ନୂଆଦିଲ୍ଲୀ,୧୩/୦୫: ଆଗକୁ ମୁଦ୍ରାସ୍ଫୀତି ବୃଦ୍ଧି ହେବାର ଅବସର ନାହିଁ । ମୌସୁମୀ ସମୟରେ ଏହା ହ୍ରାସ ହୋଇ ୪% ସ୍ତରକୁ ଆସିବ ବୋଲି ମୁଖ୍ୟ ଅର୍ଥନୀତିଜ୍ଞ ପରାମର୍ଶଦାତା ଭି ଅନନ୍ତ ନାଗେଶ୍ୱରନ କହିଛନ୍ତି । ଆର୍ଥିକ ବର୍ଷ ୨୦୨୪-୨୫ ଅବଧିରେ ଦେଶର ମୋଟ୍ ଘରୋଇ ଉତ୍ପାଦ (ଜିଡିପି) ୮% ଛୁଇଁବା ନେଇ ସେ ଆଶାବାଦୀ ଥିବା କହିଛନ୍ତି ।
ସେ ପୁଣି କହିଛନ୍ତି, ଲୋକମାନେ ରିୟଲ ଇଷ୍ଟେଟ କ୍ଷେତ୍ରରେ ନିବେଶ କରୁଛନ୍ତି । ଫଳରେ ପାରିବାରିକ ସଞ୍ଚୟ ୫ ବର୍ଷର ସର୍ବନିମ୍ନ ସ୍ତରରେ ରହିଛି । ସେହିଭଳି ମାର୍ଚ୍ଚରେ ମୁଦ୍ରାସ୍ଫୀତି ୧୦ ମାସର ସର୍ବନିମ୍ନ ସ୍ତର ୪.୮୫% ସ୍ତରରେ ରହିଛି । ଖାଦ୍ୟ ଏବଂ ଇନ୍ଧନ ଦର କମିବା ଯୋଗୁ ଏଭଳି ସ୍ଥିତି ରହିଛି । ଗତ ୪.୫ ବର୍ଷ ହେବ ଖୁଚୁରା ମୁଦ୍ରାସ୍ଫୀତି ୪% ହାର ଉଦ୍ଧ୍ୱର୍ରେ ରହିଛି । ତେବେ ୨୦୨୪ ଜୁଲାଇ ସେପ୍ଟେମ୍ବର ଅବଧିରେ ରିଜର୍ଭ ବ୍ୟାଙ୍କର ଧାର୍ଯ୍ୟ ଲକ୍ଷ୍ୟ ପରିସରକୁ ଏହା ଆସିବାର ଢ଼େର ସମ୍ଭାବନା ରହିଛି । ଟିକସ ଜିଡିପି ଅନୁପାତ ଧିରେ ଧିରେ ଉନ୍ନତି ଆସୁଛି । ଉଭୟ ପ୍ରତ୍ୟକ୍ଷ ଏବଂ ପରୋକ୍ଷ ଟିକସ ଆଦାୟରେ ବୃଦ୍ଧି ହେଉଛି । ଅଭିବୃଦ୍ଧିକୁ ଦେଖିଲେ ଲଗାତାର ୪ ବର୍ଷ ହେବ ଦେଶ ୭% କିମ୍ବା ଉଦ୍ଧ୍ୱର୍ ରହିଛି ବୋଲି ସେ ଉଲ୍ଲେଖ କରିଛନ୍ତି ।