ନୂଆଦିଲ୍ଲୀ ୨୫/୦୪: ନାସାର ଜଣାଶୁଣା ମହାକାଶଚାରୀ ସୁନୀତା ଏଲ୍. ୱିଲିୟମ୍ସ ନିଜର ୩ୟ ମହାକାଶ ମିଶନ୍ ପାଇଁ ପ୍ରସ୍ତୁତ ହେଉଛନ୍ତି । ବୋଇଂର ଷ୍ଟାର୍ଲାଇନର୍ ମହାକାଶଯାନରେ କ୍ରୁ ଫ୍ଲାଇଟ୍ ଟେଷ୍ଟ୍ ମିଶନର ପାଇଲଟ୍ ହେବାକୁ ସେ ଟ୍ରେନିଂ ନେଉଛନ୍ତି । ଉକ୍ତ ମହାକାଶଯାନ ପାଇଁ ଏହା ପ୍ରଥମ ମାନବ ଉଡ଼ାଣ ଏବଂ ଅନ୍ତର୍ଜାତୀୟ ମହାକାଶ କେନ୍ଦ୍ରକୁ ସୁନୀତାଙ୍କ ୩ୟ ମିଶନ ।
ଆସନ୍ତା ମେ’ ୬ ତାରିଖରେ କେପ୍ କାନାଭରାଲ ସ୍ପେସ୍ ଫୋର୍ସ ଷ୍ଟେସନ୍ରେ ସ୍ପେସ୍ ଲଞ୍ଚ୍ କମ୍ପେ୍ଲକ୍ସ-୪୧ରୁ ମିଶନ ଲଞ୍ଚ୍ ଲାଗି ଲକ୍ଷ୍ୟ ଧାର୍ଯ୍ୟ ହୋଇଛି । ସୁନୀତା ଓ ନାସା ମହାକାଶଚାରୀ ବୁଚ୍ ୱିଲମୋର ବୋଇଂର ଷ୍ଟାର୍ଲାଇନ୍ ଷ୍ଟାର୍ଲାଇନର ମହାକାଶଯାନରେ ମହାକାଶ କେନ୍ଦ୍ରକୁ ଯିବେ । ୟୁନାଇଟେଡ୍ ଲଞ୍ଚ୍ ଆଟ୍ଲାସ ଭି ରକେଟ୍ରେ ଏହି ମହାକାଶଯାନର ଉତ୍କ୍ଷେପଣ ହେବ । ମହାକାଶରେ ଘୂର୍ଣ୍ଣାୟମାନ ପ୍ରୟୋଗଶାଳାରେ ତାହା ଅଟକିବ । ସେଠାରେ ଦୁଇ ମହାକାଶଚାରୀ ପ୍ରାୟ ଗୋଟିଏ ସପ୍ତାହ ରହିବେ । ଏହି ମିଶନ ଷ୍ଟାର୍ଲାଇନର୍ ସିଷ୍ଟମ୍ର ଉତ୍କ୍ଷେପଣ, ମହାକାଶଚାରୀଙ୍କୁ ପ୍ରୟୋଗଶାଳାରେ ପହଞ୍ଚାଇବା ଏବଂ ପୃଥିବୀକୁ ଫେରିବାର ସାମର୍ଥ୍ୟକୁ ପୁଙ୍ଖାନୁପୁଙ୍ଖ ପରୀକ୍ଷା କରିବ ।
ସୁନୀତା ୱିଲିୟମ୍ଙ୍କ ମହାକାଶ ଉଡ଼ାଣ ଅନୁଭବ ଏକ୍ସପେଡିସନ୍ ୧୪/୧୫ ଜରିଆରେ ୯ ଡିସେମ୍ବର, ୨୦୦୬ରୁ ଜୁନ୍ ୨୨, ୨୦୦୭ ପର୍ଯ୍ୟନ୍ତ ଆରମ୍ଭ ହୋଇଥିଲା । ଜଣେ ଫ୍ଲାଇଟ୍ ଇଞ୍ଜିନିୟର ଭାବେ ସେ ଏସ୍ଟିଏସ୍-୧୧୬ର କ୍ରୁ ସହ ମହାକାଶକୁ ଯାଇଥିଲେ । ଜଣେ ମହିଳା ଭାବେ ମୋଟ୍ ୨୯ ଘଣ୍ଟା ଓ ୧୭ ମିନିଟ୍ର ୪ ସ୍ପେସ୍ୱାକ୍ ଜରିଆରେ ସେ ରେକର୍ଡ କରିଥିଲେ ।