ବିଶାଖାପାଟ୍ଟଣମ୍, ୦୫/୦୨: ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟକୁ ଭାରତ ୧୦୬ ରନରେ ଜିତି ନେଇଛି । ବିଶାଖାପାଟ୍ଟଣମ୍ ଟେଷ୍ଟ ଜିତିବା ସହ ୧-୧ରେ ବରାବର ହୋଇଛି ସିରିଜ୍ । ଭାରତ ପକ୍ଷରୁ ଯଶପ୍ରୀତ ବୁମରା ଓ ଯଶସ୍ୱୀ ଜୟସୱାଲ, ଶୁବମନ ଗିଲ୍ ଓ ରବିଚନ୍ଦ୍ରନ ଅଶ୍ୱୀନ ଚମକପଦ ପ୍ରଦର୍ଶନ କରିଥିଲେ । ପ୍ରଥମପାଳିରେ ଜୟସୱାଲ୍ ୨୦୯ ରନ୍ କରିଥିଲେ । ଯେତେବେଳେ କି ବୁମରା ପୂରା ମ୍ୟାଚରେ ୯ ୱିକେଟ୍ ନେଇଥିବା ବେଳେ ଚତୁର୍ଥ ଦିନରେ ସରି ଯାଇଛି ମ୍ୟାଚ୍ ।
ମୁକାବିଲାରେ ୩୯୯ ରନର ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇ ଥିବା ଇଂଲଣ୍ଡ ଦଳ ୨୯୨ ରନରେ ଅଲଆଉଟ୍ ହୋଇ ଯାଇଛି । ଦ୍ୱିତୀୟ ପାଳିରେ ଇଂଲଣ୍ଡ ପକ୍ଷରୁ ଜ୍ୟାକ କ୍ରଲି ସର୍ବାଧିକ ୭୩ ରନ୍ କରିଥିଲେ । ଜ୍ୟାକଙ୍କୁ ବାଦ୍ ଦେଲେ ଇଂଲଣ୍ଡର କୌଣସି ଖେଳାଳି ବଡ଼ ପାଳି ଖେଳିବାରେ ସକ୍ଷମ ହୋଇ ନଥିଲେ ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା ଭାରତ । ପ୍ରଥମ ଇନିଂସରେ ଘରୋଇ ଦଳ ୩୯୬ ରନ୍ କରିଥିଲା । ଦଳ ପକ୍ଷରୁ ଯଶସ୍ୱୀ ଜୟସୱାଲ ସର୍ବାଧିକ ୨୦୯ ରନ୍ କରିଥିଲେ । ୧୯ ଚଉକା ସହ ୭ଟି ଛକ୍କା ମାରିଥିଲେ ଜୟସୱାଲ୍ । ତେବେ ଜୟସୱାଲଙ୍କୁ ବାଦ୍ ଦେଲେ ଅନ୍ୟ କୌଣସି ଭାରତୀୟ ବ୍ୟାଟ୍ସମ୍ୟାନ୍ ବଡ଼ ପାଳି ଖେଳି ପାରି ନଥିଲି ।
ପ୍ରଥମ ପାଳିରେ ଭ୍ରମଣକାରୀ ଦଳ ୨୫୩ ରନ୍ କରି ପାରିଥିଲା । ଏହା ପରେ ଦ୍ୱିତୀୟ ପାଳିରେ ଭାରତ ୨୫୫ ରନ୍ କରି ଇଂଲଣ୍ଡ ଆଗରେ ୩୯୯ ରନର ବିଜୟ ଲକ୍ଷ୍ୟ ରଖିଥିଲା । ୩୯୯ ରନର ବିଶାଳ ବିଜୟ ଲକ୍ଷ୍ୟ ପିଛା କରୁଥିବା ଇଂଲଣ୍ଡ କ୍ରିଜରେ ତିଷ୍ଠି ପାରି ନଥିଲା । ଦ୍ୱିତୀୟ ପାଳିରେ ଦଳ ୨୯୨ ରନରେ ଅଲଆଉଟ୍ ହୋଇ ଯାଇଛି ।
