ପାଟ୍ନା,୧୬/୧୦: ନିର୍ବାଚନୀ ରଣନୀତିକାରରୁ ରାଜନେତା ପାଲଟିଥିବା ପ୍ରଶାନ୍ତ କିଶୋରଙ୍କ ଜନସୁରାଜ ପାର୍ଟି ଏଥର ବିହାର ନିର୍ବାଚନରେ ପ୍ରଥମ ଥର ପାଇଁ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛି । ଇତିମଧ୍ୟରେ ବୁଧବାର ସେ ନିର୍ବାଚନ ଲଢ଼ିବେ ନାହିଁ ବୋଲି ସ୍ପଷ୍ଟ କରିଛନ୍ତି ।
ପ୍ରଶାନ୍ତ କିଶୋରଙ୍କ ଅନୁସାରେ, ଜନହିତ ଓ ବଡ଼ ଲକ୍ଷ୍ୟକୁ ନଜରରେ ରଖି ଏହି ନିଷ୍ପତ୍ତି ନିଆଯାଇଛି । ଏହାଦ୍ୱାରା ସାଙ୍ଗଠନିକ କାର୍ଯ୍ୟ ଉପରେ ତାଙ୍କର ଫୋକସ୍ ରହିବ । ୧୫୦ରୁ ଅଧିକ ଆସନ ଜିତିବା ତାଙ୍କ ଦଳର ଲକ୍ଷ୍ୟ । ଏହାଠାରୁ କମ୍ ଆସନ ପାଇଲେ ତାକୁ ହାର ଭାବେ ଦେଖାଯିବ । ସେପଟେ ଏହି ନିଷ୍ପତ୍ତି ଲାଗି ବିଜେପି ପ୍ରଶାନ୍ତ କିଶୋରଙ୍କୁ ଟାର୍ଗେଟ୍ କରିଛି ।
ଦଳର ଜାତୀୟ ମୁଖପାତ୍ର ଶେହଜାଦ୍ ପୁନାୱାଲା କହିଛନ୍ତି, ପ୍ରଶାନ୍ତ କିଶୋର ଜଣେ ଅତି ସ୍ମାର୍ଟ ବ୍ୟବସାୟୀ । ନିର୍ବାଚନ ପ୍ରଚାରରେ ତାଙ୍କର ବ୍ୟାପକ ଅଭିଜ୍ଞତା ରହିଛି । ବୋଧହୁଏ ସେ ତୃଣମୂଳ ସ୍ତରରେ ସ୍ଥିତି ତାଙ୍କର କିମ୍ବା ତାଙ୍କ ଦଳର ସପକ୍ଷରେ ନଥିବା ବୁଝିଯାଇଛନ୍ତି । ଆତ୍ମବିଶ୍ୱାସର ଅଭାବ ଯୋଗୁ ସେ ଏଭଳି ନିଷ୍ପତ୍ତି ନେଇଛନ୍ତି ।
