ନୂଆଦିଲ୍ଲୀ ୨୨/୧୧: ଚଳିତ କୁଚ୍ ବିହାର ଟ୍ରଫିରେ ଭାରତର ପ୍ରସିଦ୍ଧ ଓପନର ବୀରେନ୍ଦ୍ର ସେହ୍ୱାଗଙ୍କ ପୁତ୍ର ଆର୍ଯ୍ୟବୀରଙ୍କ ଦ୍ୱିଶତକ ଇନିଂସ୍ ଖେଳି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି । ଦିଲ୍ଲୀ ପକ୍ଷରୁ ଖେଳୁଥିବା ଆର୍ଯ୍ୟବୀର ଚଳିତ ମେଘାଳୟ ବିପକ୍ଷ ମ୍ୟାଚ୍ରେ ଅପରାଜିତ ୨୯୭ ରନ୍ର ମାରାଥନ ଇନିଂସ୍ ଖେଳି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି ।
ଏହି ମ୍ୟାଚ୍ରେ ମେଘାଳୟ ପ୍ରଥମେ ବ୍ୟାଟିଂ କରି ୨୬୦ରନ୍ରେ ସୀମିତ ରହିଥିଲା । ଜବାବରେ ଦିଲ୍ଲୀ ପ୍ରଥମ ଇନିଂସ୍ ବ୍ୟାଟିଂ ଆରମ୍ଭ କରି ୫ ୱିକେଟ୍ ବିନିମୟରେ ୬୨୩ ରନ୍ ସଂଗ୍ରହ କରିଛି । ଆର୍ଯ୍ୟବୀର ୨୨୯ଟି ବଲ୍ର ସାମ୍ନା କରି ଅପରାଜିତ ୨୯୭ ରନ୍ କରିଛନ୍ତି । ତାଙ୍କ ଇନିଂସ୍ରେ ୫୧ଟି ଚୌକା ଓ ୩ଟି ଛକା ସାମିଲ ରହିଛି । ଅନ୍ୟ ବ୍ୟାଟର ଧନ୍ୟ ନକ୍ରା ମଧ୍ୟ ୧୩୦ ରନ୍, ଅର୍ନଭ ଏସ୍ ବୁଗା ୧୧୪ ରନ୍, କରିଛନ୍ତି ।
ଆର୍ଯ୍ୟବୀରଙ୍କୁ ଏବେ ମାତ୍ର ୧୬ ବର୍ଷ । ବାପା ସେହ୍ୱାଗଙ୍କ ଭଳି ସେ ବି ଜଣେ ଓପନର । ସେ ଗତ ଭିନୁ ମଙ୍କଡ଼ ଟ୍ରଫିରେ ମଣିପୁର ବିପକ୍ଷ ଏକ ମ୍ୟାଚ୍ରେ ଦିଲ୍ଲୀ ପକ୍ଷରୁ ପଦାର୍ପଣ କରିବା ସହ ୪୯ରନ୍ର ମ୍ୟାଚ୍ ବିଜୟୀ ଇନିଂସ୍ ଖେଳିଥିଲେ । ଦିଲ୍ଲୀ ୬ ୱିକେଟ୍ରେ ଏହି ମ୍ୟାଚ୍ ଜିତିଥିଲା । ଆର୍ଯ୍ୟବୀର ଆଇପିଏଲ୍ ଚୁକ୍ତି ପାଇଁ କଠିନ ପରିଶ୍ରମ କରୁଥିବା ବିଷୟରେ ଗତବର୍ଷ ସେହ୍ୱାଗ ପ୍ରକାଶ କରିଥିଲେ ।
