ମଥୁରାନଗରୀ,୨୫/୦୧: ମଥୁରା କାରାଗାରରେ ଜନ୍ମ ହେଲା କ୍ଷଣି ମଥୁରା ଛାଡ଼ି ଗୋପରେ ବଢ଼ି କିଶୋରାବସ୍ଥାରେ ପହଞ୍ଚିଥିବା କୃଷ୍ଣ ବଳରାମ ଦୀର୍ଘ ୧୨ ବର୍ଷର ବ୍ୟବଧାନ ପରେ ମଥୁରା ଫେରିଥିବା ବେଳେ ଉଭୟଙ୍କ ବାଲ୍ୟ ଚପଳାମି ସହିତ ମନମୁଗ୍ଧକାରୀ ହସ ମଥୁରାବାସୀଙ୍କୁ ଆହ୍ଲାଦିତ କରିଛି । ନିୟତିର ଅଦୃଷ୍ଟ ସମୟଚକ୍ରରେ ଅକ୍ରୁରଙ୍କ ସାଥିରେ କୃଷ୍ଣ ବଳରାମ ମଥୁରାକୁ ପ୍ରବେଶ ପରେ ମଥୁରାରେ ଖେଳିଯାଇଛି ଆନନ୍ଦ, ଉତ୍ସାହ ଆଉ ସ୍ୱାଧୀନ ହେବାର ପ୍ରାକ୍ ଖୁସି । ବାଟେ ଘାଟେ ମଥୁରାବାସୀ ପୂଜାଧ୍ୱଜାରେ ବେନିଭ୍ରାତାଙ୍କୁ କରିଥିବା ସ୍ୱାଗତ ଅଭ୍ୟର୍ଥନା ଏକ ଭାବମୟ ପରିବେଶକୁ ଜନ୍ମଦେଇଥିବା ସମୟରେ ଖଜୁରଟିକ୍ରା ସ୍ଥିତ ମଧୁବନ ତୋଟା ଚଳଚଞ୍ଚଳ ହୋଇପଡ଼ିଥିଲା ।
ନନ୍ଦସୂତ ମଧୁବନ ତୋଟା ସ୍ଥିତ ଆଦିମାତାଙ୍କ ଆସ୍ଥାନ ସଚ୍ଚିଦାନନ୍ଦ ମନ୍ଦିରରେ ପହଞ୍ଚିବା ପରେ ନଗରବାସୀଙ୍କ ତରଫରୁ ଖଜୁରଟିକ୍ରାବାସୀ ଉଭୟଙ୍କୁ ବିନମ୍ର ସମ୍ବର୍ଦ୍ଧନା ଜ୍ଞାପନ ସହ ସ୍ୱାଗତ କରିଥିଲେ । ଉଭୟେ ମଧୁବନ ତୋଟାରେ ରାତ୍ରିଯାପନ କରିଥିଲେ । ବୁଧବାର ସକାଳୁ ଉଠି ବେନିଭାଇ ନିଜ ନିତ୍ୟକର୍ମ ସମାପନ ପରେ ମଥୁରା ନଗର ବୁଲିଯିବା ପାଇଁ ସଖା ସହୋଦର ସହ ବାହାରିଥିଲେ । ସେଥି ନିମନ୍ତେ ନିଜର ବସ୍ତ୍ର ବଦଳାଇ ରାଜକୀୟ ବସ୍ତ୍ର ପିନ୍ଧିବାକୁ ଇଚ୍ଛା ପ୍ରକାଶ କରି ରାମକୃଷ୍ଣ କଂସାସୁରଙ୍କ କୌଳିକ ରଜକକୁ ରାଜୋଚିତ ବସ୍ତ୍ର ମାଗିଥିଲେ ା ହେଲେ କଂସ ଆଚରଣରେ ପରିଚାଳିତ ରଜକ ଜଣକ ରାଜକୀୟ ବସ୍ତ୍ର ଦେବାପାଇଁ ମନା କରି ରାମକୃଷ୍ଣଙ୍କୁ ଅପମାନିତ କରିଥିଲେ । ବାଳକୃଷ୍ଣ ରାଗରେ ରଜକଙ୍କୁ ଏକ ଶକ୍ତ ଚାପୁଡ଼ା ମାରି ତାର ପ୍ରାଣ ନାଶ କରିବା ସହିତ ମୋକ୍ଷ ପ୍ରଦାନ କରିଥିଲେ । ସେଠୁ ବାହାରି ବେନିଭ୍ରାତା ରାଜକୀୟ ପୋଷାକ ପରିଧାନ କରି ନଗର ଭ୍ରମଣ କରୁଥିବା ବେଳେ ସୁଦାମା ମାଳି ସହିତ ସାକ୍ଷାତ ହୋଇଥିଲା । ଭାବବିହ୍ୱଳ ସୁଦାମା ଶ୍ୟାମଘନ ଓ ଶଙ୍କର୍ଷଣଙ୍କୁ ନିକଟରେ ପାଇ ସୁଗନ୍ଧିତ ଫୁଲରେ ସଜ୍ଜିତ କରିଥିଲେ ।
କୃଷ୍ଣ ବଳରାମ ଯାଉଥିବା ସମୟରେ ପିଠିରେ ଏକ କୁଜ ଥିବା ନାରୀ କୁବ୍ଜା ହଠାତ୍ ପ୍ରଭୁଙ୍କ ବାଟ ଓଗାଳିଥିଲେ । ସୁଗନ୍ଧିତ ଚନ୍ଦନ କୁଙ୍କୁମରେ ପ୍ରଭୁଙ୍କୁ ବେଶ କରିଥିଲେ । କୁବ୍ଜାର ପ୍ରୀତିରେ ତୃପ୍ତ ହୋଇ ଭଗବାନ କୃଷ୍ଣ ତାର କୁଜରେ ହାତ ବୁଲାଇ ଆଣିବା ପରେ ସହସା କୁଜଟି ନାରୀର ପିଠିରୁ ଉଭେଇଯାଇ ଏକ ସୁନ୍ଦରୀ ନାରୀ ଶରୀରରେ ରୂପାନ୍ତରିତ ହୋଇ ଯାଇଥିଲା । ସେହିକ୍ରମରେ ନଗର ଭ୍ରମଣ ସମୟରେ ବେନିଭ୍ରାତା ବରଗଡ଼ ନଗରପାଳ କଳ୍ପନା ମାଝି ଓ ଉପଜିଲ୍ଲାପାଳ ଲଲାଟ କୁମାର ଲୁହାଙ୍କ ଆବାସିକ ବାସଭବନ ସମେତ ଅନ୍ୟାନ୍ୟ ବହୁ ଶ୍ରଦ୍ଧାଳୁମାନଙ୍କ ଘରକୁ ମଧ୍ୟ ଯାଇ ପୂଜା ପାଇଥିଲେ। ଶେଷରେ ମଧୁମଙ୍ଗଳ ସମେତ ଗୋପାଳ ବାଳକମାନଙ୍କୁ ସାଥିରେ ଘେନି ‘ଧନୁଗୃହ’କୁ ପ୍ରବେଶ କରି ସେଠାରେ ରାତ୍ରି ଯାପନ କରିଥିଲେ ।
ପ୍ରକାଶଯୋଗ୍ୟ ଯେ, ଆଦିମାତା ମନ୍ଦିରରୁ ବାହାରିବାଠାରୁ ରଜକ ଓ ସୁଦାମାମାଳି ଦୃଶ୍ୟକୁ ଖୁରଟିକ୍ରାବାସୀ ପରିଚାଳନା କରିଥିବା ବେଳେ ରଜକ ଉଦ୍ଧାର ଦୃଶ୍ୟକୁ କାଳୀମନ୍ଦିରର ଯୁବକମାନେ ପରିଚାଳନା କରିଥିଲେ ।
