ଓ୍ବାଶିଂଟନ: ହ୍ବାଟ୍ସଆପ ରାତିରେ ୟୁଜର୍ସଙ୍କ ଡାଟା ଚୋରି କରୁଛି । ୟୁଜର୍ସଙ୍କୁ ଗ୍ରାହକ ନୁହେଁ ବରଂ ଏକ ଉତ୍ପାଦ ଭଳି ଦେଖୁଛି ମେଟାର ସ୍ବାମୀତ୍ବ ଥିବା ଇନଷ୍ଟାଣ୍ଟ ମେସେଜିଂ ଆପ୍ ହ୍ବାଟ୍ସଆପ୍ । ଏକଥା ଆମେ କହୁନାହୁଁ ବରଂ ସମଗ୍ର ବିଶ୍ବର ଅନ୍ୟତମ ଧନୀ ଏବଂ ମାଇକ୍ରୋବ୍ଲଗିଂ ସାଇଟ୍ ଟ୍ବିଟର (ଏକ୍ସ)ର ମୁଖ୍ୟ ଏଲନ ମସ୍କ ଏହା କହିଛନ୍ତି । ହ୍ବାଟ୍ସଆପ୍ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି ମସ୍କ । ଏକ୍ସରେ ହ୍ବାଟ୍ସଆପ୍କୁ ନେଇ ମସ୍କ କରିଥିବା ପୋଷ୍ଟ ଏବେ ହ୍ବାଟ୍ସଆପ୍ ୟୁଜର୍ସଙ୍କ ଚିନ୍ତା ବଢ଼ାଇ ଦେଇଛି ।
ହ୍ବାଟ୍ସଆପ୍କୁ ଆଉ ଥରେ ଟାର୍ଗେଟ କରିବା ସହ ଏହାର ୟୁଜର୍ସଙ୍କ ସେଫ୍ଟି ଏବଂ ସିକ୍ୟୁରିଟି ସଂପର୍କରେ କହିଛନ୍ତି । ପ୍ରତିଦିନ ରାତିରେ ହ୍ବାଟ୍ସଆପ୍ ୟୁଜର୍ସଙ୍କ ଡାଟା ଏକ୍ସପୋର୍ଟ କରୁଛି । ହେଲେ କେତେକ ୟୁଜର୍ସ ଭାବୁଛନ୍ତି ହ୍ବାଟ୍ସଆପ୍ ସୁରକ୍ଷିତ । ଏଲନ ମସ୍କ କହିଛନ୍ତି ଯେ, ଚୋରି ହେଉଥିବା ଡାଟାକୁ ନିର୍ଦ୍ଦିଷ୍ଟ ବିଜ୍ଞାପନ ଲାଗି ବ୍ୟବହାର କରାଯାଉଛି । ଏହି ଭଳି ଭାବରେ କମ୍ପାନି ୟୁଜର୍ସଙ୍କୁ ଜଣେ ଗ୍ରାହକଙ୍କ ଭାବେ ନଦେଖି ପ୍ରଡକ୍ଟ ବା ଉତ୍ପାଦ ବୋଲି ଭାବୁଛି ।
ସେପଟେ ମସ୍କଙ୍କ ଏଭଳି ଅଭିଯୋଗ ଉପରେ ମେଟା ପକ୍ଷରୁ କୌଣସି ଟିପ୍ପଣୀ ଦିଆଯାଇ ନାହିଁ । ତେବେ ହ୍ବାଟ୍ସଆପ୍ ଉପରେ ଏହା ମସ୍କଙ୍କ ପ୍ରଥମ ଅଭିଯୋଗ ନୁହେଁ । ଏହା ପୂର୍ବରୁ ବିଜ୍ଞାପନକୁ ନେଇ ମେଟାକୁ ଟାର୍ଗେଟ କରିଥିଲେ ଏଲନ ମସ୍କ । ଟ୍ବିଟର ମୁଖ୍ୟ ଏଲନ ମସ୍କ ଏବଂ ମେଟା ମୁଖ୍ୟ ମାର୍କ ଜୁକରବର୍ଗଙ୍କ ମଧ୍ୟ ବିବାଦ ବହୁ ପୁରୁଣା ।
