ନୂଆଦିଲ୍ଲୀ,୩୦।୪: ଅବକାରୀ ଦୁର୍ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଆବେଦନ ଉପରେ ମଙ୍ଗଳବାର ଶୁଣାଣି କରିଛନ୍ତି ସୁପ୍ରିମକୋର୍ଟ। ତେବେ ଶୁଣାଣି ସମୟରେ ସୁପ୍ରିମକୋର୍ଟ ଗିରଫଦାରୀର ସମୟକୁ ନେଇ ପ୍ରଶ୍ନ ଉଠାଇଛନ୍ତି। କୋର୍ଟ କହିଛନ୍ତି, ସାଧାରଣ ନିର୍ବାଚନର ଠିକ୍ ପୂର୍ବରୁ କେଜ୍ରିଓ୍ବାଲଙ୍କୁ କାହିଁକି ଗିରଫ କରାଗଲା ? ଏନେଇ କୋର୍ଟ ଇଡିକୁ ଜବାବ୍ ଦେବା ପାଇଁ ଶୁକ୍ରବାର ପର୍ଯ୍ୟନ୍ତ ସମୟ ଦେଇଛନ୍ତି।

ଜଷ୍ଟିସ୍ ସଞ୍ଜୀବ ଖାନ୍ନା ଓ ଜଷ୍ଟିସ୍ ଦୀପଙ୍କର ଦତ୍ତାଙ୍କ ଖଣ୍ଡପୀଠ ଶୁଣାଣି ବେଳେ ଆଡିସନାଲ ସଲିସିଟର ଜେନେରାଲ ଏସଭି ରାଜୁଙ୍କୁ କହିଛନ୍ତି, ସ୍ବାଧୀନତା ହେଉଛି ଖୁବ୍ ଜରୁରୀ, ଆପଣ ଏହାକୁ ମନା କରିପାରିବେନି। ଶେଷ ପ୍ରଶ୍ନ ଗିରଫ କରାଯିବାର ସମୟକୁ ନେଇ ରହିଛି। କାହିଁକି ନିର୍ବାଚନର ଠିକ୍ ପୂର୍ବରୁ କେଜ୍ରିଓ୍ବାଲାଙ୍କୁ ଗିରଫ କରାଯାଇଛି ? ଖଣ୍ଡପୀଠ ରାଜୁଙ୍କୁ ଆହୁରି ଅନେକ ପ୍ରଶ୍ନ ପଚାରିଛି ଓ ଇଡିକୁ ଶୁଣାଣିର ଆସନ୍ତା ତାରିଖରେ ଜବାବ ଦେବାକୁ କହିଛି। ମାମଲାର ଶୁଣାଣି ଆସନ୍ତା ଶୁକ୍ରବାର ହେବ। ବୁଧବାର ଦୁଇ ବିଚାରପତି ଅଲଗା ଅଲଗା ଖଣ୍ଡପୀଠରେ ଶୁଣାଣି କରିବେ।

ଏହି ମାମଲାରେ ମଙ୍ଗଳବାର ଲଗାତାର ଦ୍ବିତୀୟ ଦିନ ସୁପ୍ରିମକୋର୍ଟରେ ଶୁଣାଣି ହୋଇଛି। କୋର୍ଟରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ପକ୍ଷରୁ ଓକିଲ ଅଭିଷେକ ମନୁ ସିଙ୍ଘଭି ପକ୍ଷ ରଖିଛନ୍ତି। ଉଲ୍ଳେଖନୀୟ ଯେ, କଥିତ ଏକ୍ସାଇଜ୍ ଡ୍ୟୁଟି ଦୁର୍ନୀତି ସମ୍ପର୍କିତ ମନି ଲଣ୍ଡରିଂ ମାମଲାରେ ଇଡି ଦ୍ବାରା ତାଙ୍କ ଗିରଫକୁ ସୁପ୍ରିମକୋର୍ଟ ଚ୍ୟାଲେଞ୍ଜ ଦେଇଛନ୍ତି। ସେ ୨୧ ମାର୍ଚ୍ଚରେ ଗିରଫ ପରେ ଜେଲ୍‌ରେ ଅଛନ୍ତି।