ଲଣ୍ଡନ ୦୭/ ୦୬: ବିଶ୍ବ ଟେଷ୍ଟ ଚାମ୍ପିୟନସିପ୍ ଫାଇନାଲର ପ୍ରଥମ ଦିନ ରୋମାଞ୍ଚ ଭରା ରହିଥିଲା । ପ୍ରଥମରୁ ଭାରତ ଦମଦାର ପ୍ରଦର୍ଶନ କରିଥିବା ବେଳେ ଷ୍ଟିଭ୍ ସ୍ମିଥ ଓ ଟ୍ରେଭିସ୍ ହେଡ୍ ଙ୍କ ଦମଦାର ବ୍ୟାଟିଂ ଫଳରେ ପୁଣି ମଜବୁତ ସ୍ଥିତିକୁ ଫେରିଛି କଙ୍ଗାରୁ ଟିମ୍ । ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ଟିମ୍ ଇଣ୍ଡିଆ । ପ୍ରଥମ ଦିନ ଖେଳ ଶେଷ ସୁଦ୍ଧା ୩ ଓ୍ବିକେଟ୍ ହରାଇ ଅଷ୍ଟ୍ରେଲିଆ ସଂଗ୍ରହ କରିଛି ୩୨୭ ରନ । ଦଳ ପକ୍ଷରୁ ଉସମାନ ଖାଓ୍ବାଜା ଖାତା ଖୋଲିବା ପୂର୍ବରୁ ଆଉଟ ହୋଇଥିବା ବେଳେ ଡେଭିଡ ଓ୍ବାର୍ଣ୍ଣର କିଛି ସମୟ କ୍ରିଜ୍ରେ ରହିଥିଲେ । ଓ୍ବାର୍ଣ୍ଣର ବ୍ୟକ୍ତିଗତ ଭାବେ ୪୩ ରନ କରି ଆଉଟ ହୋଇଥିବା ବେଳେ ମାର୍ନସ୍ ଲାବୁସେନ ୨୬ ରନ କରି ଆଉଟ ହୋଇଥିଲେ ।
ଅଷ୍ଟ୍ରେଲିଆ ଟିମ୍ ୭୬ ରନରେ ୩ଟି ଓ୍ବିକେଟ ହରାଇଥିବା ବେଳେ ଷ୍ଟିଭ୍ ସ୍ମିଥ୍ ଓ ଟ୍ରେଭିସ୍ ହେଡ୍ ଦମଦାର ଇନିଂସ ଖେଳିଛନ୍ତି । ସ୍ମିଥ ୧୪ଟି ଚୌକା ସହ ୯୫ ରନ କରି ଅପରାଜିତ ଥିବା ବେଳେ ଟ୍ରେଭିସ୍ ହେଡ୍ ୧୫୬ ବଲ ଖେଳି ୨୨ଟି ଚୌକା ଓ ଗୋଟିଏ ଛକା ସହାୟତାରେ ୧୪୬ ରନ କରି ନଟଆଉଟ୍ ଅଛନ୍ତି ।
WTC ଫାଇନାଲ: ଲଞ୍ଚ ବ୍ରେକ୍ ସୁଦ୍ଧା ଅଷ୍ଟ୍ରେଲିଆ ୭୩/ ୨, ସିରାଜ ଓ ଶାର୍ଦ୍ଦୁଲଙ୍କୁ ସଫଳତା
ଭାରତ ପକ୍ଷରୁ ମହମ୍ମଦ ସାମି ୨୦ ଓଭରରେ ୭୭ ରନ ଦେଇ ଗୋଟିଏ ଓ୍ବିକେଟ ନେଇଥିବା ବେଳେ ମହମ୍ମଦ ସିରାଜ ୧୯ ଓଭରରେ ୬୭ ରନ ଦେଇ ଗୋଟିଏ ଓ୍ବିକେଟ ନେଇଛନ୍ତି । ଉମେଶ ଯାଦବ ୧୪ ଓଭରରେ ୫୪ ରନ, ରବିନ୍ଦ୍ର ଜାଡେଜା ୧୪ ଓଭରରେ ୪୮ ରନ ଓ ଶାର୍ଦ୍ଦୁଲ ଠାକୁର ୧୮ ଓଭରରେ ୭୫ ରନ ଦେଇ ଗୋଟିଏ ଓ୍ବିକେଟ ନେଇଛନ୍ତି ।
