ଢେଙ୍କାନାଳ ୨୬/୦୪: ମଝି ରାସ୍ତାରେ ହୁ ହୁ ହୋଇ ଜଳିଗଲା ଯାତ୍ରୀବାହୀ ବସ। ଢେଙ୍କାନାଳ ଆନନ୍ଦ ନଗର ନିକଟରେ ଘଟିଛି ଭୟାବହ ଅଗ୍ନିକାଣ୍ଡ। ବସ୍ରେ ଥିଲେ ୫୦ରୁ ଅଧିକ ଯାତ୍ରୀ। ସମସ୍ତଙ୍କୁ ସୁରକ୍ଷିତ ଉଦ୍ଧାର କଲେ ସ୍ଥାନୀୟବାସୀ। ଘଟଣାସ୍ଥଳରେ ଢ଼େଙ୍କାନାଳ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ କରିଛି। ତେବେ ବସ୍ରେ ଅଗ୍ନିକାଣ୍ଡ ଘଟିବା ପ୍ରକୃତ କାରଣ ଜଣାପଡିନାହିଁ। ତଦନ୍ତ ପରେ ତଥ୍ୟ ସାମ୍ନାକୁ ଆସିବ ବୋଲି ଅଗ୍ନିଶମ କର୍ମଚାରୀ ସୂଚନା ଦେଇଛି।
ସୂଚନା ମୁତାବିକ, ଶୁକ୍ରବାର ପ୍ରିୟଂଶୁ ନାମକ ଏହି ଯାତ୍ରୀବାହୀ ବସ ତାଳଚେରରୁ କଟକ ଅଭିମୁଖେ ପ୍ରାୟ ୫୦ଜଣ ଯାତ୍ରୀଙ୍କୁ ନେଇ ଯାଉଥିଲା ବେଳେ ଅଚାନକ ନିଆଁ ଲାଗିଥିଲା। ଧୂଆଁ ଦେଖି ଡ୍ରାଇଭର ଗାଡିକୁ ତୁରନ୍ତ ଅଟକାଇ ଦେଇଥିଲା । ଫଳରେ ଯାତ୍ରୀ ମାନେ ବସରୁ ଓହ୍ଲାଇପଡିଥିଲେ । ନିଆଁର ସଠିକ କାରଣ କ'ଣ ଜଣାପଡିନାହିଁ। ବସ ତଳୁ ପ୍ରଥମେ ନିଆଁ ଲାଗିଥିଲା ବୋଲି କିଛି ଯାତ୍ରୀ ପ୍ରକାଶ କରିଛନ୍ତି। ଅତ୍ୟଧିକ ଖରା ଓ ଗରମ ଯୋଗୁଁ ବ୍ୟାଟେରୀରୁ ପ୍ରଥମେ ନିଆଁ ଲାଗି ଡିଜେଲ ଟ୍ୟାଙ୍କକୁ ନିଆଁ ଧରି ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି।