ନୂଆଦିଲ୍ଲୀ ୦୩/୦୬: ଗମନାଗମନ ଓ ପରିବେଶ ସଂରକ୍ଷଣ ପାଇଁ ସାଇକେଲ ଚାଳନାକୁ ପ୍ରୋସାହିତ କରିବା ଉଦ୍ଦେଶ୍ୟରେ ପ୍ରତି ବର୍ଷ  ଜୁନ୍‌ ୩ ତାରିଖରେ ପାଳିତ ହୁଏ ବିଶ୍ୱ ସାଇକେଲ ଦିବସ । ମାନବ ଶକ୍ତିକୁ ଯାନ୍ତ୍ରିକ ଶକ୍ତିରେ ରୂପାନ୍ତରିତ କରୁଥିବା ସବୁଠୁ ଦକ୍ଷ ଯାନ ହେଉଛି ସାଇକେଲ। କ୍ରୀଡ଼ା କ୍ଷେତ୍ରରେ  ସାଇକେଲର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଉଭୟ ଶାରୀରିକ ଓ ମାନସିକ ସ୍ୱାସ୍ଥ୍ୟ ପାଇଁ ସାଇକେଲ ଚାଳନା ଅତ୍ୟନ୍ତ ହିତକର । 

ପରିବେଶ ଓ ଅର୍ଥନୀତି ପାଇଁ ମଧ୍ୟ  ଏହା ଭଲ । ଆମକୁ ସକ୍ରିୟ ଓ ସତେଜ ରଖିବାର ଭଲ କସରତ ହେଉଛି ସାଇକେଲ ଚାଳନା । ସୁସ୍ଥ ଜୀବନଶୈଳୀ  ଓ ସୁନ୍ଦର ପରିବେଶର ବିକାଶରେ ଏହାର ଗୁରୁତ୍ୱପୂର୍ଣ୍ଣ  ଯୋଗଦାନ ରହିଛି । ଏହାକୁ ଦୃଷ୍ଟିରେ ରଖି ଜାତିସଂଘ ସାଧାରଣ ସଭାରେ ଜୁନ୍‌ ୩ ତାରିଖକୁ ବିଶ୍ୱ ସାଇକେଲ  ଦିବସ ରୂପେ ପାଳନ କରିବାକୁ ଘୋଷଣା ହୋଇଥିଲା । 

 ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁସାରେ, ସହରାଞ୍ଚଳରେ ଗରିବ ଲୋକେ ବ୍ୟକ୍ତିଗତ ଯାନ କିଣି ପାରୁନଥିବାବେଳେ ଚାଲିବା ଓ ସାଇକେଲ ଚାଳନା ଗମନାଗମନର ଉତ୍ତମ ମାର୍ଗ ପ୍ରଦାନ କରେ । ହୃଦ୍‌ଘାତ ଆଶଙ୍କା ହ୍ରାସ କରିବା  ସହିତ ଷ୍ଟ୍ରୋକ୍‌, ନିର୍ଦ୍ଦିଷ୍ଟ ପ୍ରକାରର କର୍କଟ, ମଧୁମେହ ଏପରିକି ମୃତ୍ୟୁ ଆଶଙ୍କା ମଧ୍ୟ ଏହା ହ୍ରାସ କରେ ।