ମାଲକାନଗିରି,୧୩।୫(ଆପ୍ର ):କେତେ ଖୁସିରେ  ୫ବର୍ଷ ପରେ ଭୋଟ ଦେଵା ପାଇଁ ଭୋଟ ପରିଚୟ ପତ୍ର ହାତରେ ଧରି  କଷ୍ଟ କରି ଭୋଟ କେନ୍ଦ୍ର କୁ ଆସିଥିଲେ ଭିନ୍ନକ୍ଷମ ବୃଦ୍ଧ ଦମ୍ପତି। ହେଲେ ବୁଥରେ ଥିବା ଭୋଟର ଲିଷ୍ଟରେ ସେମାନଙ୍କ ନାମ ନଥିବାରୁ ନିରାଶ ହୋଇ ମନଦୁଃଖ ରେ ପୁଣି ଘରକୁ ଫେରିଗଲେ ଏହି ଦମ୍ପତି। ଏମିତି ଦୃଶ୍ୟ ଦେଖିବାକୁ ମିଳିଛି ମାଲକାନଗିରି ଜିଲ୍ଲା ସଦର ମହାକୁମାସ୍ଥ ଏକ୍ସ ବୋର୍ଡ ଭୋଟ କେନ୍ଦ୍ରରେ। 

ଏସଡ଼ିଓ କଲୋନୀର ଭିନ୍ନକ୍ଷମ ବୃଦ୍ଧ ତ୍ରିନାଥ ପୂଜାରୀ ଓ ତାଙ୍କ ର ବୃଦ୍ଧା ପତ୍ନୀ ମୋତି ପୂଜାରୀ ଭୋଟ ଦେଵା ପାଇଁ ଏକ୍ସ ବୋର୍ଡ ସ୍କୁଲ ଭୋଟ କେନ୍ଦ୍ରକୁ ଯାଇଥିଲେ। ସେଠାରେ ସେମାନେ ଅନେକ ସମୟ ଧରି ଲାଇନ ରେ ରହିବା ପରେ ବୁଥ ଭିତରକୁ ଗଲା ପରେ ସେମାନଙ୍କ ନାମ ଲିଷ୍ଟ ରେ ନଥିବାରୁ ସେମାନେ ଭୋଟ ଦେଇ ପାରିବେ ନାହିଁ ବୋଲି ପୁଲିଙ୍ଗ ଅଫିସର କହି ଫେରାଇ ଦେଇଥିଲେ। କେତେ ଆଶା କରି ଏହି ଦମ୍ପତି ଭୋଟ ଦେଵା ପାଇଁ ଯାଇ ଭୋଟ ଦାନ ରୁ ବଞ୍ଚିତ  ହୋଇ ନିରାଶ ହୋଇ ଘରକୁ ଫେରିଛନ୍ତି. ସେମାନଙ୍କ ପରି ଜିଲ୍ଲାର ଅନେକ ବୁଥ ରେ ଏପରି ଘଟଣା ଘଟିଥିବାର ଜଣା ପଡିଛି।

 ପ୍ରତି ୫ ବର୍ଷକୁ ଥରେ ସାଧାରଣ ନିର୍ବାଚନ ହୋଇଥାଏ। ଏହି ମହାନ ପର୍ବରେ ସାମିଲ ହୋଇ ନିଜର ଗଣତନ୍ତ୍ର ଅଧିକାରକୁ ସାବ୍ୟସ୍ତ କରିବା ପାଇଁ ପ୍ରତ୍ୟେକ ଭୋଟର ଆଗ୍ରହ ପ୍ରକାଶ କରିଥାନ୍ତି। କିନ୍ତୁ ମାଲକାନଗିରି ପୌରପରିଷଦ ଅଞ୍ଚଳ କୁମୁଟିଗୁଡା, ଏକ୍ସ ବୋର୍ଡ,ବୁଟିଗୁଡାର ଅନେକ ଭୋଟର ପରିଚୟ ପତ୍ର ଥାଇ ମଧ୍ୟ ଭୋଟର ତାଲିକାରେ ନାମ ନ ଥିବାରୁ ସେମାନେ ମତଦାନ କରିପାରି ନ ଥିବାର ଜଣା ପଡିଛି।

ଆହୁରି ପଢନ୍ତୁ : ରାଜ୍ୟରେ ପ୍ରଥମ ପର୍ଯ୍ୟାୟ ମତଦାନ : ଅପରାହ୍ନ ୩ଟା ସୁଦ୍ଧା କୋଟିଆରେ ୮୦% ମତଦାନ