ପୁରୀ,୩୦/୦୭: ଚଳିତ ବର୍ଷ ରଥଯାତ୍ରାର ପରଦିନ ଶରଧାବାଲିରେ ଘଟିଥିଲା ହୃଦୟ ବିଦାରକ ଦଳାଚକଟା ଘଟଣା । ଏହି ଅଘଟଣରେ ୩ ଜଣଙ୍କ ମୃତ୍ୟୁ ହୋଇଯାଇଥିଲା । ଅନେକ ଆହତ ହୋଇଥିଲେ । ସରକାର ଏହି ଘଟଣାର ତଦନ୍ତ ନିମନ୍ତେ ଉନ୍ନୟନ କମିଶନରଙ୍କୁ ସ୍ୱତନ୍ତ୍ର ଦାୟିତ୍ୱ ଦେଇଥିଲେ । ଗତ ମାସ ୨୮ ତାରିଖରେ ଘଟଣା ଘଟିଥିବା ବେଳେ ୨୯ ତାରିଖରେ ଏହି ଘଟଣାର ନିର୍ଦ୍ଦେଶନାମା ଜାରି ହୋଇଥିଲା । ଯାହାର ତଦନ୍ତ ମାସକ ମଧ୍ୟରେ ସାରିବାକୁ ସରକାର ନିର୍ଦ୍ଦେଶ ଦେଇଥିଲେ । ମଙ୍ଗଳବାର ଏହି ନିର୍ଦ୍ଦେନାମାକୁ ମାସେ ପୂରିଛି । ଏହି ମାମଲାର ତଦନ୍ତ ହେଲା, ମାସେ ବି ପୂରିଲା । କିନ୍ତୁ ତଦନ୍ତରୁ କ’ଣ ଜଣାପଡ଼ିଲା ତାହା ସ୍ପଷ୍ଟ ହୋଇନି ।
ମାମଲାର ତଦନ୍ତ କରୁଥିବା ଉନ୍ନୟନ କମିଶନର ସେଦିନ ଡ୍ୟୁଟିରେ ମୁତୟନ ପ୍ରଶାସନିକ ଓ ପୁଲିସ ଅଧିକାରୀଙ୍କ ସମେତ ଶ୍ରୀମନ୍ଦିର ପ୍ରଶାସନିକ ଅଧିକାରୀ, ପ୍ରତ୍ୟକ୍ଷଦର୍ଶୀ, ସାଧାରଣ ଲୋକ ଏବଂ ଅନ୍ୟମାନଙ୍କୁ ପଚରାଉଚରା କରିବା ସହିତ ଘଟଣା ସମ୍ପର୍କରେ ମତ ରଖିଥିଲେ । ଏପରିକି ତଥ୍ୟ ମଧ୍ୟ ଯୋଗାଡ଼ କରିଥିଲେ । ସମସ୍ତ ବୟାନକୁ ରେକର୍ଡ କରାଯାଇଥିଲା । ସେହିପରି ସ୍ୱତନ୍ତ୍ର ୱାଟର୍ସ ଆପ୍ ଓ ଇମେଲ୍ ଯୋଗେ ଫଟୋ ଏବଂ ଭିଡିଓ ମଧ୍ୟ ଲୋକଙ୍କଠାରୁ ଆହ୍ୱାନ କରାଯାଇଥିଲା ।
ପ୍ରଶାସନ ପାଖରେ ରଥଯାତ୍ରା ବେଳେ ଲାଗିଥିବା ଏଏଆଇ କ୍ୟାମେରା ଭିଡିଓ ଫୁଟେଜ୍ରେ ସମସ୍ତ ଅଘଟଣର ଦୃଶ୍ୟ ସହିତ ଦାୟିତ୍ୱରେ ଖିଲାପ କରିଥିବା ପ୍ରଶାସନିକ ଅଧିକାରୀଙ୍କ ବିଷୟରେ ସମସ୍ତ ତଥ୍ୟ ରହିଛି । ମାତ୍ର ଏପର୍ଯ୍ୟନ୍ତ ସରକାର ଏହି ଘଟଣାରେ ଉଲ୍ଲେଖନୀୟ କାର୍ଯ୍ୟାନୁଷ୍ଠାନ ନେଇନାହାନ୍ତି । ଅଘଟଣ ପରଦିନ କେବଳ ଦୁଇ ଜଣ ପୁଲିସ ଅଧିକାରୀଙ୍କୁ ନିଲମ୍ବନ କରାଯାଇଥିଲା । ଯେତେବେଳେ କି ଜିଲ୍ଲାପାଳ ଓ ଏସ୍ପିଙ୍କ ତତ୍କାଳ ବଦଳି କରାଯାଇଥିଲା । ଏହି ଅଘଟଣ ପାଇଁ କିଏ ଦାୟୀ ତାହା ଏପର୍ଯ୍ୟନ୍ତ ପ୍ରଶାସନ ସ୍ପଷ୍ଟ କରିନି କିମ୍ବା ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ହୋଇନି ।
