ଭୁବନେଶ୍ୱର,୨୫/୦୩: ହୋଲିରେ ଛଟପଟ କରିବ ଡହ ଡହ ଖରା । ଏବେ ରାଜ୍ୟର ଅଧିକାଂଶ ସ୍ଥାନର  ତାତି ୩୫ ଡିଗ୍ରୀ ଉପରେ ଥିବାବେଳେ  ଆଗକୁ ଆହୁରି ବଢ଼ିବ । ଆସନ୍ତା ୪  ଦିନରେ ତାପମାତ୍ରା ୩ରୁ ୪ ଡିଗ୍ରୀ ତାତି  ବଢ଼ିଯିବ । ଆଭ୍ୟନ୍ତରୀଣରେ ୪୦ ଡିଗ୍ରୀ ଛୁଇଁପାରେ ବୋଲି ପାଣିପାଗ  ବିଭାଗ ପୂର୍ବାନୁମାନ କରିଛି ।  

ରବିବାର ବଲାଙ୍ଗୀରରେ ଦିନ  ତାପମାତ୍ରା ସର୍ବାଧିକ ୩୮.୫  ଡିଗ୍ରୀ ରହିଛି । ଟିଟିଲାଗଡ଼ରେ  ୩୮.୨, ମାଲକାନଗିରିରେ  ୩୮, ବାରିପଦାରେ ୩୭.୪,  ଭବାନୀପାଟଣା ଓ ନୟାଗଡ଼ରେ  ୩୭ଡିଗ୍ରୀ ରେକର୍ଡ ହୋଇଛି । ରବିବାର  ୨୪ ସହରର ତାପମାତ୍ରା ୩୫ ଡିଗ୍ରୀ ଓ ଏହାଠାରୁ ଉପରେ ଥିଲା । 

୨୫ ଓ ୨୬  ତାରିଖ ଦୁଇ ଦିନ ରାଜ୍ୟର କିଛି ସ୍ଥାନରେ କାଁ ଭାଁ ବର୍ଷା ହୋଇପାରେ । ୨୫ରେ  ବରଗଡ଼, ଦେବଗଡ଼, ସମ୍ବଲପୁର,  ଝାରସୁଗୁଡ଼ା, ସୁନ୍ଦରଗଡ଼, କେନ୍ଦୁଝର ଓ ମୟୂରଭଞ୍ଜର କିଛି ସ୍ଥାନରେ ସ୍ୱଳ୍ପ ବର୍ଷା  ହୋଇପାରେ । ୨୬ରେ ସୁନ୍ଦରଗଡ଼,  କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ଭଦ୍ରକ ଓ ଯାଜପୁରର କିଛିସ୍ଥାନରେ  ବର୍ଷା ହୋଇପାରେ ବୋଲି ପାଣିପାଗ ବିଭାଗ ଆକଳନ କରିଛି ।