ରାୟପୁର,୦୧/୧୧: ଛତିଶଗଡ଼ ଇତିହାସରେ ନଭେମ୍ବର ୧ରେ ନୂଆ ଅଧ୍ୟାୟ ଯୋଡ଼ିହେବାକୁ ଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ରାଜ୍ୟବାସୀଙ୍କ ପାଇଁ ନୂଆ ବିଧାନସଭା ଭବନ ଲୋକାର୍ପିତ କରିବେ । ଏହି ଅବସରରେ ମୋଦି ପ୍ରାୟ ୧୪,୨୬୦ କୋଟି ଟଙ୍କାର ବିଭିନ୍ନ ପ୍ରକଳ୍ପର ଲୋକାର୍ପଣ ଏବଂ ଶିଳାନ୍ୟାସ ମଧ୍ୟ କରିବେ ।
୨୦୦୦ ମସିହାରେ ରାଜ୍ୟ ଗଠନ ପରେ ରାୟପୁରର ରାଜକୁମାର କଲେଜରେ ଆରମ୍ଭ ହୋଇଥିବା ଛତିଶଗଡ଼ ବିଧାନସଭା ୨୫ ବର୍ଷ ପରେ ଏହାର ରୌପ୍ୟଜୟନ୍ତୀ ବର୍ଷରେ ନିଜର ଭବ୍ୟ, ଆଧୁନିକ ଏବଂ ସୁସଜ୍ଜିତ ସ୍ଥାୟୀ ବିଧାନସଭା କୋଠା ପାଇବ । ଏହା କେବଳ ଏକ ଗୃହ ନୁହେଁ ବରଂ ଛତିଶଗଡ଼ର ସମୃଦ୍ଧ ସଂସ୍କୃତି, ପରମ୍ପରା ଏବଂ ବିଶ୍ୱାସର ପ୍ରତୀକ । ‘ଧାନର ପାତ୍ର’ କୁହାଯାଉଥିବା ଛତିଶଗଡ଼ର ପରିଚୟ ଏହି କୋଠାର ସ୍ଥାପତ୍ୟରେ ସୁନ୍ଦର ଭାବେ ସ୍ଥାନିତ କରାଯାଇଛି । ବିଧାନସଭା ଗୃହର ଛାତ ଧାନ କେଣ୍ଡା, ପତ୍ର ଆଦି ଖୋଦେଇ ହୋଇଛି, ଯାହା ରାଜ୍ୟର କୃଷି ସଂସ୍କୃତିର ପ୍ରତୀକ । କୋଠାର ଅଧିକାଂଶ ଦ୍ୱାର ଏବଂ ଫର୍ଣ୍ଣିଚର ବସ୍ତରର ପାରମ୍ପରିକ କାଠ କାରିଗରଙ୍କ ଦ୍ୱାରା ତିଆରି ହୋଇଛି । ତେଣୁ ନୂତନ ବିଧାନସଭା କୋଠା ଆଧୁନିକତା ଏବଂ ପରମ୍ପରାର ଏକ ଜୀବନ୍ତ ମିଶ୍ରଣ ବୋଲି କୁହାଯାଇଛି । ୩୨୪ କୋଟି ଟଙ୍କା ବ୍ୟୟରେ ୫୧ ଏକରରେ ଏହି କୋଠା ନିର୍ମାଣ ହୋଇଛି । କୋଠାକୁ ୱିଙ୍ଗ୍-ଏ, ୱିଙ୍ଗ୍-ବି ଏବଂ ୱିଙ୍ଗ୍-ସି ଭାଗରେ ବିଭକ୍ତ କରାଯାଇଛି । ଏଥିରେ ପରିବେଶ ଉପଯୋଗୀ ଗ୍ରୀନ୍ ଟେକ୍ନୋଲୋଜି ବ୍ୟବହାର ହୋଇଛି । କୋଠାରେ ୫୦୦ ଆସନ ବିଶିଷ୍ଟ ଅଡିଟୋରିୟମ ଏବଂ ୧୦୦ ଆସନ ବିଶିଷ୍ଟ କେନ୍ଦ୍ରୀୟ ହଲ୍ ରହିଛି ।
