କାଶୀପୁର - କାଶୀପୁର ବ୍ଲକ ସଦର ଏବଂ ଟିକିରି , ମୁଣ୍ଡା ଗାଁ ଭଳି ସ୍ଥାନ ଗୁଡ଼ିକରେ ମହା ଆଡମ୍ବରରେ ଶ୍ରୀରାମ ନବମୀ ପାଳିତ ହୋଇ ଯାଇଛି। ମର୍ଯ୍ୟାଦା ପୁରୁଷ ଶ୍ରୀରାମଙ୍କ ଜୟନ୍ତୀ ପାଳନ ଅବସରରେ କାଶୀପୁର ଏବଂ ଟିକିରି ସ୍ଥିତ ହନୁମାନଗିରି ରାମ ମନ୍ଦିରରେ ଯଜ୍ଞ ସହ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇ ଥିଲା। ଗୌରୀକ ତୋରଣରେ ସହରକୁ ସୁସଜ୍ଜିତ କରିବା ସହିତ ଶ୍ରଦ୍ଧାଳୁଙ୍କ ଜୟ ଶ୍ରୀରାମ ଧ୍ୱନି ଗଗନ ପବନ ପ୍ରକମ୍ପିତ ହୋଇ ଉଠି ଥିଲା। 

ଟିକିରି ଯୁବସଙ୍ଘ ଏବଂ ଶ୍ରୀରାମ ସେନା ପକ୍ଷରୁ ଶ୍ରୀରାମ ରଥ ପରିକ୍ରମା ଏବଂ ଜାମୁଗୁଡା ଠାରୁ ଗୋକୁଳମୁଣ୍ଡ ପର୍ଯ୍ୟନ୍ତ ଶୋଭାଯାତ୍ରା କରାଯାଇ ଥିଲା। ବହୁ ସଂଖ୍ୟାରେ ଶ୍ରଦ୍ଧାଳୁ ଏଥିରେ ସାମିଲ ହୋଇ ଥିଲେ। କାଶୀପୁର ବ୍ଲକ ସଦରରେ ମଧ୍ୟ ନବମୀ ପାଳିତ ହୋଇଛି। ଟିକିରି ହନୁମାନ ଗିରି ଠାରେ ଥିବା ଶ୍ରୀରାମ ମନ୍ଦିରରେ ସ୍ୱତନ୍ତ୍ର ପୂଜାର ବ୍ୟବସ୍ଥା କରାଯାଇ ଥିଲା। ରାଜେସ ସାହୁ, ପ୍ରଫୁଲ୍ଲସାହୁ, ଗଣେଶ ସାହୁ, ଇନ୍ଦ୍ରଜିତ ସାହୁ, ପବିତ୍ର ସାହୁ, ନବୀନ ସାହୁ , ପ୍ରତାପ ସାହୁ ପ୍ରମୁଖ ଏହାର ପରିଚାଳନା କରିଥିଲେ। ଏହି ଉପଲକ୍ଷେ କାଶୀପୁର ଏବଂ ଟିକିରି ସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିରର ଶିଶୁ ମାନଙ୍କ ମଧ୍ୟରେ ଶ୍ରୀରାମ ବେଶ ପ୍ରତିଯୋଗିତାର ଆୟୋଜନ କରାଯାଇ ଥିଲା।