ବ୍ରହ୍ମପୁର, ୧୦/୧୧: ଗୁଣ୍ଠବନ୍ଧ ଗ୍ରାମ ମଶାଣି ବନ୍ଧରେ ପାଣିରେ ବୁଡି ପ୍ରାଣ ହରାଇଲେ ବ୍ୟକ୍ତି । ମୃତକ ତୁରୁବୁଡି ଗ୍ରାମର ବାବୁ ନାମକ ବ୍ୟକ୍ତି ବୋଲି ଜଣାପଡ଼ିଛି । ଗଞ୍ଜାମ ଜିଲ୍ଲା କୁକୁଡାଖଣ୍ଡି ବ୍ଲକ ଗୁଣ୍ଠବନ୍ଧ ଗ୍ରାମ ମଶାଣି ବନ୍ଧରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ତୁରୁବୁଡି ଗ୍ରାମର ବାବୁ ତାଙ୍କ ଶ୍ୱଶୁର ଘର ଗ୍ରାମ ଗୁଣ୍ଠବନ୍ଧକୁ ଆସିଥିଲେ । ସେଠାରେ ସେ ପାଣିରେ ବୁଡ଼ି ନିଖୋଜ ହୋଇଥିଲେ । ବ୍ୟକ୍ତିଙ୍କ ଶାଶୁ ଘର ଲୋକେ ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଉଭୟ ପହଞ୍ଚି ଶନିବାର ରାତିରେ ଖୋଜା ଖୋଜି କରିଥିଲେ । ପରେ ରବିବାର ସକାଳୁ ମଧ୍ୟ ସର୍ଚ୍ଚ ଅପରେସନ ଜାରି ରଖିଥିଲେ । ବହୁ ଖୋଜା ଖୋଜି କରିବା ପରେ ରବିବାର ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ବ୍ୟକ୍ତିଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।