ସାଲେପୁର/ଜଗତପୁର,୨୭/୦୪: ଜାତୀୟ କଂଗ୍ରେସର ଲୋକପ୍ରିୟ ଚେହେରା ତଥା ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧି ଆସନ୍ତା ୨୮ ତାରିଖରେ ଓଡ଼ିଶା ଆସୁଛନ୍ତି । ସେ ରବିବାର ଦିନ ୧୦ଟାରେ କଟକ ସାଲେପୁର ପହଞ୍ଚିବେ । ଏଠାରେ ନିର୍ବାଚନୀ ସଭାରେ ଯୋଗଦେବା ସହ ପ୍ରଦେଶ କଂଗ୍ରେସ କମିଟିର ପ୍ରଚାର ଅଭିଯାନର ଶୁଭାରମ୍ଭ କରିବେ । ଏନେଇ ଶୁକ୍ରବାର ଜାତୀୟ କଂଗ୍ରେସର ଏକ ଉଚ୍ଚସ୍ତରୀୟ କମିଟି ସାଲେପୁର ଆସି ରାହୁଲଙ୍କ କାର୍ଯ୍ୟକ୍ରମ କିଭଳି ସଫଳ ହେବ ସେନେଇ ହେଉଥିବା ପ୍ରସ୍ତୁତି କାର୍ଯ୍ୟର ଅନୁଧ୍ୟାନ କରିଛନ୍ତି । ତେଲଙ୍ଗାନା ଉପମୁଖ୍ୟମନ୍ତ୍ରୀ ମଲୁଭଟି ବିକ୍ରମାର୍କା ଏବଂ ଅଖିଳ ଭାରତୀୟ କଂଗ୍ରେସ କମିଟିର ଯୁଗ୍ମସମ୍ପାଦକ ତେହିନା ବାଗ୍ ଚୌଧୁରୀଙ୍କ ସମେତ ଓଡ଼ିଶା କଂଗ୍ରେସର ବରିଷ୍ଠ କାର୍ଯ୍ୟକର୍ତ୍ତାମାନେ ରାହୁଲଙ୍କ ଗସ୍ତର କାର୍ଯ୍ୟକ୍ରମ ସଂପର୍କରେ ସମୀକ୍ଷା କରିବା ସହ ସଭାସ୍ଥଳ ବୁଲି ଦେଖିଥିଲେ ।
୨୦୨୪ ସାଧାରଣ ନିର୍ବାଚନ ପରିପ୍ରେକ୍ଷୀରେ ରାହୁଲଙ୍କ ଏହା ପ୍ରଥମ ଓଡ଼ିଶା ଗସ୍ତ ହେବ । ମିଳିଥିବା ସୂଚନା ମୁତାବକ, ରାହୁଲ ରବିବାର ଭୁବନେଶ୍ୱରରେ ପହଞ୍ଚିବା ପରେ ସେଠାରୁ ହେଲିକପ୍ଟରରେ ସାଲେପୁର ସତ୍ୟଭାମାପୁରସ୍ଥିତ ଉତ୍କଳଗୌରବ ମଧୁସୂଦନ ଦାସଙ୍କ ଜନ୍ମପୀଠରେ ପହଞ୍ଚିବେ । ସେଠାରେ ମଧୁବାବୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ ପରେ କାର୍ରେ ୧୫ କିଲୋମିଟର ଦୂର କୁଳିଆ ପଡ଼ିଆକୁ ଯିବେ। ସେଠାରେ ଓଡ଼ିଶା କଂଗ୍ରେସ ତରଫରୁ ବିଶାଳ ଜନସମାବେଶ ଆୟୋଜନ କରାଯାଇଛି । ଦିନ ୧୧ଟା ସୁଦ୍ଧା ସଭାରେ ପହଞ୍ଚି ରାହୁଲ କଂଗ୍ରେସ ନେତା, କର୍ମୀ, ଜନସାଧାରଣଙ୍କୁ ସମ୍ବୋଧିତ କରିବେ । ରାହୁଲଙ୍କ ଏହି ଗସ୍ତର ସଫଳ ଆୟୋଜନ ପାଇଁ ଶୁକ୍ରବାର ଅପରାହ୍ଣରେ କଂଗ୍ରେସର ଉଚ୍ଚସ୍ତରୀୟ କମିଟି ସତ୍ୟଭାମାପୁର ଯାଇ ସ୍ଥିତି ସମୀକ୍ଷା କରିଥିଲେ । ପରେ କୁଳିଆସ୍ଥିତ ସଭାସ୍ଥଳ ବୁଲି ଦେଖିଥିଲେ । ରାହୁଲଙ୍କ ଗସ୍ତକୁ ଦୃଷ୍ଟିରେ ରଖି କଟକ ଗ୍ରାମାଞ୍ଚଳ ପୁଲିସ ପକ୍ଷରୁ ସୁରକ୍ଷା ବନ୍ଦୋବସ୍ତ କରାଯାଇଛି ।