ନୂଆଦିଲ୍ଲୀ,୩୦/୦୪: ବ୍ୟାଡ଼ମିଣ୍ଟନ କ୍ରୀଡ଼ାରେ ଏଥର ୭ଜଣ ଭାରତୀୟ ଆଗାମୀ ପ୍ୟାରିସ୍ ଅଲିମ୍ପିକ୍ସକୁ ଯୋଗ୍ୟତା ଅର୍ଜନ କରିଛନ୍ତି । ସେମାନେ ହେଲେ ପୂର୍ବତନ ବିଶ୍ୱ ଚାମ୍ପିଅନ୍ ପିଭି ସିନ୍ଧୁ, ଏଚ୍ଏସ୍ ପ୍ରଣୟ, ଲକ୍ଷ୍ୟ ସେନ୍ ଏବଂ ପୁରୁଷ ଡବଲ୍ସରେ ସାତ୍ତ୍ୱିକସାଇରାଜ ରଙ୍କିରେଡ୍ଡୀ-ଚିରାଗ ସେଟ୍ଟୀ ଏବଂ ମହିଳା ଡବଲ୍ସରେ ଅଶ୍ୱିନୀ ପୋନାପ୍ପା-ତନିଶା କ୍ରାଷ୍ଟୋ । ଅଲିମ୍ପିକ୍ସ ମାନ୍ୟତା ତାଲିକା ଆଧାରରେ ସମସ୍ତଙ୍କୁ ଟିକେଟ୍ ମିଳିଛି । ବିଶ୍ୱ ବ୍ୟାଡ଼ମିଣ୍ଟନ ମହାସଂଘ ପକ୍ଷରୁ ନିର୍ଦ୍ଧାରିତ କଟ୍ ଅଫ୍ ତାରିଖ ସୋମବାର ଶେଷ ହୋଇଥିଲା ଏବଂ ନିୟମ ଅନୁଯାୟୀ ମାନ୍ୟତା ତାଲିକାରେ ଶ୍ରେଷ୍ଠ-୧୬ରେ ସାମିଲ୍ ଥିବା ଖେଳାଳିମାନଙ୍କୁ ଅଲିମ୍ପିକ୍ ଟିକେଟ୍ ମିଳିଥିଲା ।
ମହିଳା ସିଙ୍ଗଲ୍ସରେ ଡବଲ୍ ଅଲିମ୍ପିକ୍ ପଦକ ବିଜୟିନୀ ସିନ୍ଧୁ ଅଲିମ୍ପିକ୍ ମାନ୍ୟତା ତାଲିକାରେ ୧୨ତମ ସ୍ଥାନରେ ରହିଥିଲେ। ଫଳରେ ତାଙ୍କ ସ୍ଥାନ ପକ୍କା ହୋଇଯାଇଥିଲା। ବିଡବ୍ଲ୍ୟୁଏଫ୍ ତାଲିକାରେ ସେ ୧୪ତମ ସ୍ଥାନରେ ରହିଛନ୍ତି । ଦକ୍ଷିଣ କୋରିଆର ଆନ୍ ସିୟଙ୍ଗ୍ ଶୀର୍ଷ ସ୍ଥାନରେ ରହିଥିଲେ। ସିନ୍ଧୁ ୨୦୧୬ ରିଓ ଅଲିମ୍ପିକ୍ସରେ ରୌପ୍ୟ ଏବଂ ୨୦୨୦ ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତିଥିଲେ। ପୁରୁଷ ବର୍ଗରେ ଷ୍ଟାର୍ ଖେଳାଳି ପ୍ରଣୟ ଓ ଲକ୍ଷ୍ୟଙ୍କୁ ଟିକେଟ୍ ମିଳିଛି । ଅଲିମ୍ପିକ୍ ମାନ୍ୟତା ତାଲିକାରେ ପ୍ରଣୟ ନବମ ଏବଂ ଲକ୍ଷ୍ୟ ୧୩ତମ ସ୍ଥାନରେ ରହିଥିଲେ । ଏହି ତାଲିକାରେ ଡେନମାର୍କର ଭିକ୍ଟର ଆକ୍ସେଲସେନ ଶୀର୍ଷ ସ୍ଥାନ ବଜାୟ ରଖିଥିଲେ । ଦୀର୍ଘ ୨୦ବର୍ଷ ପରେ ପ୍ରଥମ ଥର ପୁରୁଷ ସିଙ୍ଗଲ୍ସରେ ୨ଜଣ ଭାରତୀୟ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି ।
ପୁରୁଷ ଡବଲ୍ସ ମାନ୍ୟତା ତାଲିକାରେ ସାତ୍ତ୍ୱିକ-ଚିରାଗ ଯୋଡ଼ି ତୃତୀୟ ସ୍ଥାନରେ ରହି ଅଲିମ୍ପିକ୍କୁ ଯୋଗ୍ୟତା ଅର୍ଜନ କରିଛନ୍ତି । ଭାରତୀୟ ଯୋଡ଼ି ଏଥର ଅଲିମ୍ପିକ୍ ପଦକ ଦାବିଦାର ରହିଛନ୍ତି । ଗତ ସଂସ୍କରଣରେ ଉଭୟ ନକ୍ଆଉଟ୍ ରାଉଣ୍ଡ୍କୁ ଯୋଗ୍ୟତା ହାସଲ କରିବାରେ ବିଫଳ ହୋଇଥିଲେ । ସେହିପରି ମହିଳା ଡବଲ୍ସରେ ଅଶ୍ୱିନୀ-ତନିଶା ଯୋଡ଼ି ୧୩ତମ ସ୍ଥାନରେ ରହି ଟିକେଟ୍ ପାଇଛନ୍ତି । ଅନ୍ୟ ପଟରେ ତ୍ରିଶା ଜୋଲି ଓ ଗାୟତ୍ରୀ ଗୋପିଚାନ୍ଦ ଯୋଡ଼ି ଅଳ୍ପକେ ବଞ୍ଚିତ ହୋଇଛନ୍ତି । ଉଭୟ ମିଳିତ ୧୪ତମ ସ୍ଥାନରେ ରହିଥିଲେ ହେଁ ଅନ୍ୟ ଦେଶର ଖେଳାଳିଙ୍କୁ ଟିକେଟ୍ ମିଳିଥିଲା ।