କଟକ,୨୮/୦୪: ଆଜି ଉତ୍କଳ ଗୌରବ ମଧୁସୂଦନ ଦାସଙ୍କ ୧୭୬ ତମ ଜୟନ୍ତୀ । ହେଲେ ତାଙ୍କ ବ୍ୟବହୃତ ସାମଗ୍ରୀଗୁଡିକୁ ସାଇତି ରଖିବା ପାଇଁ କରାଯାଇଥିବା ସଂଗ୍ରହାଳୟ ଏବେ ଅବହେଳିତ ଅବସ୍ଥାରେ ରହିଛି । ସଂଗ୍ରହାଳୟ କାନ୍ଥରେ ହୋଇଥିବା ଉତ୍କଳ ଗୌରବ ମଧୁସୂଦନ ଦାସ ଏବଂ ଶୈଳବାଳା ଦାସଙ୍କ ଫଟୋଚିତ୍ରରୁ ପ୍ଲାଷ୍ଟର୍ ଖସିବା ସହ ରଙ୍ଗ ଛାଡ଼ୁଛି । ସଂଗ୍ରହାଳୟର କାନ୍ଥ ଫାଟି ଆଁ କରିଛି । କବାଟ ଓ ଝରକାରେ ଊଇ ଲାଗିଲାଣି । ମଧୁବାବୁଙ୍କ ପ୍ରତିମୂର୍ତ୍ତିରେ ଧୂଳିର ପରସ୍ତ ପଡ଼ିଛି । ପେଭର୍ ଟାଇଲ୍ଗୁଡ଼ିକ ଦବିଯାଇଥିବା ବେଳେ ସିସିଟିଭି ଲାଗୁନାହିଁ । ଆବଶ୍ୟକ କର୍ମଚାରୀ ବି ନାହାନ୍ତି । ମିଶନ୍ ରୋଡ୍ରେ ଶୈଳବାଳା ମହିଳା ମହାବିଦ୍ୟାଳୟକୁ ଲାଗିଥିବା ମଧୁସୂଦନ ସଂଗ୍ରହାଳୟ ଏବେ ଏପରି ଅବ୍ୟବସ୍ଥାରେ, ଅବହେଳା ଓ ଅଣଦେଖାର ଶିକାର ହୋଇ ପଡ଼ିରହିଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୦୭ ଏପ୍ରିଲ ୨୮ ତାରିଖରେ ଏହି ସଂଗ୍ରହାଳୟକୁ ଉଦ୍ଘାଟନ କରିଥିଲେ । ଏଥିରେ ମଧୁବାବୁଙ୍କ ପୋଷାକ, ଜୋତା, ଟୋପି, ପାନିଆ, ଅତର, ଗ୍ଲାସ, ଥାଳି, ହେମଦସ୍ତା, ଚେୟାର୍, ବେଞ୍ଚ ଏବଂ ଖଟ ଆଦି ସାମଗ୍ରୀ ରହିଛି । ତାଙ୍କର ଅନେକ ଫଟୋକପିକୁ ମଧ୍ୟ ଏଥିରେ ସ୍ଥାନ ଦିଆଯାଇଛି । ଏକ ସ୍ୱତନ୍ତ୍ର ଘରେ ତାଙ୍କ ଖଟକୁ ସ୍ଥାନ ଦିଆଯାଇଛି । ଏହାକୁ ଦେଖିବା ପାଇଁ ପ୍ରାୟ ସମୟରେ ପର୍ଯ୍ୟଟକ ଏବଂ ସ୍କୁଲ, କଲେଜ ଛାତ୍ରଛାତ୍ରୀ ଆସୁଛନ୍ତି । ମଧୁବାବୁଙ୍କ ବିଷୟରେ ଅବଗତ ହେଉଛନ୍ତି । ମାତ୍ର ଏହାର ପାରିପାଶ୍ୱିର୍କ ସ୍ଥିତି ଦେଖିଲେ, ଲାଗୁଛି ଯେମିତି ରାଜ୍ୟ ସଂଗ୍ରହାଳୟ ଓ ଜିଲ୍ଲା ସଂସ୍କୃତି ବିଭାଗ ଏହାର ରକ୍ଷଣାବେକ୍ଷଣ ଦାୟିତ୍ୱ ଭୁଲିଯାଇଛନ୍ତି । କାରଣ ସାମ୍ନା ଗେଟ୍ ଉପରେ ଲେଖା ହୋଇଥିବା ମଧୁସୂଦନ ସଂଗ୍ରହାଳୟର ଏଲ୍ଇଡି ଲାଇଟ୍ରୁ ଅଧିକାଂଶ ଜଳୁନାହିଁ । ସାମ୍ନାରେ ଲାଇଟ୍ ନଥିବାରୁ ଏହା ସବୁବେଳେ ଅନ୍ଧାର ରହୁଛି । ସିସିଟିଭି ଲାଗି ନଥିବାରୁ କିଏ କେତେବେଳେ ଆସୁଛି ତାହାର କୌଣସି ସୂଚନା ରହୁନାହିଁ । ଉଦ୍ଘାଟନୀ ଫଳକକୁ ସଫା କରାଯାଉନଥିବାରୁ ସେଥିରେ ଲେଖା ହୋଇଥିବା ମୁଖ୍ୟମନ୍ତ୍ରୀଙ୍କ ନାମ ଦେଖାଯାଉ ନାହିଁ । ସଂଗ୍ରହାଳୟ ପରିସରରେ ଥିବା ପ୍ରତିମୂର୍ତ୍ତି ପାରା ଏବଂ ଅନ୍ୟାନ୍ୟ ଚଢ଼େଇ ବସି ଅପରିଷ୍କାର କରିଦେଇଛନ୍ତି । କେବଳ ବାହାର ନୁହେଁ ଭିତରେ ମଧ୍ୟ ଏପରି ଅବସ୍ଥା ।
ଏଥିସହିତ ସହରର ବିଭିନ୍ନ ସ୍ଥାନରେ ଥିବା ମଧୁସୂଦନଙ୍କ ପ୍ରତିମୂର୍ତ୍ତିର ମଧ୍ୟ ରକ୍ଷଣାବେକ୍ଷଣ କରାଯାଉନାହିଁ । ମଧୁବାବୁଙ୍କ ଉପରେ ସୂଚନା ଦେବା ପାଇଁ ଆସିଥିବା ମେସିନ୍ଟି ବନ୍ଦ ହୋଇପଡ଼ିଛି । ଏଠାରେ ୩ ଜଣ କର୍ମଚାରୀ ଆବଶ୍ୟକ ଥିବାବେଳେ ଜଣେ ମାତ୍ର କର୍ମଚାରୀ ଅଛନ୍ତି। ସେ ପୁଣି ନେତାଜୀ ସଂଗ୍ରହାଳୟରୁ ଡେପୁଟେସନରେ ଆସିଛନ୍ତି । ଏପରି ନାନା ସମସ୍ୟା ଭିତରେ ସଂଗ୍ରହାଳୟ ରହିଥିବା ବେଳେ ରାଜ୍ୟ ସଂଗ୍ରହାଳୟ ଓ ସଂସ୍କୃତି ବିଭାଗ ଏଥିପ୍ରତି ନଜର ଦେଉନାହିଁ ବୋଲି ମଧୁ ଅନୁଗାମୀମାନେ କହିଛନ୍ତି । ଏହାର ତୁରନ୍ତ ମରାମତି ହେବା ଆବଶ୍ୟକ ବୋଲି ଦାବି କରିଛନ୍ତି । ତେବେ ଏନେଇ ରାଜ୍ୟ ସଂଗ୍ରହାଳୟର ସଚିବ ଅଶ୍ୱିନୀ ଶତପଥୀଙ୍କୁ ଯୋଗାଯୋଗ କରାଯାଇଥିଲେ ହେଁ ତାଙ୍କ ମତାମତ ମିଳିପାରିନାହିଁ ।