ଗୁଜୁରାଟ, ୬।୧୨: ପାଠ ପଢ଼ା ଦରକାର ନାହିଁ, କେବଳ ୭୦ ହଜାର ଟଙ୍କା ଦିଅ ଡାକ୍ତରୀ ଡିଗ୍ରୀ ନିଅ । ମାତ୍ର, ଅଷ୍ଟମ ଶ୍ରେଣୀ ପାସ୍ କରିଥିବା ଲୋକେ ମଧ୍ୟ ଏହି ଡାକ୍ତରୀ ସାର୍ଟିଫିକେଟ୍ କିଣି ପାଲଟିଥିଲେ ଡାକ୍ତର । ଏଭଳି ଏକ ରାକେଟ୍କୁ ଫର୍ଦ୍ଦାଫାସ କରିଛି ଗୁଜରାଟର ସୁରଟ ପୁଲିସ । ଏହି ଗ୍ୟାଙ୍ଗର ମୁଖ୍ୟଙ୍କ ସହିତ ଟଙ୍କା ଦେଇ ଡାକ୍ତରୀ ଡିଗ୍ରୀ କିଣିଥିବା ୧୪ ନକଲି ଡାକ୍ତରଙ୍କୁ ପୁଲିସ ଗିରଫ କରିଛି । ଏହି ଗ୍ୟାଙ୍ଗର ମୁଖ୍ୟ ଅଭିଯୁକ୍ତଙ୍କ ନାଁ ଡାକ୍ତର ରମେଶ ଗୁଜରାଟୀ । ଏହି ଗ୍ୟାଙ୍ଗର ଡାଟାବେସ୍ରେ ୧୨୦୦ଟି ନକଲି ଡାକ୍ତରୀ ଡିଗ୍ରୀ ଥିବା ଜଣାପଡ଼ିଛି ।
ପୁଲିସର ସୂଚନାନୁସାରେ, ସେମାନଙ୍କର ସଂସ୍ଥା (ବୋର୍ଡ ଅଫ୍ ଇଲେକ୍ଟ୍ରୋ ହୋମିଓପାଥି, ଗୁଜରାଟ) ରାଜ୍ୟ ସରକାରଙ୍କ ଆୟୁଷ ବିଭାଗ ସହିତ ଚୁକ୍ତି କରିଛି ବୋଲି ଲୋକଙ୍କୁ କହିଥିଲେ । ଡାକ୍ତରୀ ଡିଗ୍ରୀ ପ୍ରଦାନ କରିବାକୁ ଓ ପ୍ରଶିକ୍ଷଣ ଦେବାକୁ ସେମାନେ ପ୍ରତ୍ୟେକ ଲୋକଙ୍କଠାରୁ ୭୦ ହଜାର ଟଙ୍କା ନେଉଥିଲେ । ଏହା ସହିତ ସେମାନେ ନକଲି ଡାକ୍ତରମାନଙ୍କୁ କହୁଥିଲେ ଯେ, ସେମାନେ ଏହି ସାର୍ଟିଫିକେଟ୍ ଦ୍ୱାରା ଏଲୋପାଥି ଓ ହୋମିଓପାଥି ଚିକିତ୍ସା କରିପାରିବେ । ଟଙ୍କା ପାଇବାର ମାତ୍ର, ୧୫ ଦିନ ମଧ୍ୟରେ ମିଳୁଥିଲା ଡାକ୍ତରୀ ଡିଗ୍ରୀ । କିନ୍ତୁ, ଏହି ଡିଗ୍ରୀ ବୈଧ ଅବଧି ରହିଥିଲା । ପ୍ରତିବର୍ଷ ସେଗୁଡ଼ିକର ରିନ୍ୟୁ କରିବାକୁ ଏ ବାବଦକୁ ୫ ହଜାରରୁ ୧୫ ହଜାର ଟଙ୍କା ଦାବି କରୁଥିଲେ । ଯଦି କୌଣସି ନକଲି ଡାକ୍ତର ରିନ୍ୟୁ କରିବାକୁ ଫି’ ଦେଉନଥିଲେ, ତେବେ ଗ୍ୟାଙ୍ଗର ସଦସ୍ୟମାନେ ସେମାନଙ୍କୁ ଧମକଚମକ ଦେଉଥିଲେ ।
