ସମ୍ବଲପୁର,୧୯/୦୯: ସବୁଠି ଖୁଁ  ଖୁଁ... । ରାସ୍ତାଘାଟ, ଘର,  କାର୍ଯ୍ୟାଳୟ, ବଜାର... । ସବୁଠି ସମନା ସ୍ଥିତି । କିଏ କଡେଇ ହୋଇ ଛିଙ୍କି ଦେଉଛି ତ ଆଉ କିଏ  ପାଟିରେ ରୁମାଲ୍‌ ରଖି କାଶି ଦେଉଛି । ଘରେ ଘରେ ଥଣ୍ଡା,  ଜ୍ୱରରେ ଲୋକ ପେଶି ହେଉଛନ୍ତି । କିଛି ଲୋକଙ୍କ ଅବସ୍ଥା  ଏହାଠାରୁ ବି ଅଧିକ ହେଉଛି । କୋଭିଡ୍‌ ବେଳେ ଯେଭଳି  ଯନ୍ତ୍ରଣା ହେଉଥିଲା ସେମିତି ଅନୁଭବ କରୁଛନ୍ତି । ହେଲେ  ଅଧିକାଂଶ ଲୋକ ମେଡିକାଲ୍‌ ଯାଉନାହାନ୍ତି । ପାଖ ମେଡିସିନ୍‌  ଦୋକାନରୁ ଖୁଚୁରା ଔଷଧ ଆଣି ଖାଇଦେଉଥିବା ଦେଖିବାକୁ  ମିଳୁଛି ।   

ସମ୍ବଲପୁର ମୁଦିପଡ଼ା ଅଞ୍ଚଳରେ ଔଷଧ ବିତରକ ଭାବେ  କାମ କରୁଥିବା ସନ୍ଦୀପ ସାହୁ କହିଛନ୍ତି, ଗତ ୩ ଦିନ ହେଲା  ଦେହ ଭଲ ନାହିଁ । ଥଣ୍ଡା, ସର୍ଦ୍ଦି ଓ ଶୁଖିଲା କାଶ ହେଉଛି ।  ବେଳେବେଳେ ଛିଙ୍କ ମଧ୍ୟ ହେଉଛି । ଛିଙ୍କ କିମ୍ବା କାଶ ହେବା  ସମୟରେ ଛାତି ଓ ପିଠିରେ ଦରଜ ରହୁଛି । ତେଣୁ ମେଡିସିନ୍‌  ଦୋକାନରୁ ଔଷଧ ଆଣି ଖାଇଦେଇଛି । ତଥାପି ଦେହ, ହାତ,  ଗୋଡ଼ ପ୍ରବଳ ପୀଡ଼ା ହେଉଛି । ସେହିଭଳି ଜ୍ୟୋତିରଞ୍ଜନ  କହିଛନ୍ତି, ଗଳାରେ ଯନ୍ତ୍ରଣା ହେଉଛି । ଖାଦ୍ୟ ଖାଇ ହେଉନି ।  

ମୁଣ୍ଡ ବିନ୍ଧୁଛି । କଫ ପଡୁଛି । ଦେହ ଦରଜ ଲାଗିରହୁଛି ।  ରାତିରେ ଦେହର ତାପମାତ୍ରା ବଢ଼ିଯାଉଛି । କୋଭିଡ୍‌ ସମୟ  ଭଳି ଏଥର ମଧ୍ୟ ସମାନ ଲକ୍ଷଣ ଦେଖାଯାଉଛି । ଅନୁଭବ  ମଧ୍ୟ ହେଉଛି । ତେଣୁ ଆଜି ଜିଲ୍ଲା ମୁଖ୍ୟ ଚିକିତ୍ସାଳୟରେ  ଡାକ୍ତରଙ୍କ ଦେଖାଇ ଔଷଧ ଖାଉଛି । ଏପଟେ, କୋଭଡି  ଲକ୍ଷଣ ଦେଖାଯାଉଥିଲେ ମଧ୍ୟ ସରକାରୀ ମେଡିକାଲ୍‌ରେ  ଏହାର ନମୂନା ପରୀକ୍ଷା ହେଉନି । ଏମିତି କି, ଜିଲ୍ଲା ମୁଖ୍ୟ  ଚିକିତ୍ସାଳୟରେ ମଧ୍ୟ ଏହାର ନମୂନା ପରୀକ୍ଷା କରାଯାଉ ନାହିଁ ।  କେବଳ ଏହି ୨ ଜଣ ନୁହେଁ, ସହରରେ ଏବେ ପ୍ରତି ଘରେ  ୩ରୁ ୪ ଜଣଙ୍କ ଅବସ୍ଥା ସମାନ । ସମସ୍ତେ ଏହି ସଂକ୍ରାମକ  ରୋଗରେ ଆକ୍ରାନ୍ତ। ଯଦିଓ ଗୁରୁତର ସମସ୍ୟା ଦେଖାଯାଉନି  ତେବେ ଏହାକୁ ନେଇ ସତର୍କ ରଖିବାକୁ ପରିମର୍ଶ  ଦେଇଛନ୍ତି ଭିମସାର୍‌ ଆସିଷ୍ଟାଣ୍ଡ ପ୍ରଫେସର ସଞ୍ଜୀବ ମିଶ୍ର ।  

ଡ.ମିଶ୍ର କହିଛନ୍ତି, ବର୍ତ୍ତମାନ ସମୟରେ ଥଣ୍ଡା, ଜ୍ୱର, କାଶ,  ଛିଙ୍କ ହେଉଛି । ସ୍ୱାଭାବିକ  ଠାରୁ ଗୁରୁତର ଲକ୍ଷଣ  ଦେଖାଯାଉଛି । ଏହା ଭୂତାଣୁ ଦ୍ୱାରା ସଂକ୍ରମିତ  ରୋଗର ଲକ୍ଷଣ ଭଳି  ଲାଗୁଛି । କିନ୍ତୁ ଅନ୍ୟ  କୌଣସି ଭାଇରାଲ୍‌  ରୋଗ ହୋଇନଥିବ କହିବା ମୁସ୍କିଲ । ଯଦି ଏହାର ନମୂନା  ପରୀକ୍ଷା କରାଯିବ ପ୍ରକୃତ ରୋଗ ଜଣାପଡ଼ିବ । କୋଭିଡ  ସମୟ ଭଳି ଏଥିରେ ମଧ୍ୟ ସାବଧାନତା ଅବଲମ୍ବନ କରିବା ଜରୁରୀ । ଏହି ରୋଗ ଦେଖାଦେଲେ ମାସ୍କ ବ୍ୟବହାର କରନ୍ତୁ ।  ଯଦି ସ୍ୱାସ୍ଥ୍ୟ ସମସ୍ୟା ଗୁରୁତର ହେଉଛି, ତେବେ ଡାକ୍ତରଙ୍କ  ସହ ପରାମର୍ଶ କରନ୍ତୁ । ଏନେଇ ଜିଲ୍ଲା ମୁଖ୍ୟ ସ୍ୱାସ୍ଥ୍ୟ ଅଧିକାରୀ  ଡ.ସୁଜାତାରାଣୀ ମିଶ୍ର କହିଛନ୍ତି, ଏବେ କିଛି ଲୋକଙ୍କ ମଧ୍ୟରେ  ଥଣ୍ଡା, ଜ୍ୱର, କାଶ, ଛିଙ୍କ ହେଉଛି । କିନ୍ତୁ କୋଭିଡ୍‌ ହେବାର  ନଜର ନାହିଁ । ତେଣୁ ଆମେ ଏନେଇ ନମୂନା ପରୀକ୍ଷଣ  କରୁନୁ । ସାଧାରଣତଃ ଏମିତି ଭାଇରାଲ୍‌ ଫିଭର୍‌ ହୋଇଥାଏ ।  ଏହାକୁ ନେଇ ଚିନ୍ତିତ ହେବାର କୌଣସି କାରଣ ନାହିଁ।