ନୂଆଦିଲ୍ଲୀ,୦୨/୦୮: କୁନି ଝିଅଟି । କଣ ବା ଭୁଲ ଥିଲା । କେବଳ 'ରାଧେ ରାଧେ' କହି ସ୍କୁଲ ପ୍ରିନ୍ସିପାଲଙ୍କୁ ଅଭିବାଦନ ଜଣାଇଥିଲେ । ହେଲେ ଏହାକୁ ଗ୍ରହଣ କରିପାରିଲେ ନାହିଁ ପ୍ରିନ୍ସିପାଲ । କୁନି ଛାତ୍ରୀଜଣଙ୍କୁ ମାଡ଼ ମାରିବା ସହ ମୁହଁରେ ସେଲୋଟେପ୍ ଲଗାଇଦେଲେ । ଛତିଶଗଡ ଦୁର୍ଗ ଜିଲ୍ଲାରୁ ଏପରି ଅଶୋଭନୀୟ ଘଟଣା ସାମ୍ନାକୁ ଆସିଛି ।
ସ୍କୁଲ ପ୍ରିନ୍ସିପାଲ ଜଣେ ନର୍ସରୀ ଛାତ୍ରୀଙ୍କୁ ମାଡି ମାରିବା ସହ ତାଙ୍କ ପାଟିରେ ସେଲୋଟେପ୍ ଲଗାଇ ବନ୍ଦ କରି ଦେଇଥିବା ଅଭିଯୋଗରେ ଗିରଫ ହୋଇଛନ୍ତି । ଛାତ୍ରୀଟି ‘ରାଧେ ରାଧେ’କହି ଅଭିବାଦନ ଜଣାଇବାରୁ ସ୍କୁଲ ପ୍ରଧାନଶିକ୍ଷକ ଜଣକ ରାଗି ଯାଇ ଆକ୍ରମଣାତ୍ମକ ହୋଇ ଉଠିଥିଲେ। ଦୁର୍ଗ ଜିଲ୍ଲା ନନ୍ଦିନୀ ଥାନା ଅଞ୍ଚଳର ବାଗଡୂମର ଗାଁରେ ଅବସ୍ଥିତ ମଦର ଟେରେସା ଇଂରାଜୀ ମାଧ୍ୟମିକ ସ୍କୁଲରେ ଏହି ଘଟଣା ଘଟିଛି । ଅଧିକାରୀଙ୍କ କହିବା ଅନୁଯାୟୀ, ସାଢେ ତିନି ବର୍ଷର ଉକ୍ତ ଛାତ୍ରୀଙ୍କୁ ପ୍ରିନ୍ସିପାଲ ଇଲା ଇଭାନ କୋଲଭିନ ‘ରାଧେ ରାଧେ’କହି ଅଭିବାଦନ ଜଣାଇଥିବାରୁ ଦଣ୍ଡ ଦେଇଥିଲେ। ସେ ପ୍ରଥମେ ଛାତ୍ରୀଙ୍କୁ ମାରିଥିଲେ ଏବଂ ତା ପରେ ତାଙ୍କ ମୁହଁରେ ସେଲୋଟେପ ଲଗାଇ ଦେଇଥିଲେ।
ଅଭିଯୋଗ ଆଧାରରେ,ପୁଲିସ କୋଲଭିନଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତା (ବିଏନଏସ)ର ଧାରା ୧୧୫(୨) ଏବଂ ୨୯୯ ସହିତ ଜୁଭେନାଇଲ ଜଷ୍ଟିସ (ଶିଶୁ ଯତ୍ନ ଓ ସୁରକ୍ଷା) ଆଇନର ଧାରା ୭୫ ଅନୁଯାୟୀ ମାମଲା ରୁଜୁ କରିଛି, ଯାହା ଶିଶୁମାନଙ୍କୁ ଆଘାତ ଦେବା, ଧାର୍ମିକ ଭାବନାକୁ ଆଘାତ କରିବା ଏବଂ ନିଷ୍ଠୁରତା ସହ ଜଡିତ।
ପୁଲିସ କହିଛି ଯେ, ଏହି କାର୍ୟ୍ୟାନୁଷ୍ଠାନ ଶିଶୁଙ୍କ ପରିବାରର ବିସ୍ତୃତ ବୟାନ ଏବଂ ପ୍ରାଥମିକ ଚିକିତ୍ସା ରିପୋର୍ଟ ପରେ କରାଯାଇଛି। ସ୍କୁଲ ପ୍ରଶାସନ ପକ୍ଷରୁ ଏପର୍ୟ୍ୟନ୍ତ କୌଣସି ପ୍ରତିକ୍ରିୟା ଦେଇନାହିଁ ।
