୍କ ଗହଳି ଲାଗିଥିଲା। ଖବର ପାଇ ସ୍ଥାନୀୟ ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ମୃତ କଇଁଛଟିକୁ ଉଦ୍ଧାର କରି ଝାଉଁ ଜଙ୍ଗଲ ଭିତରେ ମାଟିରେ ପୋତି ଦେଇଥିବା ଜଣାପଡିଛି। ଏହା ଏକ ବିରଳ ପ୍ରଜାତି କଇଁଛ ହୋଇଥିବା ବେଳେ ଏହାର ମୃତ୍ୟୁର‌ କାରଣ ଅସ୍ପଷ୍ଟ ରହିଛି। ତେବେ ବିଗତ କିଛି ମାସ ହେଲା ଏଭଳି ଛୋଟ ବଡ଼ ବହୁ ସଂଖ୍ୟକ ମୃତ କଇଁଛ ସମୁଦ୍ର ଜୁଆରରେ ଭାସି ଆସି କୂଳରେ ଲାଗୁଥିବା ନେଇ ବନବିଭାଗ କର୍ମଚାରୀମାନେ ସୂଚନା ଦେଇଛନ୍ତି।