ପୁରୀ,୦୭/୦୫: ମହାପ୍ରଭୁଙ୍କ ରଥ ନିର୍ମାଣ ପାଇଁ ରଥଖଳା ଚଳଚଞ୍ଚଳ । ପର୍ଯ୍ୟାୟକ୍ରମେ ପ୍ରସ୍ତୁତ ହେଉଛି ରଥ ଚକ । ମଙ୍ଗଳବାର ପୂଜାର୍ଚ୍ଚନା ପରେ ତୁମ୍ବରେ ବିନ୍ଧ ଅନୁକୂଳ କରାଯାଇଛି । ମାହାର୍ଦ୍ଦ ସମର୍ପଣ କରି ଶ୍ରୀଫଳ ଭାଙ୍ଗିବା ସହ ଠାକୁରଙ୍କୁ ସୁମରଣା କରି ତିନି ରଥର ମୁଖ୍ୟ ବିଶ୍ୱକର୍ମା ବିନ୍ଧ ଖୋଦେଇ କାର୍ଯ୍ୟର ଶୁଭାରମ୍ଭ କରିଛନ୍ତି । ନାହାକା ତୁମ୍ବରେ ସର୍ବପ୍ରଥମେ ବିନ୍ଧ ଅନୁକୂଳ ହୋଇଛି । ପରମ୍ପରା ଅନୁଯାୟୀ ବଡ଼ଭାଇ ଶ୍ରୀବଳଭଦ୍ରଙ୍କ ତାଳଧ୍ୱଜ ରଥରୁ ତୁମ୍ବ ଅନୁକୂଳ କାର୍ଯ୍ୟ ଆରମ୍ଭ ହୋଇଛି ।
ସେହିପରି ଦୋଳବେଦିରେ ପନ୍ଦାରି ବଳା ତିଆରି ଚାଲିଛି । ରଥ ନିର୍ମାଣର ପରମ୍ପରା ରହିଛି । ତୁମ୍ବରେ ସୂତା ବାଡ଼ିଆ ପରେ ସାତ ଦିନରେ ବିନ୍ଧ ଅନୁକୂଳ ହେବା କଥା । ଏଥର କାର୍ଯ୍ୟରେ ତତ୍ପରତା ପ୍ରକାଶ ପାଇ ଷଷ୍ଠ ଦିବସରେ ବିନ୍ଧ ଅନୁକୂଳ ହେଲା । ରଥର ନାହାକା ତୁମ୍ବକୁ ଗଡ଼ାଇ ଆଣି ଭୋଇ ସେବକମାନେ ସାଇଜ କରି ରଖିଥିଲେ । ମୁଖ୍ୟ ବିଶ୍ୱକର୍ମା ପ୍ରଥମେ ନିହଣ ଓ ମୁଗୁର ସାହାଯ୍ୟରେ ବିନ୍ଧ ଖୋଦେଇ ଅନୁକୂଳ କରିଥିଲେ । ନାହାକା ତୁମ୍ବକୁ ରଥ ନିର୍ମାଣ ପ୍ରକ୍ରିୟାରେ ସ୍ୱତନ୍ତ୍ର ସ୍ଥାନ ଦିଆଯାଏ । ଏବେ ବିଶ୍ୱକର୍ମାମାନେ ତିନି ରଥର ତୁମ୍ବ କାର୍ଯ୍ୟ ଜାରି ରଖିଛନ୍ତି । ଗୋଟିଏ ତୁମ୍ବରେ ୧୬ ଯୋଡ଼ା ବିନ୍ଧ ଖୋଦେଇ ହେଉଛି । ଆଜି କାର୍ଯ୍ୟ ଶେଷ ସୁଦ୍ଧା ତିନି ରଥର ମୋଟ ୪୨ ତୁମ୍ବରୁ ୨୧ଟିରେ ବିନ୍ଧ ସରିଛି ।
ଏପଟେ କରତି ସେବକ ତୁମ୍ବର ଘେର କାଟୁଛନ୍ତି । ତୁମ୍ବ ବିନ୍ଧର ଆକାର ଆୟତାକାର । ଏହାର ଲମ୍ବ ୩ ଇଞ୍ଚ, ଓସାର ପ୍ରାୟ ୨ ଇଞ୍ଚ ଓ ୫ ଇଞ୍ଚ ଗଭୀର । ମଜଭୁତି ପାଇଁ ଦୁଇ ବିନ୍ଧର ମଝିରେ ଇଞ୍ଚେ ମାପର କାଠ ଛଡ଼ା ଯାଉଛି । ବିନ୍ଧରେ ଭୁଞ୍ଜାଯିବ ଅର(ସ୍ପୋକ୍) । ଗୋଟିଏ ଚକରେ ଲାଗିହୁଏ ୧୬ଟି ଅର । ଏହାର ଗୋଟିଏ ମୁହଁକୁ କଟାଯାଇ ଦୁଇଟି ଦାନ୍ତି ଭଳି ତିଆରି ହେବ । ଯାହାକୁ କୁହାଯାଏ ‘ସାଲ’ । ଅରର ଦୁଇ ସାଲକୁ ତୁମ୍ବର ଦୁଇ ବିନ୍ଧରେ ଭୁଞ୍ଜି ପହି ସଂଯୁକ୍ତ ହେଲେ ଚକ ପ୍ରସ୍ତୁତ ହେବ । ସେପଟେ ଦୋଳବେଦି ପରିସରରେ ଠାକୁରଙ୍କ କମାର ସେବକମାନେ ରଥ ପାଇଁ ଆବଷ୍ୟକ ଲୁହା ସାମଗ୍ରୀମାନ ପ୍ରସ୍ତୁତ କରୁଛନ୍ତି । ଅରକଣ୍ଟା ତିଆରି ସହ ପନ୍ଦାରି ବଳା ତିଆରି ଆରମ୍ଭ କରିଛନ୍ତି । ମଙ୍ଗଳବାର ରଥ ନିର୍ମାଣ କାର୍ଯ୍ୟରେ ୧୦୭ ଜଣ ନିୟୋଜିତ ହୋଇଥିଲେ ।
