କଟକ,୧୧/୦୧: କଟକ ନେତାଜୀ ବସ୍ ଟର୍ମିନାଲ୍ (ସିଏନ୍ବିଟି)ରେ ଗତ କିଛି ମାସ ହେଲା ପାର୍କିଂ ଫି’ ଆଦାୟକୁ ନେଇ ବିଭ୍ରାଟ ଦେଖା ଦେଇଛି । ଟର୍ମିନାଲ୍ ଆରମ୍ଭ ପରଠୁ ପାର୍କିଂ ଫି’ ଆଦାୟ କରୁଥିବା ସଂସ୍ଥା ଦୁଇ ମାସ ହେବ କାମ ଛାଡ଼ି ଦେଇଛି । ବିକଳ୍ପ ବାଟ ନ ପାଇ କଟକ ଉନ୍ନୟନ କର୍ତ୍ତୃପକ୍ଷ (ସିଡିଏ) ଏଠାରେ ନିଜ କର୍ମଚାରୀ ନିୟୋଜିତ କରି ଫି’ ଆଦାୟ କରୁଛନ୍ତି । ଯେଉଁ ସଂସ୍ଥାକୁ ଏହି ଦାୟିତ୍ୱ ମିଳିଥିଲା ସେ ପ୍ରାୟ ୧୬ ଲକ୍ଷ ଟଙ୍କା ବାକି ରଖିଥିବାରୁ ବିବାଦ ଅଧିକ ଘନେଇଛି । ଇତିମଧ୍ୟରେ ନୂଆ ସଂସ୍ଥାକୁ ଦାୟିତ୍ୱ ଦେବାକୁ ସିଡିଏ ପକ୍ଷରୁ ଅବଶ୍ୟ ଟେଣ୍ଡର ସରିଛି । ତେବେ ଠିକା ସଂସ୍ଥା କାମ ଛାଡ଼ି ଚାଲିଯିବା ଓ ନୂଆ ସଂସ୍ଥାକୁ ଦାୟିତ୍ୱ ଦିଆଯାଇନଥିବାରୁ ସିଡିଏ କର୍ତ୍ତୃପକ୍ଷ ବର୍ତ୍ତମାନ ବାଧ୍ୟ ହୋଇ ନିଜ କର୍ମଚାରୀଙ୍କ ଦ୍ୱାରା ଗାଡ଼ିରୁ ଫି’ ଆଦାୟ କରୁଛନ୍ତି । ଗତ ଦେଢ଼ ମାସ ହେବ ନିଜ ମୂଳ କାମ ଛାଡ଼ି ଏନ୍ଫୋର୍ସମେଣ୍ଟ୍ ଟିମ୍ ଗାଡ଼ି ଗଣୁଛନ୍ତି ।
୨୦୨୩ ସେପ୍ଟେମ୍ବର ମାସରେ କାର୍ଯ୍ୟକ୍ଷମ ହୋଇଥିଲା ନେତାଜୀ ବସ୍ ଟର୍ମିନାଲ୍ । ଏହି ସମୟରେ ଟର୍ମିନାଲ୍ ପରିସରରେ ପାର୍କିଂ ହେଉଥିବା ୨ ଓ ୪ ଚକିଆ ଗାଡ଼ି ପାଇଁ ଫି’ ଆଦାୟ କରାଯିବ ବୋଲି ଟର୍ମିନାଲ୍ କର୍ତ୍ତୃପକ୍ଷ ନିଷ୍ପତ୍ତି ନେଇଥିଲେ । ଏହା ପରେ ଏକ ବେସରକାରୀ ସଂସ୍ଥାକୁ ପାର୍କିଂ ଫି’ ଆଦାୟ କରିବା ପାଇଁ ଦାୟିତ୍ୱ ଦିଆଗଲା । ଯାତ୍ରୀ ଆଣୁଥିବା ଦୁଇ ଚକିଆ, ତିନି ଚକିଆ, ଚାରି ଚକିଆ ସହିତ ଜିନିଷପତ୍ର ନେଇ ଆସୁଥିବା ବ୍ୟାବସାୟିକ ଗାଡ଼ି, ଟର୍ମିନାଲ୍ରେ ଥିବା ଦୋକାନୀଙ୍କ ବାଇକ୍ ଓ କାର୍କୁ ପାର୍କିଂରେ ରଖାଇବା ଏବଂ ସେସବୁ ପାଇଁ ଫି’ ଆଦାୟ କରିବାର ଦାୟିତ୍ୱ ସଂସ୍ଥାକୁ ଦିଆଗଲା । ଟେଣ୍ଡର ମାଧ୍ୟମରେ ଏନେଇ ଲାଇସେନ୍ସ ପ୍ରଦାନ କରାଗଲା । ୨୦୨୩ ଅକ୍ଟୋବର ପହିଲାରୁ ଏହି ଫି’ ଆଦାୟ କରାଗଲା । ଟେଣ୍ଡର ନିୟମ ଅନୁସାରେ ଆଦାୟ ଅର୍ଥ ନିର୍ଦ୍ଧାରିତ ସମୟରେ ପୈଠ କରିବାକୁ କୁହାଯାଇଥିଲା । ତେବେ ଲାଇସେନ୍ସ ଅବଧି ବର୍ଷେ ପୂରିବା ପରେ ହଠାତ୍ ନୂଆ ଟେଣ୍ଡର ହୋଇପାରି ନ ଥିଲା । ଏଣୁ ଅସ୍ଥାୟୀ ଭାବେ ସମ୍ପୃକ୍ତ ସଂସ୍ଥା ଫି’ ଆଦାୟ ଚାଲୁ ରଖିବାକୁ ଦାୟିତ୍ୱ ଦିଆଯାଇଥିଲା । ମାତ୍ର ଏହି ସମୟରେ ଆଦାୟ ହୋଇଥିବା ପାର୍କିଂ ବାବଦ ଟଙ୍କା ସମ୍ପୃକ୍ତ ସଂସ୍ଥା ଜମା କଲାନାହିଁ । ଏନେଇ ସିଡିଏ କର୍ତ୍ତୃପକ୍ଷ ଓ ଉକ୍ତ ସଂସ୍ଥା ମଧ୍ୟରେ ନେଇ ତୁ ତୁ ମେ ମେ ଲାଗି ରହିଲା । ଠିକା ସଂସ୍ଥା ଉପରେ ପ୍ରାୟ ୧୬ ଲକ୍ଷ ଟଙ୍କା ବକେୟା ଗଡ଼ି ଚାଲିଲା । ଏଥିରେ ସୁଧାର ନଆସିବାରୁ ଫି’ ଆଦାୟ କରିବାରୁ ଉକ୍ତ ସଂସ୍ଥାକୁ ବାରଣ କରାଗଲା । ତଥାପି ସଂସ୍ଥା ପକ୍ଷରୁ ବାକି ଟଙ୍କା ପୈଠ କରାଗଲାନି ବୋଲି ସିଡିଏ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ନୂଆ ସଂସ୍ଥାକୁ ଫି’ ଆଦାୟ ଦାୟିତ୍ୱ ଦେବାକୁ ସିଡିଏ ପକ୍ଷରୁ ଟେଣ୍ଡର ଆହ୍ୱାନ କରାଯାଇଥିବା ବେଳେ ଡିସେମ୍ବର ୩୦ ତାରିଖରେ ଦାଖଲ ପ୍ରକ୍ରିୟା ଶେଷ ହୋଇଛି । ଖୁବ୍ ଶୀଘ୍ର ଟେଣ୍ଡର ଖୋଲାଯାଇ ନୂଆ ସଂସ୍ଥାକୁ ପାର୍କିଂ ଫି’ଆଦାୟ ଦାୟିତ୍ୱ ଦିଆଯିବ । ପୂର୍ବ ଫି’ ଆଦାୟ ସଂସ୍ଥା ଉପରେ ରହିଥିବା ୧୬ ଲକ୍ଷ ଟଙ୍କା ବକେୟା ଆଦାୟ ପାଇଁ ଆଇନଗତ ପ୍ରକ୍ରିୟା ଚାଲିଥିବା ସିଡିଏ କର୍ତ୍ତୃପକ୍ଷ ସୂଚନା ଦେଇଛନ୍ତି । ସେଯାଏ ସିଡିଏର ଏନ୍ଫୋର୍ସମେଣ୍ଟ ଟିମ୍ ନିଜ ମୂଳ କାମ ଛାଡ଼ି ପାର୍କିଂ ଫି’ ଆଦାୟ କରିବା ଭ୍ରୂକୁଞ୍ଚନ ସୃଷ୍ଟି କରିଛି ।
