ନୂଆଦିଲ୍ଲୀ ୨୨/୦୬: ଅଫିସ୍ ଭିତରେ କଦାପି ପ୍ରବେଶ ନ କରି ମଧ୍ୟ ଆବୁଧାବିର ଜଣେ କର୍ମଚାରୀ ୨୬ ଲକ୍ଷ ଟଙ୍କା ଦରମା ପାଇଛନ୍ତି । କମ୍ପାନି ବିରୋଧରେ ଏକ ମାମଲା ଜିତିବା ପରେ କ୍ଷତିପୂରଣ ରୂପେ ସେ ଏହି ରାଶି ପାଇଛନ୍ତି । ନିଯୁକ୍ତି ଚୁକ୍ତିନାମା ପାଳନ କରିବାରେ କମ୍ପାନି ବିଫଳ ହେବାରୁ କମ୍ପାନି ବିରୋଧରେ ସେ କୋର୍ଟର ଦ୍ୱାରସ୍ଥ ହୋଇଥିଲେ । କର୍ମଚାରୀ ଜଣକ କମ୍ପାନି ସହ ଏକ ନିଶ୍ଚିତ-ଅବଧି ଚୁକ୍ତିନାମା ସ୍ୱାକ୍ଷର କରିଥିଲେ, ଯେଉଁଥିରେ ମୂଳ ଦରମା ୭,୨୦୦ ଆରବ ଏମିରେଟ୍ସ ଧିରାମ ଓ ମାସିକ କ୍ଷତିପୂରଣ ପ୍ୟାକେଜ୍ ୨୪,୦୦୦ ଆରବ ଏମିରେଟ୍ସ ଧିରାମ ଥିଲା । ଏହି ଚୁକ୍ତିନାମା ନଭେମ୍ବର ୧୧, ୨୦୨୪ରୁ ଏପ୍ରିଲ ୭, ୨୦୨୫ ପର୍ଯ୍ୟନ୍ତ ଥିଲା । କିନ୍ତୁ ବୈଧ ଅଫର ଲେଟର୍ ଓ ସମସ୍ତ ଔପଚାରିକତା ସତ୍ତେ୍ୱ କମ୍ପାନି ତାଙ୍କୁ କାମ ଆରମ୍ଭ କରିବାକୁ କଦାପି ଅନୁମତି ଦେଲା ନାହିଁ ।
କର୍ମଚାରୀ ଆବୁଧାବି ଲେବର କୋର୍ଟରେ ମାମଲା ଉପସ୍ଥାପନ କଲେ । କୋର୍ଟଙ୍କ ନିର୍ଦ୍ଦେଶ ତାଙ୍କ ସପକ୍ଷରେ ଗଲା । ନିଯୁକ୍ତି ଚୁକ୍ତିନାମା ଆଇନ ଅନୁସାରେ ବୈଧ ଥାଇ ମଧ୍ୟ କର୍ମଚାରୀଙ୍କୁ ଔପଚାରିକ ରୂପେ କାମରେ ନିଯୁକ୍ତ କରାଯାଇନାହିଁ ବୋଲି କୋର୍ଟ ସ୍ପଷ୍ଟ କଲେ । କୋର୍ଟ ଆହୁରି କହିଲେ, ପାରିଶ୍ରମିକ ରିପୋର୍ଟ, ନିଯୁକ୍ତି ଚୁକ୍ତିନାମା ଓ ତତ୍ସମ୍ବନ୍ଧୀୟ ଦସ୍ତାବିଜ୍ରୁ ସ୍ପଷ୍ଟ ହେଉଛି ଯେ କର୍ମଚାରୀଙ୍କ କାମ ଆରମ୍ଭରେ ବିଳମ୍ବର କାରଣ କମ୍ପାନି । ତେବେ କମ୍ପାନି କୋର୍ଟରେ ଦାବି କରିଥିଲା ଯେ କର୍ମଚାରୀ ଛୁଟିରେ ଥିଲେ ଏବଂ ଡ୍ୟୁଟିକୁ ଫେରିବା କଥା ରିପୋର୍ଟ କରିନଥିଲେ । କିନ୍ତୁ କୋର୍ଟ ଏହାର କୌଣସି ଔପଚାରିକ ଯାଞ୍ଚ୍ମୂଳକ ପ୍ରମାଣ ପାଇଲେ ନାହିଁ । କର୍ମଚାରୀ କମ୍ପାନିରୁ ୮ ଦିନର ଛୁଟି ନେଇଥିବା କଥା ସ୍ୱୀକାର କଲେ । ତେଣୁ ତାଙ୍କର ମୋଟ୍ କ୍ଷତିପୂରଣ ଦାବିରୁ ଏହି ଅର୍ଥକୁ କଟାଗଲା । ଶେଷରେ ତାଙ୍କୁ ୪ ମାସ ୧୮ ଦିନ ପାଇଁ ପାରିଶ୍ରମିକ କ୍ଷତିପୂରଣ ମିଳିଲା ।
