ବିରୁଟ,୧୯/୯: ଲେବାନନ୍ରେ ମଙ୍ଗଳବାର ରାତିରେ ପ୍ରାୟ ୫ ହଜାର ପେଜର (ୱେୟାରଲେସ୍ ଯୋଗାଯୋଗ ଉପକରଣ) ରେ ସିରିଜ୍ ବିସ୍ଫୋରଣ ହୋଇଥିଲା । ଏହି ନୂଆ ଶୈଳୀର ହମଲାକୁ ନେଇ ବିଶ୍ୱବାସୀ ଚକିତ ହୋଇଯାଇଥିଲେ । ତେବେ ବୁଧବାର ଲେବାନନ୍ର ରାଜଧାନୀ ବିରୁଟ୍ରେ ଆଉଏକ ଚକିତ କଳାଭଳି ଘଟଣା ଘଟିଛି । ବହୁସଂଖ୍ୟାରେ ୱାକିଟକି ଦ୍ୱାରା କରାଯାଇଛି ବିସ୍ଫୋରଣ । ମଙ୍ଗଳବାର ପେଜର ବ୍ଲାଷ୍ଟରେ ମୃତକଙ୍କ ସତ୍କାର କାମ ଚାଲିଥିବାବେଳେ ବିଭିନ୍ନ ସ୍ଥାନରେ ୱାକିଟକି ବିସ୍ଫୋରଣ ଘଟିଛି । ଏଥିରେ ୨୦ ଜଣଙ୍କ ମୃତ୍ୟୁ ଘଟିଥିବା ବେଳେ ୫୦୦ରୁ ଊଦ୍ଧ୍ୱର୍ ଆହତ ହୋଇଛନ୍ତି । ସୋଲାର ସିଷ୍ଟମ୍ ଜରିଆରେ ମଧ୍ୟ ବିସ୍ଫୋରଣ କରାଯାଇଛି ।
ଏହା ପଛରେ ବି ଇସ୍ରାଏଲ ଗୁଇନ୍ଦା ସଂସ୍ଥା ମୋସାଦର ହାତ ରହିଥିବା ହିଜ୍ବୁଲ୍ଲା ଆତଙ୍କୀ ସଙ୍ଗଠନ କହିଛି । ଇସ୍ରାଏଲ୍ର ଏହା ‘ନୂଆ ପର୍ଯ୍ୟାୟ’ର ଯୁଦ୍ଧ ବୋଲି କୁହାଯାଉଛି । ଆଗକୁ ଏହାଠାରୁ ଆହୁରି ଭୟଙ୍କର ରଣନୀତିକ ଆକ୍ରମଣ କରାଯିବା ନେଇ ଇସ୍ରାଏଲ୍ ସଂକେତ ଦେଇଛି । ଇସ୍ରାଏଲୀ ସେନା ମୁଖ୍ୟ କହିଛନ୍ତି, ଆମ ପାଖରେ ଅନେକ ସାମରିକ ଦକ୍ଷତା ରହିଛି । ଏ ପର୍ଯ୍ୟନ୍ତ ସେଗୁଡ଼ିକୁ ଆମେ ସକ୍ରିୟ ମୋଡ୍କୁ ଆଣିନାହୁଁ । ଆଗକୁ ଅନେକ ରଣନୀତିକ ଆକ୍ରମଣ ପାଇଁ ଯୋଜନା ରହିଛି । ଅନ୍ୟପକ୍ଷରେ ମଙ୍ଗଳାବାର ବିସ୍ଫୋରଣରେ ପେଜରରେ ବିସ୍ଫୋରକ ଖଞ୍ଜାଯାଇଥିଲା ବୋଲି ଜଣାପଡ଼ିଛି ।
ବିଦେଶୀ ଗଣମାଧ୍ୟମ ରିପୋର୍ଟ ଅନୁସାରେ, ମୋସାଦ ପ୍ରାୟ ୫ ହଜାର ପେଜରରେ ୩ରୁ ୫ ଗ୍ରାମର ବିସ୍ଫୋରକ ଫିଟ୍ କରିଥିଲା । ଏହି ପେଜରଗୁଡ଼ିକ ସାଧାରଣତଃ କୋଡ୍ ଦ୍ୱାରା ପରିଚାଳିତ ହୋଇଥାଏ । ଏହାକୁ ଲେବାନନ୍ରେ ଥିବା ହିଜ୍ବୁଲ୍ଲା ଆତଙ୍କବାଦୀ ସଙ୍ଗଠନ ତାଇୱାନର ଏକ କମ୍ପାନୀଠାରୁ ମଗାଇଥିଲା । ଚଳିତ ବର୍ଷ ଆରମ୍ଭରେ ଏଗୁଡ଼ିକୁ ଲେବାନନ୍ ପଠାଯାଇଥିଲା । ହିଜ୍ବୁଲ୍ଲା ଆତଙ୍କବାଦୀ ଇସ୍ରାଏଲ ନଜରରୁ ବର୍ତ୍ତିବା ପାଇଁ ପେଜର ବ୍ୟବହାର କରୁଥିଲେ । ମଙ୍ଗଳବାର ରାତିରେ ସବୁ ପେଜରକୁ ଏକ ମେସେଜ ଆସିଥିଲା, ଯାହାଦ୍ୱାରା ସେଥିରେ ଥିବା ବିସ୍ଫୋରକ ସକ୍ରିୟ ହୋଇଯାଇଥିଲା । ଫଳରେ ତାହା ବିସ୍ଫୋରଣ ହୋଇଥିଲା । ଏଥିରେ ଅନ୍ୟୂନ ୧୨ ଜଣଙ୍କ ମୃତ୍ୟୁ ଘଟିଥିବାବେଳେ ୩ ହଜାରରୁ ଊଦ୍ଧ୍ୱର୍ ଆହତ ହୋଇଛନ୍ତି । ୨ ଶହରୁ ଊଦ୍ଧ୍ୱର୍ ଗୁରୁତର ଅଛନ୍ତି । ଆହତଙ୍କ ମଧ୍ୟରେ ଇରାନର ରାଷ୍ଟ୍ରଦୂତ ମଧ୍ୟ ଅଛନ୍ତି । ସେହିପରି ସିରିଆରେ ମଧ୍ୟ କେତେକ ସ୍ଥାନରେ ପେଜର ବିସ୍ଫୋରଣ ହୋଇଛି । ଏଥିରେ ୭ ଜଣଙ୍କ ମୃତ୍ୟୁ ଘଟିଛି
ହିଜବୁଲ୍ଲା ଏହି ଘଟଣା ପାଇଁ ଇସ୍ରାଏଲକୁ ସିଧାସଳଖ ଭାବେ ଦାୟୀ କରିଛି । ଇରାନ ମଧ୍ୟ ଏହାକୁ ‘ନରସଂହାର’ ଆଖ୍ୟା ଦେଇ ନିନ୍ଦା କରିବା ସହ ଇସ୍ରାଏଲକୁ ଦାୟୀ କରିଛି । ଇରାନ୍ ସମର୍ଥତ ହିଜ୍ବୁଲ୍ଲା ଏହାର ପ୍ରତିଶୋଧ ନେବ ବୋଲି ଚେତାବନୀ ଦେଇଛି । ବୁଧବାର ଜାରି ବୟାନରେ ହିଜ୍ବୁଲ୍ଲା କହିଛି, ଗାଜା ସମର୍ଥନରେ ଅଭିଯାନ ଜାରି ରହିବ । ଇସ୍ରାଏଲ୍ ଉପରେ ଖୁବଶୀଘ୍ର ଜବାବୀ ହମଲା ହେବ ବୋଲି ଏହା କହିଛି । ଅନ୍ୟପକ୍ଷରେ ତାଇୱାନର ଗୋଲ୍ଡ ଆପୋଲୋ କମ୍ପାନୀ ଏହି ପେଜର ବନାଇ ନ ଥିବା କହିଛି । ପେଜରଗୁଡ଼ିକୁ ଏହାର ସହଯୋଗୀ କମ୍ପାନୀ ବିଏସି ନିର୍ମାଣ କରିଥିବା ଗୋଲ୍ଡ ଆପୋଲୋ ପକ୍ଷରୁ କୁହାଯାଇଛି ।
ଲେବାନନ୍ରେ ବିସ୍ଫୋରଣ ଘଟଣାକୁ ରୁଷ୍ ନିନ୍ଦା କରିଛି । ଏହା ଅନ୍ତର୍ଜାତୀୟ ନିୟମର ଉଲ୍ଲଂଘନ ବୋଲି ରୁଷ୍ ବିଦେଶ ମନ୍ତ୍ରଣାଳୟ ମୁଖପାତ୍ର ମାରିଆ ଜାଖରୋଭା କହିଛନ୍ତି । ସେହିପରି ତୁର୍କୀ ଏବଂ ଆୟର୍ଲ୍ୟାଣ୍ଡ ମଧ୍ୟ ଏହାକୁ ନିନ୍ଦା କରିଛନ୍ତି । ଲେବାନନ୍ରେ ଯାହା କିଛି ଘଟିଛି ତାହା ଚିନ୍ତାଜନକ ବୋଲି ଜାତିସଂଘ ପ୍ରବକ୍ତା କହିଛନ୍ତି । ଅନ୍ୟପକ୍ଷରେ ୧୨ ମାସ ମଧ୍ୟରେ ଇସ୍ରାଏଲ୍ ସେନା ପାଲେଷ୍ଟାଇନ୍ ଛାଡ଼ିବା ପାଇଁ ଜାତିସଂଘ ସୁରକ୍ଷା ପରିଷଦ ପକ୍ଷରୁ ଅଣାଯାଇଥିବା ଏକ ସଂକଳ୍ପନାମା ପାରିତ ହୋଇଯାଇଛି । ୧୯୩ ରାଷ୍ଟ୍ର ମଧ୍ୟରୁ ୧୨୪ଟି ଦେଶ ଏହା ସମର୍ଥନରେ ଭୋଟ୍ ଦେଇଥିଲା ବେଳେ ୧୪ଟି ଦେଶ ବିରୋଧରେ ଭୋଟ୍ ଦେଇଥିଲେ । ଅନ୍ୟପକ୍ଷରେ ଭାରତ, ଅଷ୍ଟ୍ରେଲିଆ, ଜର୍ମାନୀ, ନେପାଳ, ଇଟାଲୀ, ବ୍ରିଟେନ୍ ଓ ୟୁକ୍ରେନ୍କୁ ମିଶାଇ ୪୩ଟି ଦେଶ ଭୋଟିଂରୁ ବିରତ ରହିଥିଲେ ।
