ଭୁବନେଶ୍ବର,୨୭।୯ : ଝାରସୁଗୁଡା ଯୁବ ସମାବେଶେରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୋଗ ଦେଇ ୧୭୦୦ କୋଟି ଟଙ୍କାରୁ ଅଧିକ ମୂଲ୍ୟର ରେଳ ପ୍ରକଳ୍ପର ଶୁଭାରମ୍ଭ କରି ଦେଶ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି । ଯାହା ଓଡ଼ିଶାର ଭିତ୍ତିଭୂମି ଏବଂ ସଂଯୋଗୀକରଣକୁ ବୃଦ୍ଧି କରିବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଏହି ପ୍ରକଳ୍ପଗୁଡ଼ିକର ଲକ୍ଷ୍ୟ ଯାତ୍ରୀ ସୁବିଧାରେ ଉନ୍ନତି ଆଣିବା, ମାଲ ପରିବହନକୁ ସୁଦୃଢ଼ କରିବା ଏବଂ ସମଗ୍ର ଅଞ୍ଚଳରେ ଆର୍ଥିକ କାର୍ଯ୍ୟକଳାପକୁ ପ୍ରୋତ୍ସାହିତ କରିବ।
ସମ୍ବଲପୁର ସହର ଏବଂ ସାରଲା ମଧ୍ୟରେ ୨୭୩ କୋଟି ଟଙ୍କାର ରେଳ ଫ୍ଲାଏଓଭରର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏହି ପ୍ରକଳ୍ପ ସାରଲା ଷ୍ଟେସନରେ ଭିଡ଼ ଦୂର କରିବ ଏବଂ କୋଇଲା, ଖଣିଜ ଏବଂ ଶିଳ୍ପ ମାଲ ପରିବହନ ପାଇଁ ଏକ ଗୁରୁତ୍ୱପୂର୍ଣ୍ଣ କରିଡର ହେବ। ଏଥିସହ ସମ୍ବଲପୁର-ଝାରସୁଗୁଡ଼ା ଲାଇନରେ ଟ୍ରେନଗୁଡ଼ିକର ନିରବଚ୍ଛିନ୍ନ ଚଳାଚଳ ସୁନିଶ୍ଚିତ କରିବ । ୪୮୧ କୋଟି ଟଙ୍କାରେ ୩୪ କି.ମି କୋରାପୁଟ-ବାଇଗୁଡ଼ା ରେଳ ଲାଇନର ଦୋହରୀକରଣକୁ ରାଷ୍ଟ ଉଦ୍ଦେଶ୍ୟରେ ଉତ୍ସର୍ଗ କରିଥିଲେ।ଏହା ଟ୍ରେନ ପରିଚାଳନାକୁ ସୁଗମ କରିବ। ଖଣିଜ ପଦାର୍ଥ ଏବଂ କୃଷି ଉତ୍ପାଦର ପରିବହନକୁ ସହଜ କରିବ । ସମ୍ପଦ ସମୃଦ୍ଧ କୋରାପୁଟ ଅଞ୍ଚଳରେ ଶିଳ୍ପ ଅଭିବୃଦ୍ଧିରେ ଯୋଗଦାନ ଦେବ ।
ସେହିପରି ୯୫୫ କୋଟି ବ୍ୟୟରେ ୮୨ କି.ମି ମାନବାର-କୋରାପୁଟ-ଗୋରାପୁର ରେଳ ଲାଇନର ଦୋହରୀକରଣକୁ ରାଷ୍ଟ ଉଦ୍ଦେଶ୍ୟରେ ସମର୍ପିତ କରିଛନ୍ତି। ଏହା ଏକ ଜାତୀୟ ପ୍ରକଳ୍ପ। ଏହା ବୈଲାଡିଲା ଖଣିରୁ ସାରା ଭାରତରେ ଇସ୍ପାତ କାରଖାନାକୁ ଲୁହାପଥର ପରିବହନ ଶୀଘ୍ର କରିବ । ଏହା କୋରାପୁଟ ଏବଂ ବିଶାଖାପାଟଣା ଜିଲ୍ଲାରେ ଯାତ୍ରୀ ଏବଂ ମାଲ ପରିବହନ ସେବାକୁ ମଧ୍ୟ ବୃଦ୍ଧି କରିବ ।
ଏହା ସହିତ, ପ୍ରଧାନମନ୍ତ୍ରୀ ଭିଡିଓ ଲିଙ୍କ୍ ମାଧ୍ୟମରେ ଝାରସୁଗୁଡ଼ାରୁ-ବ୍ରହ୍ମପୁର ଏବଂ ଉଧନା -ସୁରଟ ମଧ୍ୟରେ ଅମୃତ ଭାରତ ଏକ୍ସପ୍ରେସକୁ ପତାକା ଦେଖାଇ ଶୁଭାରମ୍ଭ କରିଥିଲେ। ।ଅମୃତ ଭାରତ ଏକ୍ସପ୍ରେସ୍ ସିଧାସଳଖ ଓଡ଼ିଶାକୁ ଗୁଜରାଟ ସହିତ ସଂଯୋଗ କରିବ ଏବଂ ଆନ୍ଧ୍ର ପ୍ରଦେଶ, ଛତିଶଗଡ଼ ଏବଂ ମହାରାଷ୍ଟ୍ରର ଜିଲ୍ଲାଗୁଡ଼ିକୁ ସେବା ପ୍ରଦାନ କରିବ। ଏହା କେବଳ ଦ୍ରୁତ ଏବଂ ସୁରକ୍ଷିତ ଯାତ୍ରା ପ୍ରଦାନ କରିବ ନାହିଁ ବରଂ ପୂର୍ବ, କେନ୍ଦ୍ରୀୟ ଏବଂ ପଶ୍ଚିମ ଭାରତରେ ଆହୁରି ଦୃଢ଼ ଆର୍ଥିକ ଏବଂ ସାଂସ୍କୃତିକ ସମ୍ପର୍କକୁ ବୃଦ୍ଧି କରିବ।
ଓଡ଼ିଶାର ରେଳ ବିକାଶରେ ଏକ ପରିବର୍ତ୍ତନକାରୀ ପଦକ୍ଷେପ ଯାତ୍ରା ସମୟ ହ୍ରାସ କରିବ, ସୁରକ୍ଷା ଏବଂ ସମୟାନୁବର୍ତ୍ତିତାରେ ଉନ୍ନତି ଆଣିବ, ଶିଳ୍ପ ପ୍ରସାରକୁ ସମର୍ଥନ କରିବ ଏବଂ ରାଜ୍ୟ ସାରା ଚାଷୀ, ବ୍ୟବସାୟୀ, ଯୁବକ ଏବଂ ଶ୍ରମିକଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ।
ପ୍ରଧାନମନ୍ତ୍ରୀ ଏହି ଅବସରରେ କହିଛନ୍ତି ଯେ ଏହି ପ୍ରକଳ୍ପଗୁଡ଼ିକ ଭାରତ ସରକାରଙ୍କ "ସବକା ସାଥ, ସବକା ବିକାଶ, ସବକା ବିଶ୍ୱାସ, ସବକା ପ୍ରୟାସ" ଦୃଷ୍ଟିକୋଣକୁ ପ୍ରତିପାଦନ କରୁଛି । ଏକ ବିକଶିତ ଭାରତ ଏବଂ ଏକ ବିକଶିତ ଓଡ଼ିଶା ଗଠନର ଅବିଚ୍ଛେଦ୍ୟ ଅଂଶ, ଯାହା ରାଜ୍ୟର ପ୍ରତ୍ୟେକ ଭାଗରେ ପ୍ରଗତି ଏବଂ ଆଧୁନିକ ଭିତ୍ତିଭୂମି ପହଞ୍ଚିବା ସୁନିଶ୍ଚିତ କରିବ।
