ମୁମ୍ବାଇ,୨୬/୦୭: ଆଗାମୀ ୨୦୨୫ ଆଇପିଏଲ୍ ସିଜନ ପୂର୍ବରୁ ହେବ ମେଗା ନିଲାମ । ଏଥିପାଇଁ ଆଇପିଏଲ ଆୟୋଜକ କମିଟି ପ୍ରସ୍ତୁତି ଆରମ୍ଭ କରିଛି । ଫ୍ରାଞ୍ଚାଇଜ୍ଙ୍କ ମତାମତ ନେଇସାରିଛି ଆୟୋଜକ କମିଟି । ଏଣିକି ୩ବର୍ଷ ବଦଳରେ ପ୍ରତି ୫ବର୍ଷରେ ଥରେ ମେଗା ନିଲାମ ଆୟୋଜନ କରିବାକୁ ଫ୍ରାଞ୍ଚାଇଜମାନେ ପ୍ରସ୍ତାବ ଦେଇଛନ୍ତି । ସେହିପରି ମେଗା ନିଲାମ ପୂର୍ବରୁ ୪ରୁ ୬ଜଣ ଖେଳାଳି ପ୍ରତିଧାରଣ କରିବାର ଅନୁମତି ମିଳିବା ସହ ୮ଟି ‘ରାଇଟ ଟୁ ମ୍ୟାଚ୍’ କାର୍ଡର ବ୍ୟବହାର କରିବା ପାଇଁ ନୂଆ ନିୟମ ପ୍ରଣୟନ କରିବାକୁ ଫ୍ରାଞ୍ଚାଇଜମାନେ ଦାବି କରିଛନ୍ତି । ଆସନ୍ତା ସପ୍ତାହରେ ବୈଠକ ଆୟୋଜନ କରାଯାଇ ଚୂଡ଼ାନ୍ତ ନିଷ୍ପତ୍ତି ନିଆଯିବ ।
ମେଗା ନିଲାମ ପାଇଁ ୫ବର୍ଷର ଅବଧି ରଖିବା ପଛରେ ମୁଖ୍ୟ କାରଣ ହେଉଛି ଯୁବ ତଥା ଉଦୀୟମାନ ଖେଳାଳିଙ୍କୁ ଆଗାମୀ ଦିନ ପାଇଁ ପ୍ରସ୍ତୁତ କରିବା ସହଜ ହେବ । ୨୦୦୮ରୁ ଫ୍ରାଞ୍ଚାଇଜମାନେ ଉଦୀୟମାନ ଯୁବ ଖେଳାଳିଙ୍କୁ ଖୋଜିବା ଓ ସେମାନଙ୍କୁ ଭବିଷ୍ୟତର ଷ୍ଟାର ଭାବେ ପ୍ରସ୍ତୁତ କରିବା ପାଇଁ ବହୁ ଅର୍ଥ ବିନଯୋଗ କରୁଛନ୍ତି । ଏକାଡେମୀ ଗଠନ କରିବା, ତୃଣମୂଳ ସ୍ତରରୁ ଯୁବ ପ୍ରତିଭାଙ୍କୁ ଖୋଜି ବାହାର କରିବାରେ ବହୁ ସମୟ ଓ ଅର୍ଥ ଅପଚୟ ହେଉଛି । ମାତ୍ର ସେମାନଙ୍କ ଖେଳିବା ସମୟ ଆସିବା ବେଳକୁ ମେଗା ନିଲାମର ସମୟ ହୋଇ ଯାଉଛି ଓ ଅନ୍ୟ ଫ୍ରାଞ୍ଚାଇଜମାନେ ସେମାନଙ୍କୁ କିଣି ନେଉଛନ୍ତି । ୨୦୧୮ରେ ପ୍ରଥମ ମେଗା ନିଲାମ ହୋଇଥିଲା । ୨ବର୍ଷ ଲେଖାଏଁ ନିଲମ୍ବିତ ହୋଇଥିବା ଚେନ୍ନାଇ ସୁପରକିଙ୍ଗ୍ସ ଓ ରାଜସ୍ଥାନ ରୟାଲ୍ସ ସେତେବେଳେ ପ୍ରତ୍ୟାବର୍ତ୍ତନ କରିଥିଲେ । ଏହାପରେ ୨୦୨୧ରେ ପରବର୍ତ୍ତୀ ନିଲାମ ଆୟୋଜିତ ହୋଇଥିଲା । ଗୁଜରାଟ ଟାଇଟନ୍ସ ଓ ଲକ୍ଷେ୍ନø ସୁପରଜାଏଣ୍ଟ୍ସ ନୂଆ ଦଳ ଭାବେ ସାମିଲ ହୋଇଥିଲେ ।
ପୂର୍ବ ନିୟମ ଅନୁଯାୟୀ ୫ଟି ରାଇଟ୍ ଟୁ ମ୍ୟାଚ(ଆରଟିଏମ୍) କାର୍ଡ ବଦଳରେ ୮କୁ ବୃଦ୍ଧି କରିବା ପାଇଁ ଫ୍ରାଞ୍ଚାଇଜ ପ୍ରସ୍ତାବ ଦେଇଛନ୍ତି । ଯାହା ଫଳରେ ପ୍ରତ୍ୟେକ ଫ୍ରାଞ୍ଚାଇଜମାନେ ପ୍ରମୁଖ ଖେଳାଳିମାନଙ୍କୁ ଫେରାଇ ଆଣିବାରେ ସଫଳ ହେବେ । ୪ରୁ ୬ଜଣ ଖେଳାଳିଙ୍କୁ ପ୍ରତିଧାରଣ କରିବା ପରେ ବାକି କିଛି ପସନ୍ଦର ଖେଳାଳି ନିଲାମରେ ସାମିଲ ହେବେ । ତେଣୁ ସେମାନଙ୍କ ମଧ୍ୟରୁ କୌଣସି ଖେଳାଳିଙ୍କୁ ପୁନର୍ବାର ଫେରାଇ ଆଣିବା ପାଇଁ ଅଧିକ ‘ଆରଟିଏମ୍’ କାର୍ଡ ରହିବା ଜରୁରି ।
